Lukas 10:1-42
10 Di pudian ni ari dipillit Tuan i ma 70 halak na asing. Disuru ma nasida dua halak sapardalanan laho manjoloani ibana tu ganup kota dohot inganan na naeng sidalananna.
2 Didok ibana ma tu nasida, “Bidang do nian sisabion, alai otik do angka panabi. Alani i, pangido ma tu Nampuna sisabion i asa disuru angka panabi tu sisabionna i.
3 Laho ma hamu! Husuru do hamu songon anak ni biru-biru tu tonga-tonga ni serigala.
4 Unang boan hamu inganan ni hepeng, inganan ni sipanganon, manang sipatu. Jala unang ma dok hamu hata horas-horas tu manang ise* di pardalanan.
5 Molo masuk hamu tu sada jabu, jumolo ma dok hamu, ‘Dame ma di hamu di jabu on.’
6 Molo adong disi na olo manangihon barita na uli taringot tu hadameon, sahat ma damemuna tu ibana. Alai molo so adong, mulak ma muse hadameon i tu hamu.
7 Tinggal ma hamu di jabu i, pangan jala inum hamu ma na pinarade ni nasida, ai tama do parkarejo manjalo upana. Unang ma marpinda-pinda sian sada jabu tu jabu na asing.
8 “Molo masuk hamu tu sada kota jala dijalo* nasida hamu, pangan ma na pinarade ni nasida tu hamu.
9 Pamalum ma na marsahit na disi jala dok ma tu nasida, ‘Nunga jonok Harajaon ni Debata tu hamu.’
10 Alai molo masuk hamu tu sada kota hape ndang dijalo hamu, laho ma hamu tu sirpang ni dalan jala dok ma,
11 ‘Paspasonnami do tu hamu nang orbuk na longkot di patnami na sian kotamuna on. Alai boto hamu ma nunga jonok Harajaon ni Debata.’
12 Hudok ma tu hamu, di ari i umborat do panguhuman tu kota i sian tu Sodom.
13 “Marjea ma ho Korasin, marjea ma ho Betsaida! Autsura di Tirus dohot di Sidon masa tanda halongangan* na hubahen tu hamu, nunga sian najolo nasida muba, marabit goni jala hundul di sirabun.
14 Alani i di Ari Paruhuman, umborat do panguhuman tu hamu sian tu Tirus dohot tu Sidon.
15 Dohot ho Kapernaum, dirimpu ho naeng patimboon ho sahat tu langit? Tu Kuburan* do ho bahenon!
16 “Manang ise na manangihon hamu, na manangihon ahu do i. Manang ise na manulak hamu, na manulak ahu do i. Jala manang ise na manulak ahu, na manulak na marsuru ahu i do ibana.”
17 Dung i mulak ma na 70 halak i di bagasan las ni roha, ninna ma, “Tuan, dohot do angka suru-suruan na jahat tunduk tu hami tingki hupangke hami goarmu.”
18 Ninna Jesus ma tu nasida, “Huida do nunga madabu Sibolis* songon hilap sian langit.
19 Hulehon do tu hamu huaso laho mandege ulok dohot hala dohot manaluhon sude hagogoon ni musu, jala ndang adong na boi parohon jea tu hamu.
20 Unang ma las rohamuna ala tunduk tu hamu angka suru-suruan na jahat i. Alai, marlas ni roha ma hamu ala nunga tarsurat goarmuna di banua ginjang.”
21 Di tingki i, marlas ni roha ma Jesus alani tondi parbadia jala ninna ma, “Hupuji do ho di jolo ni natorop ale Amang, Tuan ni langit dohot tano on, ala dipapatar ho do on tu halak na serep marroha na songon dakdanak, jala ditabunihon ho do i sian angka na bisuk dohot na pistar. Tutu, hombar do on tu lomo ni roham ale Amang.
22 Saluhutna nunga dipasahat Damang tu ahu. Ndang adong na mananda Anak i asing ni Ama i. Jala ndang adong na mananda Ama i asing ni Anak i dohot halak na niajaran ni Anak i taringot tu Ama i.”
