1 Petrus 5:1-14
5 Donganmuna sintua do ahu, huida do sitaonon ni Kristus i jala parsidohot do ahu manjalo hasangapon na laho dipapatar i. Mangelek-elek ma ahu tu angka sintua na adong di tonga-tongamuna:
2 Parmahani hamu ma biru-biru ni Debata na pinasahatna tu hamu. Manat ma parrohahon hamu nasida jala rade ma hamu mangulahon i songon lomo ni roha ni Debata, unang ma ala na tarpaksa. Sian las ni rohamuna ma i ulahon hamu, unang alani pangomoan.
3 Unang ma songon na mamarenta hamu tu biru-biru na pinasahat ni Debata tu hamu, alai gabe sitiruon ma hamu tu nasida.
4 Dung i, jaloonmuna ma mahkota hamuliaon na so boi sega i tingki dipapatar parmahan na sumurung i.
5 Songon i ma nang hamu angka baoa na umposo, unduk ma hamu tu angka baoa na umtua.* Alai sude ma hamu marserep ni roha maradophon na asing. Ai dihasogohon Debata do ginjang ni roha, alai dipatuduhon Ibana do asi ni rohana na mansai balga i tu halak na serep marroha.
6 Patutoru hamu ma dirimuna tu toru ni tangan ni Debata na gogo i, asa dipatimbo Ibana hamu di tingki naung ditontuhon i.
7 Pasahat hamu ma sude holso ni rohamuna tu Ibana, ai disarihon do hamu.
8 Jaga ma hamu, tongtong ma torang pingkiranmuna! Ai mardalani do musumuna Sibolis i songon singa na marauang mangalului sibondutonna.
9 Alo hamu ma Sibolis i marhite haporseaonmuna na togu. Ai diboto hamu do, angka dongan sahaporseaonmuna na di liat portibi on pe manaon sitaonon na songon i.
10 Alai Debata na gok asi ni roha na mansai balga i, togu-toguonna do hamu sahat tu ujungna. Ibana do na manjou hamu tu hasangaponna na manongtong i, asa marsada hamu dohot Kristus. Dung ditaon hamu satongkin hasusaan i, patoguonna, pargogoanna, jala pahotonna ma hamu.
11 Di Ibana ma hagogoon sahat tu saleleng ni lelengna. Amen.
12 Diurupi si Silwanus* do ahu mambahen surat na jempek on tu hamu. Didok rohangku, sahalak dongan na marsihohot do ibana. Hubahen do surat on laho patoguhon hamu, jala paposhon rohamuna na tutu do asi ni roha ni Debata na mansai balga i na pinatuduna tu hamu. Alani i, gomos ma i tiop hamu.
13 Sahat ma tabe sian donganta borua* na adong di Babel, na tarpillit songon hamu dohot sian anakku si Markus.
14 Denggan ma jalo hamu donganmuna na asing.
Dame ma di hamu sude, angka na marsada dohot Kristus!
Surat na di toru
^ Manang “sintua”.
^ Na laos digoari si Silas.
^ Hata “donganta borua” na dison boi do i mandok huria na di Babel.
