Lukas 20:1-47
20 Di sada tingki mangajar ma Jesus di bagas joro jala dibaritahon ibana ma barita na uli disi. Didapothon angka malim kepala,* angka siboto surat dohot angka pangituai ma ibana.
2 Ninna ma tu Jesus, “Paboa ma tu hami, huaso ni ise do dipangke ho mangulahon on? Ise do na marsuru ho mangulahon i?”
3 Dialusi Jesus ma nasida, “Ahu pe adong do sisungkunonku tu hamu. Paboa ma tu ahu,
4 pandidion ni si Johannes i, sian banua ginjang do manang sian jolma?”
5 Dung i masisungkunan ma nasida, ninna ma, “Molo tadok sian banua ginjang, dohononna ma, ‘Antong boasa ndang porsea hamu tu ibana?’
6 Alai molo tadok, ‘Sian jolma,’ dangguron ni angka halak ma hita. Ai porsea do nasida sahalak panurirang do si Johannes.”
7 Dung i, dialusi nasida ma na so diboto nasida sian dia dapot ni si Johannes huaso i.
8 Didok Jesus ma tu nasida, “Ahu pe, ndang paboaonku tu hamu marhite huaso ni ise ahu mangulahon i sude.”
9 Dung i dipaboa Jesus ma tudosan on tu natorop i, “Adong ma sahalak na mamungka porlak anggur, dipasewahon ma i tu angka pangula. Dung i laho ma ibana tu luat na asing jala leleng do ibana disi.
10 Dung jumpang tingki panen, disuru ibana ma sahalak hatobanna tu angka pangula i asa dijalo deba parbue ni anggur i. Alai dipungkuli angka pangula i do ibana jala disuru mulak so adong diboan manang aha.
11 Disuru ibana ma muse hatoban na asing, alai dipungkuli nasida do ibana, dileai* jala disuru mulak so adong diboan manang aha.
12 Disuru ibana ma muse hatoban na patoluhon, alai dipungkuli nasida do ibana jala dipalao.
13 Didok nampunasa porlak anggur i ma di bagasan rohana, ‘Songon dia ma bahenonku? Suruonku ma anak haholonganki. Ai mabiar do ra nasida tu ibana.’
14 Tingki diida angka pangula i anakna i, masipandohan ma nasida, ‘On do anakna i.* Beta, tapamate ma ibana asa di hita parbagiananna i.’
15 Dung i, disarat ma ibana tu luar ni porlak i jala dipamate. Aha ma bahenon ni nampuna porlak anggur i tu nasida?
16 Ro ma ibana jala pamateonna ma angka pangula i jala dipasahat ma porlak anggur i tu na asing.”
Mambege i didok nasida ma, “Unang ma hea masa sisongon i!”
17 Diida Jesus ma tu nasida jala ninna ma, “Molo songon i, aha do lapatan ni na tarsurat on, ‘Batu na binolongkon ni angka tukang nunga gabe batu parsuhi-suhi na rumingkot’?*
18 Masarsar ma manang ise na madabu tu batu i jala ropuk ma manang ise na tinipa ni batu i.”
19 Dilului angka sibotosurat dohot angka malim kepala* ma dalan laho manangkup Jesus di tingki i. Ai diboto do, nasida na nidok ni Jesus di tudosan i. Alai mabiar do nasida tu angka jolma.
20 Dung manat diparrohahon nasida Jesus, digaji nasida ma sipsip manang na piga halak asa gabe songon halak na burju, laho manjorat Jesus marhite hatana. Dungkon i, pasahaton ni nasida ma ibana tu pamarenta dohot tu tangan ni gubernur.
21 Disungkun nasida ma Jesus ninna ma, “Guru, huboto hami do na sintong na nidokmi dohot na niajarhonmi jala ndang paimbar-imbar jolma ho. Sai sintong do na niajarhonmu taringot tu dalan ni Debata.
