1 Petrus 4:1-19
4 Ai nunga marsitaonon Kristus i di pardagingon, alani i parade hamu ma dirimuna asa songon Kristus pingkiranmuna. Ai manang ise naung marsitaonon di pardagingon, ndang ulahononna be dosa.
2 Alani i, sadia leleng nai pe ibana mangolu di pardagingon, ihuthononna ma lomo ni roha ni Debata ndang lomo ni roha ni jolma.
3 Nunga godang dipangke hamu tingkimuna najolo mangihuthon lomo ni roha ni angka bangso. Diulahon hamu do ulaon ni halak na so umboto ila,* hisap-hisap ni daging, mabuk, marpestai sahat tu na mabuk,* martaru minum, jala manomba angka gana-ganaan.
4 Gabe longang ma roha ni nasida ala ndang dohot be hamu mangihuthon parngoluon ni nasida na so hasea. Alani i, diinsahi nasida ma hamu.
5 Alai uhumonna ma nasida hombar tu parniulaon ni nasida. Ai ibana do na manguhumi halak na mangolu dohot na mate.
6 Sasintongna, alani i ma umbahen na dohot dipaboa barita na uli tu halak na mate. Asa molo diuhumi nasida di pardagingon mangihuthon panguhuman ni jolma, boi ma nasida mangolu mangihuthon panogu-noguon ni tondi parbadia di jolo ni Debata.
7 Alai nunga jonok ujung ni saluhutna. Alani i, marroha ma hamu jala tongtong ma rade hamu martangiang.
8 Na rumingkot sian saluhutna, marsitutu ma hamu masihaholongan. Ai ditutupi* holong i do godang dosa.
9 Rade ma hamu manjalo angka donganmuna, ndang mardongan ungut-ungut.
10 Dilehon Debata do asi ni rohana na mansai balga i tu angka naposona na burju marhite marragam cara. Alani i songon naposona na burju, pangke hamu ma silehon-lehon i laho mangkobasi na asing.
11 Molo mangkatai sasahalak, mangkatai ma ibana songon na pasahathon hata ni Debata. Molo diurupi ibana donganna na asing, diulahon ma i mangasahon gogo ni Debata, asa sangap Debata di saluhutna marhite Jesus Kristus. Ai di Ibana do hasangapon dohot hamuliaon saleleng ni lelengna. Amen.
12 Hamu angka dongan na hinaholongan, unang ma sungkun-sungkun rohamuna tu posi ni pangunjunan na masa tu hamu, songon na so hea masa sisongon i tu hamu.
13 Alai las ma rohamuna ala dohot hamu marsitaonon songon Kristus i, asa marlas ni roha situtu hamu tingki dipapatar hasangaponna i.
14 Las ma rohamuna molo dileai hamu alani goar ni Kristus i, jala i ma patuduhon na adong di hamu tondi parbadia ni Debata na gogo i.
15 Unang ma adong sian hamu na marsitaonon ala mambunu, manangko, mangulahon na jahat manang mangantoi na so ulaonna.
16 Alai manang ise na marsitaonon ala halak Kristen ibana, unang ma maila ibana. Tongtong ma ibana pasangaphon Debata huhut mangkatindangkon goarna.
17 Ai nunga jumpang tingki naung ditontuhon laho manguhumi, parjolo ma i sian bagas ni Debata. Molo parjolo i masa tu hita, aha ma na masa tu angka halak na so mangoloi barita na uli sian Debata?
18 “Molo maol do malua angka halak na mangulahon lomo ni roha ni Debata, boha nama angka halak na so pasangaphon Debata jala pardosa?”
19 Alani i, manang ise na marsitaonon ala mangulahon lomo ni roha ni Debata, dipasahat ma dirina tu Sitompa hita, i ma haposan i huhut mangulahon angka na denggan.
Surat na di toru
^ Di bahasa Junani aselgeia. Ida di Kamus.
^ Mabuk jala mangulahon ulaon na rorang.
^ Manang “dihungkupi”.
