Markus 5:1-43
5 Sahat ma nasida tu bariba ni laut, di luat ni halak Gerasa.
2 Disi kaluar Jesus sian parau i, ro ma sian kuburan sahalak baoa na sinonggopan ni suru-suruan na jahat mandapothon ibana.
3 Di kuburan i do ibana maringanan. Sahat tu tingki i, ndang adong na tolap manali manang mangarante baoa i.
4 Nunga jotjot nian dirante tanganna jala dipasung patna. Alai digotaphon do rante i, disegai do pasungna i jala ndang adong nanggo sahalak pe na tolap patundukkon ibana.
5 Sai marsuraki do ibana arian nang borngin di angka kuburan dohot di angka dolok jala sai diantuki do dagingna dohot batu.
6 Alai dung diida ibana Jesus sian na dao, marlojong jala marsinggang ma ibana tu jolona.
7 Jala marsurak ma ibana gogo, “Ale Jesus Anak ni Debata Natumimbul i, marhua ho ro tuson? Marsumpa ma ho di bagasan goar ni Debata, na so uhumonmu ahu.”
8 Ai nunga didok Jesus hian tu ibana, “Ale suru-suruan na jahat, kaluar ma ho sian ibana.”
9 Dung i disungkun Jesus ma tu ibana, “Ise do goarmu?” Dialusi ibana ma, “Legion* do goarhu, ai godang do hami.”
10 Dielek-elek suru-suruan na jahat i ma Jesus asa unang dipalao nasida sian luat i.
11 Di tingki i, adong ma sapunguan babi na mangan di dolok.
12 Dipangido suru-suruan na jahat i ma tu Jesus, ninna ma, “Suru ma hami laho tu angka babi na disan asa masuk hami tusi.”
13 Dioloi Jesus ma pangidoan ni nasida, kaluar ma angka suru-suruan na jahat i jala masuk ma tu angka babi i. Manimbung ma sude babi i sian topi ni lombang tu laut jala maup ma sude, hira-hira 2.000 ekor godangna.
14 Dung i, marlojongi ma na marmahan babi i jala dipaboa ma i tu kota dohot tu humaliangna. Gabe marroan ma angka jolma laho mangida na masa i.
15 Dung didapothon nasida Jesus, diida ma baoa na sinonggopan ni legion* i hundul, denggan marpangkean jala nunga torang pingkiranna. Gabe mabiar ma nasida sude.
16 Dipaboa halak na marnida na masa i ma tu angka jolma na ro angka na masa tu baoa na sinonggopan ni suru-suruan na jahat i dohot tu angka babi i.
17 Gabe dielek-elek nasida ma Jesus asa laho sian luat ni nasida.
18 Tingki nangkok Jesus tu parau, didapothon baoa na sinonggopan ni suru-suruan na jahat i hian ma ibana. Dielek-elek ma Jesus, asa dipaloas ibana mangihuthon Jesus.
19 Alai, ndang diloas ibana dohot. Didok Jesus ma tu ibana, “Mulak ma ho tu keluargam. Paboa ma tu nasida sude na binahen ni Jahowa tu ho dohot asi ni roha na pinatuduna tu ho.”
20 Dung i, laho ma baoa i jala dibaritahon ma di luat Dekapolis* sude na binahen ni Jesus tu ibana, gabe longang ma nasida sude.
21 Laho ma Jesus muse marparau tu bariba ni laut. Dung jonok ibana tu topi ni laut, marroan ma mansai torop jolma mandapothon ibana.
22 Adong ma sian nasida sahalak pamimpin ni sinagoga* na margoar si Jairus. Dung diida ibana Jesus, marsinggang ma ibana tu patna.
23 Sai dielek-elek ma Jesus, ninna ma, “Mansai posi do nuaeng sahit ni borungku. Ro ma jolo ho mangampehon tanganmu, asa malum ibana jala mangolu.”
24 Laho ma Jesus rap dohot ibana. Torop ma halak mangihuthon Jesus jala masisosahan di pudina.
25 Adong ma disi sahalak borua naung 12 taon ndang hea so bulanna.
26 Nunga mansai godang sitaononna* binahen ni angka pangubati jala nunga habis sude artana laho marubat. Alai ndang marnamalum ibana, gariada lam posi do sahitna i.
27 Dung dibege ibana barita taringot tu Jesus, ro ma ibana sian tonga-tonga ni natorop i manjonoki Jesus jala dijama ma abitna sian pudi.
28 Ai sai didok ibana do di rohana, “Holan abitna i pe hujama, malum do sahithon.”
29 Laos satongkin i, so ma bulanna i jala dihilala ibana ma nunga malum sahitna i.
30 Pintor diboto Jesus do adong huaso na kaluar sian ibana, marbalik ma ibana, dibereng ma tu natorop i, ninna ma, “Ise na manjama abithu?”
31 Alai, ninna angka siseanna i ma tu ibana, “Dibereng ho do masisosahan natorop i di pudim, hape disungkun ho dope ise na manjama ho?”
32 Alai, dibereng Jesus ma humaliang laho marnida manang na ise na manjama ibana.
33 Ala nunga diboto borua i na masa tu dirina, mabiar ma ibana jala hitir-hitir. Ro ma ibana marsinggang tu jolo ni Jesus jala diakkui ibana ma sude.
34 Didok Jesus ma tu borua i, “Ale borungku, haporseaonmi do mambahen ho malum. Mulak ma ho di bagasan dame jala malum ma sahitmi.”
35 Tingki mangkatai dope Jesus, ro ma manang na piga halak sian jabu ni si Jairus jala ninna ma, “Nunga mate borumi! Boasa dope susaanmu Guru i?”
36 Alai dung dibege Jesus hata nasida i, ninna ma tu si Jairus, “Unang ho mabiar, alai patudu ma haporseaonmu.”
37 Dung i ndang diloas Jesus manang ise dohot mangihuthon ibana asing ni si Petrus, si Jakobus dohot si Johannes na marhaha maranggi.
38 Dung sahat nasida tu jabu ni si Jairus, diida Jesus ma nunga torop disi angka na tumatangis jala na mangandungi.
39 Masuk ma Jesus, didok ma tu nasida, “Boasa gaor jala tumatangis hamu? Ndang na mate dakdanak on, alai na modom do.”
40 Alai diparengkeli nasida ma ibana. Dung disuru Jesus kaluar natorop i, ditogihon ma amang dohot inang ni dakdanak i rap dohot siseanna na rap dohot ibana. Masuk ma nasida tu inganan ni dakdanak i.
41 Dung i, ditiop ibana ma tangan ni dakdanak i, jala ninna ma, “Talita kumi,” lapatanna, “Ale borua na metmet, hudok ma tu ho, hehe ma ho!”
42 Pintor hehe ma dakdanak i jala mardalan. (Nunga marumur 12 taon ibana.) Dung i, longang jala las situtu ma roha ni natua-tuana i.
43 Alai, tangkas do diparentahon Jesus tu nasida asa unang dipaboa-boa na masa i tu manang ise pe. Dung i, disuru Jesus ma asa dilehon mangan dakdanak i.
Surat na di toru
^ Ida di Kamus.
^ Ida di Kamus.
^ Manang “sampulu Kota”.
^ Manang “parguruan”. Ida di Kamus.
^ Manang “mansai susa dihilala ibana”.