22 Mangihuthon patik, boi do gararon pajak tu Kesar manang na ndang?”
23 Alai diboto Jesus do pingkiran ni nasida na jahat, ninna ma,
24 “Patudu ma tu ahu sada hepeng dinar.* Gombar dohot surat ni ise do on?” Dialusi nasida ma, “Kesar.”
25 Didok Jesus ma tu nasida, “Lehon ma tu Kesar ampuna ni Kesar, jala tu Debata ampuna ni Debata.”
26 Ndang tarbahen ni nasida manjorat Jesus marhite hatana di jolo ni jolma. Alai longang do nasida mambege alusna, gabe sip ma nasida.
27 Dung i, ro ma manang na piga halak Saduse na so porsea tu haheheon mandapothon Jesus. Disungkun nasida ma ibana,
28 “Guru, disurathon si Musa do, ‘Molo adong sahalak sian na marhaha maranggi mate jala ditadingkon tunggane boruna ndang marianakhon, ingkon buaton ni haha anggina ma na mabalu i gabe tunggane boruna asa adong pinompar ni hahana naung mate i.’
29 Hea do adong pitu na marhaha maranggi dison. Mangoli ma siangkangan, alai mate ma ibana ndang marianakkon.
30 Dung i na paduahon,
31 na patoluhon sahat tu na papituhon mambuat ibana gabe tunggane boruna. Alai mate do nasida sude so jolo mardakdanak.
32 Ujungna mate ma dohot borua i.
33 Antong di ari haheheon, gabe tunggane boru ni ise ma ibana? Ai sude do na pitu i hea mangoli tu ibana.”
34 Didok Jesus ma tu nasida, “Mangoli dohot pamulihon boru do angka halak di tingki on,*
35 alai ndang na laho mangoli manang muli be angka halak na tama dipahehe dohot angka halak na mandapot hangoluan di tingki na naeng ro.
36 Ndang na laho mate be nasida, ai songon suru-suruan do nasida jala gabe angka anak ni Debata do nasida dung dipahehe.
37 Taringot tu halak na mate na laho dipahehe, ditaringoti si Musa do i tingki dipaboa ibana taringot tu ramba na tartutung. Disi didok do Jahowa, ‘Debata ni si Abraham, Debata ni si Isak dohot Debata ni si Jakkob’.
38 Ndang Debata ni na mate Ibana, alai Debata ni na mangolu do. Ai mangolu do nasida sude di adopanna.”
39 Deba sian siboto surat i mandok, “Tutu do na nidokmi Guru.”
40 Ai ndang barani be nasida manungkun manang aha pe tu Jesus.
41 Dung i disungkun Jesus ma tu nasida, “Boasa didok nasida molo Kristus i anak ni si Daud?
42 Ai didok si Daud do di buku Psalmen, ‘Jahowa do mandok tu Tuanku, “Hundul ma ho di siamunhon
43 paima hubahen angka musum gabe sidege-degean ni patmu.”’
44 Didok si Daud do ibana Tuan, alani i songon dia ma ibana gabe anak ni si Daud?”
45 Dung i tingki sude halak manangihon hata ni Jesus, didok ibana ma tu angka siseanna,
46 “Manat ma hamu tu angka siboto surat na mardalan-dalan mamangke jubah, na lomo rohana dipasangap di jolo ni natorop* jala na lomo rohana hundul di jolo di angka sinagoga* dohot di inganan na sangap di parpestaan.
47 Dirampok nasida do jabu* ni angka na mabalu, jala marganjang-ganjang do nasida martangiang asa diida halak. Alani i, jaloon ni nasida do panguhuman na umborat.”
Surat na di toru
^ Ida di Kamus.
^ Manang “dipaila”.
^ As. “On do panean i”.
^ Ida di Kamus.
^ Ida di Kamus.
^ Hepeng logam perak ni halak Rom. Ida di Kamus.
^ Manang “jaman on”. Ida di Kamus.
^ Manang “di pasar”.
^ Manang “parguruan”. Ida di Kamus.
^ Manang “arta”.
