Markus 7:1-37
7 Ro ma halak Parise dohot manang na piga halak siboto surat sian Jerusalem marpungu di lambung ni Jesus.
2 Diida nasida ma deba sisean ni Jesus mangan, hape kotor dope tanganna ala so jolo marburi.*
3 (Ai ndang olo halak Parise dohot sude halak Jahudi mangan molo so jolo diburi tanganna sahat tu sikuna, ala diihuthon nasida do adat ni ompu ni nasida.
4 Molo mulak sian pasar, ndang olo nasida mangan ia so jolo dipaias dirina. Jala godang dope adat na asing diihuthon jala dipartahanhon nasida. Umpamana, mangarondam angka mangkuk, angka ceret dohot angka panci tombaga tu aek.)
5 Disungkun halak Parise dohot angka siboto surat ma Jesus, “Boasa ndang diihuthon angka siseanmi adat ni angka ompunta? Ai mangan do nasida hape kotor dope tanganna.”
6 Didok Jesus ma tu nasida, “Halak na munafik do hamu, Toho ma na nidok ni panurirang Jesaya taringot tu hamu taringot tu hamu, ‘Holan di pamanganna do bangso on pasangaphon ahu, alai dao do roha ni nasida sian ahu.
7 Ndang adong gunana nasida tongtong manomba ahu, ai parenta ni jolma do diajarhon nasida.’
8 Ditadingkon hamu do parenta ni Debata hape adat ni jolma gomos do ditiop hamu.”
9 Dung i, didok Jesus ma muse tu nasida, “Malo do hamu pasidingkon parenta ni Debata laho mampartahanhon adatmuna i.
10 Umpamana didok si Musa do, ‘Pasangap ma amangmu dohot inangmu,’ jala ‘Manang ise na mangaleai* amangna manang inangna ingkon pamateon do.’
11 Alai didok hamu do, ‘Molo adong sasahalak na mandok tu amangna dohot inangna, “Sude na ingkon lehononku hian tu hamu, nunga hubahen gabe korban (lapatanna, silehon-lehon tu Debata).”’
12 Dipasombu hamu do ibana ndang mangulahon manang aha tu amana manang tu inana.
13 Alani i, gabe ndang marlangku be hata ni Debata alani adat na pinartahanhonmuna. Jala godang dope na dos tusi diulahon hamu.”
14 Dung i, dijou Jesus ma muse natorop i jala ninna ma tu nasida, “Hamu sude, tangihon ma ahu jala antusi hamu ma lapatanna.
15 Ndang na masuk tu pamangan ni sasahalak na mambahen ibana ramun, alai na kaluar sian pamanganna i do.”
16 *——
17 Dung ditadingkon Jesus natorop i, masuk ma ibana tu sada jabu. Disungkun angka siseanna ma tudosan i tu ibana.
18 Didok Jesus ma tu nasida, “Na dohot do hamu ndang mangantusi songon nasida? Na so diboto hamu do ndang alani na masuk tu pamangan ni sasahalak na mambahen ibana ramun?
19 Ai ndang masuk i tu rohana, alai tu butuhana do, dung i kaluar ma i muse.” Alani i, ias do sude sipanganon didok Jesus.
20 Didok ibana ma muse, “Na kaluar sian roha ni jolma i do na mambahen ibana ramun.
21 Ai sian bagasan, i ma sian roha ni jolma i do ro pingkiran na jahat. Songon mangulahon seks na so patut,* manangko, mambunu,
22 mangalangkup, mangahut, mangulahon hajahaton, manipu, mangulahon ulaon ni halak na so umboto ila,* marlate ni roha, mangaleai, marginjang ni roha dohot mangulahon haotoon.
23 Sude angka hajahaton i sian roha ni jolma do i kaluar jala i do na mambahen ibana ramun.”
24 Dung i borhat ma Jesus sian i, laho ma ibana tu luat Tirus dohot Sidon. Masuk ma ibana tu sada jabu jala ndang lomo rohana diboto halak naung disi ibana. Alai tong do habotoan.
25 Disi adong ma sahalak ina, boruna disonggopi suru-suruan na jahat. Tingki dibege taringot tu Jesus, pintor ro ma ibana jala marsinggang di pat ni Jesus.
26 Halak Junani do borua i, alai tubu* di Siroponisia. Dielek-elek ibana ma Jesus asa dipalao suru-suruan na jahat i sian boruna.
27 Alai ninna Jesus ma tu borua i, “Ai ndang patut buaton roti ni dakdanak jala sampathonon tu anak ni biang, molo so jolo butong dakdanak i.”
28 Ninna borua i ma mangalusi, “Toho do i Tuan, alai diallang anak ni biang na di toru ni meja i do lobi-lobi na sian dakdanak i.”
29 Ninna Jesus ma tu borua i, “Alani alusmi, mulak ma ho. Ai nunga kaluar suru-suruan na jahat i sian borumi.”
30 Mulak ma borua i tu jabuna, diida ma boruna i peak di podoman jala nunga kaluar suru-suruan na jahat i sian boruna i.
31 Dung i borhat ma Jesus sian luat Tirus, mamolus ma ibana sian Sidon tu Laut Galilea torus sahat tu Dekapolis.*
32 Disi, diboan ma tu ibana sahalak na nengel jala na ngungu.* Dielek-elek nasida ma Jesus asa diampehon tanganna tu ibana.
33 Diboan Jesus ma ibana pulik sian natorop i. Dipamasuk Jesus ma jari-jarina tu pinggol ni baoa i, marsitijur ma ibana jala dijama ma dila ni baoa i.
34 Huhut diida tu langit, marhosa ganjang ma Jesus jala ninna ma tu ibana, “Hepata,” lapatanna, “Bungka ma.”
35 Pintor bungka ma parbinegean ni baoa i, malum ma ngunguna i jala boi ma ibana denggan mangkatai.
36 Diorai Jesus do nasida asa unang dipaboa-boa manang tu ise pe. Alai lam diorai, lam dipaboa nasida do.
37 Longang do nasida mangida, ninna ma, “Denggan do dibahen ibana saluhutna. Haru na nengel boi marbinege jala na ngungu boi mangkatai dibahen ibana.”
Surat na di toru
^ Halak Parise dohot halak Jahudi manunsi tangan nasida mangihuthon adat ni halak Jahudi.
^ Manang “mamburai”.
^ Ida Mateus 17:21, surat na di toru.
^ Manang “parmainanon”. Bentuk jamak sian bahasa Junani porneia. Ida di Kamus.
^ Di bahasa Junanina aselgeia. Ida di Kamus.
^ Manang “warga negara”.
^ Manang “sampulu Kota”.
^ Manang “bisu”.
