Epesus 1:1-23
1 Sian si Paulus na gabe apostel ni Kristus Jesus mangihuthon lomo ni roha ni Debata, mandapothon angka na badia na adong di Epesus dohot angka na marsihohot di bagasan Kristus Jesus:
2 Anggiat ma dipatuduhon tu hamu asi ni roha na mansai balga i dohot hadameon na sian Debata Ama i dohot sian Tuanta Jesus Kristus.
3 Pinuji ma Debata, Ama ni Tuanta Jesus Kristus. Ai dipasu-pasu Ibana do hita marhite tondi parbadia na sian banua ginjang i, ala marsada hita dohot Kristus.
4 Ai nunga dipillit Ibana hita asa marsada dohot Kristus andorang so dijadihon portibi on. Alani i tapatuduhon ma holong, habadiaon, jala ndang martihas* di jolona.
5 Nunga ditontuhon Debata hian na bahenonna hita gabe angka anakna marhite Jesus Kristus. Hombar do i tu sangkapna dohot tu lomo ni rohana,
6 asa tapuji Ibana alani asi ni rohana na mansai balga i na pinatuduna tu hita marhite anak haholonganna i.
7 Marhite anakna i, ditobus jala dipalua ma hita. Disesa do dosanta marhite mudarna. Ai balga situtu do asi ni roha ni Debata.
8 Alani asi ni rohana na mansai balga i, dibahen do hita marbisuk jala mangantusi di saluhutna.
9 Dipaboa Ibana do tu hita rahasia na badia* taringot tu lomo ni rohana. Hombar tu sangkapna, nunga ditontuhon Ibana hian
10 asa dibahen pengaturan laho papunguhon saluhut na di banua ginjang dohot na di tano on di bagasan Kristus, dung salpu tingki naung tinontuhonna. Di bagasan Kristus do
11 hita marsada jala manjalo janji ni Debata. Nunga dipillit Debata hian hita hombar tu sangkapna. Ibana do Debata na sai mangulahon saluhutna hombar tu lomo ni rohana.
12 Alani i gabe dipuji ma hasangaponna marhite hita, angka naung parjolo mangkirim tu Kristus.
13 Alai hamu pe nunga mangkirim tu ibana dung dibege hamu hasintongan, i ma barita na uli taringot tu haluaonmuna. Dung porsea hamu, dimateraihon ibana do hamu marhite tondi parbadia naung dijanjihon i.
14 On ma jaminan na dohot do hita manjalo janji ni Debata. Ai naeng paluaonna do bangsona marhite tobusan laho parohon pujian tu hasangaponna.
15 Tingki hubege taringot tu haporseaonmuna tu Tuan Jesus dohot holongmuna tu angka na badia i,
16 sai tongtong do ahu mandok mauliate alani hamu. Tongtong do hutangiangkon hamu,
17 anggiat ma marbisuk hamu dibahen Debata jala mangantusi angka na pinapatarna, asa dapotmuna parbinotoan na bagas taringot tu Ibana. Ibana do Ama na marmulia i, Debata ni Tuanta Jesus Kristus.
18 Nunga dibungka Ibana rohamuna asa diboto hamu pangkirimon na laho lehononna tu hamu, asa diboto hamu balga ni hasangapon na laho lehononna tu angka na badia,
19 jala asa diboto hamu mansai balga do huaso na pinatuduna tu hita angka na porsea. Tarida do huasona na mansai balga i tingki dipangke Ibana gogona
20 laho pahehehon Kristus sian angka na mate jala mambahen ibana di siamunna di banua ginjang.
21 Tumimbo do ibana sian sude pamarenta, parhuaso, angka pamimpin, angka raja, dohot sian sude angka goar. Ndang holan di tingki on,* alai dohot do di tingki na naeng ro.
22 Dibahen Debata do muse tunduk saluhutna tu toru ni pat ni Kristus jala dibahen do ibana gabe ulu ni nasa na adong di huria.
23 Daging ni Kristus do huria i na gabe sun denggan marhite ibana, jala ibana do na mambahen sun denggan di saluhutna.
