1 Petrus 3:1-22
3 Songon i ma nang hamu angka tunggane boru, unduk ma hamu tu tunggane dolimuna. Asa molo adong sian nasida na so mangoloi hata ni Debata, gabe porsea ma nasida tu hata i alani pangalahomuna, so pola didok hamu manang aha.
2 Ai idaon ni nasida ma pangalahomuna na denggan* dohot unduk ni rohamuna.
3 Unang ma sian luar dipabagak-bagak hamu dirimuna, marhite mandandan obuk, mamangke perhiasan na sian mas manang mamangke pangkean na arga.
4 Alai rohamuna i ma pabagak hamu marhite perhiasan na so olo sega, i ma roha na lambok jala na dame, ai i do na arga di Debata.
5 Ai songon i do angka borua na badia najolo na mangkirim tu Debata mandandani diri nasida. Unduk do nasida tu tunggane doli ni nasida.
6 Songon si Sara, dioloi ibana do si Abraham jala dijou do ibana tuan. Gabe angka boruna ma hamu molo tongtong diulahon hamu na denggan jala ndang talu tu biar ni roha.
7 Songon i ma nang hamu angka tunggane doli, ingkon mangantusi do hamu tu tunggane borumuna saleleng rap hamu. Sangap ma bahen hamu nasida, asa unang tarambat tangiangmuna. Ai jolma na gale do nasida,* jala rap do nasida dohot hamu manjalo hangoluan silehon-lehon ni Debata.
8 Ujungna, saroha ma hamu sude, sapangkilalaan, masihaholongan, marasi ni roha, jala marserep ni roha.
9 Unang ma balos hamu na jahat dohot na jahat manang insak-insak dohot insak-insak. Alai balos hamu ma na jahat dohot na denggan, ai tusi do hamu dijou asa dapotmuna pasu-pasu.
10 Ai “manang ise na mangkaholongi hangoluan jala naeng sonang, ingkon jagaonna do pamanganna sian na jahat jala unang ma dihatahon gabus.
11 Muba ma ibana sian na jahat, diulahon ma na denggan. Mardame ma ibana jala marsitutu ma asa tongtong mardame.
12 Ai diparrohahon Jahowa do halak na mangulahon na sintong jala ditangihon do pangidoan ni nasida. Alai sogo do roha ni Jahowa tu angka na mangulahon na jahat”.
13 Sasintongna, ise ma na mambahen na jahat tu hamu molo marsitutu do hamu mangulahon na denggan?
14 Alai nang pe marsitaonon hamu ala mangulahon na sintong, dapotmuna do las ni roha. Unang ma habiari hamu manang aha na mambahen halak mabiar* jala unang ma ganggu rohamuna.
15 Pos ma rohamuna, Kristus i do Tuan jala na badia do ibana. Sai rade ma hamu mangalusi sude halak na manungkun hamu taringot tu pangkirimonmuna. Alai lambok ma alusi hamu jala sangap ma nasida bahen hamu.
16 Tongtong ma jaga asa ias panggora ni rohamuna, asa maila halak na mandok manang aha pe laho paroa-roahon hamu, dung diida nasida parniulaonmuna na denggan ala siihuthon Kristus hamu.
17 Molo diloas Debata hamu marsitaonon ala mangulahon na denggan, tumagon ma i sian marsitaonon hamu ala mangulahon na jahat.
18 Ai Kristus na mangulahon lomo ni roha ni Debata pe, mate do ibana alani angka parjahat. Holan sahali do ibana mate ro di saleleng ni lelengna laho manogu-nogu hamu tu Debata. Mate dibunu do ibana alai dipahehe laho mangolu di banua ginjang.
19 Dung dipahehe ibana tu banua ginjang, laho ma ibana marbarita tu angka suru-suruan na jahat na dihurung.
20 Nasida ma angka suru-suruan na so mangoloi tu Debata di tingki ni si Noak. Di tingki i, sabar do Ibana paimahon si Noak paturehon parau i. Otik do jolma di bagasan parau i, i ma holan ualu halak na malua sian aek na sumar i.
21 Angka i ma na manggombarhon pandidion, na paluahon hamu nuaeng marhite haheheon ni Jesus Kristus. Pandidion i ndang na laho paiashon pamatangmuna sian na kotor, alai laho mangido panggora ni roha na denggan do sian Debata.
22 Di siamun ni Debata do Jesus dung nangkok tu banua ginjang, jala dipatunduk ibana ma angka suru-suruan dohot angka parhuaso.
Surat na di toru
^ As. “na ias”.
^ As. “Songon gunci na mura puntar”.
^ Manang boi do “Unang ma habiari hamu ancaman ni nasida”.