23 Dung i, diida Jesus ma tu angka siseanna jala pulik ma dipaboa ibana tu nasida, “Marlas ni roha ma halak na mangida angka na niidamuna.
24 Hudok ma tu hamu, lomo do roha ni torop panurirang dohot angka raja naeng mangida na niidamuna alai ndang diida nasida, jala naeng mambege na binegemuna alai ndang dibege nasida.”
25 Dung i jongjong ma sahalak siboto patik laho manguji ibana, ninna ma, “Guru, aha do sibahenonku asa dapot ahu hangoluan na saleleng ni lelengna?”
26 Didok Jesus ma tu ibana, “Aha do na tarsurat di Patik i? Songon dia do pangantusionmu taringot i?”
27 Ninna ibana ma mangalusi, “‘Ingkon haholonganmu do Jahowa Debatam sian nasa roham, sian nasa ngolum, sian nasa gogom, dohot sian nasa pingkiranmu’ jala ‘haholongi ma donganmu jolma doshon dirim.’”
28 Didok Jesus ma tu ibana, “Sintong do alusmi. Tongtong ma ulahon i, asa dapotmu hangoluan.”
29 Alai naeng pasintongonna ma dirina, didok baoa i ma tu Jesus, “Ise do sasintongna donganku jolma?”
30 Didok Jesus ma mangalusi, “Adong ma sasahalak na turun sian Jerusalem tu Jeriko. Alai dirampok ma ibana di tonga dalan, dibuat ma pangkeanna dohot artana, dipungkuli, jala ditinggalhon ma ibana nunga naeng mate.
31 Mamolus ma sahalak malim sian dalan i. Tingki diida ibana na hona rampok i, dipasiding ibana ma jala ditorushon pardalananna.
32 Songon i do muse sahalak Lepi, dung sahat ibana di inganan i, diida ibana do na hona rampok i. Alai dipasiding ibana ma jala ditorushon pardalananna.
33 Mamolus ma muse sahalak Samaria sian dalan i. Tingki diida ibana na hona rampok i, asi ma rohana.
34 Didapothon ibana ma na hona rampok i. Dipaias ma lukana mamangke miak dohot anggur jala dibungkus ma lukana i. Dipanangkok ma ibana tu atas ni halodena jala diboan tu inganan parbornginan, asa diubati ibana disi.
35 Marsogotna i, dibuat halak Samaria i ma dua dinar jala dilehon ma tu panjaga inganan ni parbornginan i. Ninna ma, ‘Urus ma ibana, molo hurang hepeng na hulehon i, hugarar pe tingki ro ahu muse.’
36 Pandapotmu, ise do sian na tolu halak on na gabe dongan jolma ni na hona rampok i?”
37 Dialusi ibana ma, “Halak na patuduhon asi ni roha i do.” Dung i didok Jesus ma tu ibana, “Laho ma ho, bahen ma songon i.”
38 Ditorushon nasida ma muse pardalanan ni nasida tu sada huta. Disi adong ma sahalak borua na margoar si Marta, ditamu ma nasida di jabuna.
39 Adong do anggina na margoar si Maria. Hundul do ibana di pat ni Tuan i manangihon hatana.
40 Alai si Marta, ndang diparrohahon ibana i alani godang ni ulaonna. Gabe didapothon ma Jesus jala ninna ma, “Tuan, na so parduli do ho dipasombu anggingki sahalakku mangaradoti angka ulaon on? Suru jo ibana mangurupi ahu.”
41 Dialusi Jesus ma ibana, “Marta, Marta, godang nai diholsohon ho.
42 Hape otik do na tahaporluhon, gariada sada pe sae do. Alai si Maria, dipillit ibana do na dumenggan jala ndang buaton i sian ibana.”
Surat na di toru
^ Manang “unang pola haol hamu manang ise tingki ditabi hamu nasida”.
^ Manang “dijangkon”.
^ Manang “mukjizat”.
^ Manang “Hades”, kuburan. Ida di Kamus.
^ As. “Setan”. Ida di Kamus.
