Pangungkapon 16:1-21
16 Hubege ma soara na gogo sian bagas joro* na mandok tu pitu suru-suruan i, “Laho ma hamu jala usehon hamu ma pitu mangkuk rimas ni Debata tu tano on.”
2 Laho ma suru-suruan na parjolo jala diusehon ma mangkukna tu tano on. Gabe hona bisul na posi jala na so boi malum ma angka halak na manjalo tanda ni binatang buas i dohot angka na manomba patungna.
3 Diusehon suru-suruan na paduahon ma mangkukna tu laut. Gabe songon mudar ni halak na hona bunu ma laut i jala mate ma sude na mangolu di laut i.
4 Diusehon suru-suruan na patoluhon ma mangkukna tu angka sunge dohot tu angka mata mual. Gabe mudar ma sude aek i.
5 Hubege ma suru-suruan na marhuaso tu aek i mandok, “Ho do Debata na marsihohot, na adong nuaeng jala naung adong hian. Na tigor do Ho ala diparo Ho panguhuman on.
6 Diusehon nasida do mudar ni angka na badia dohot angka panurirang. Alani i, dibahen Ho ma nasida manginum mudar, ai patut do nasida manginum i.”
7 Jala hubege ma soara sian langgatan i mandok, “Ale Jahowa, Debata na Sun Hinagogo, sintong jala tigor do angka panguhumanmi.”
8 Diusehon suru-suruan na paopathon ma mangkukna tu mata ni ari, jala diloas ma mata ni ari i manutung angka jolma.
9 Gabe matutung ma jolma alani mohopna. Alai ndang muba nasida jala ndang dipasangap nasida Debata. Gariada dileai nasida do goar ni Debata, na marhuaso tu angka bala i.
10 Diusehon suru-suruan na palimahon ma mangkukna tu habangsa ni binatang buas i, gabe holom ma harajaonna. Diharat angka jolma ma dila ni nasida alani hansit ni pangkilalaan ni nasida.
11 Diburai nasida ma Debata na di banua ginjang alani hansit ni pangkilalaan ni nasida dohot alani bisul ni nasida i. Alai ndang muba nasida sian angka ulaonna.
12 Diusehon suru-suruan na paonomhon ma mangkukna tu Sunge Euprat na balga. Gabe mahiang ma aekna. Alani i, rade ma dalan tu angka raja na ro sian timur.*
13 Dung i, huida ma kaluar tolu surirang na ramun na songon bojak sian baba ni naga i, baba ni binatang buas i dohot pamangan ni panurirang na so sintong* i.
14 Sian angka suru-suruan na jahat do surirang i jala sude ma angka raja na di tano on mambege i. Dibahen ma angka tanda halongangan* laho papunguhon angka raja i tu porang di ari na balga, i ma ari ni Debata na Sun Hinagogo i.
15 “Ida ma! Na ro ma ahu songon panangko. Marlas ni roha ma halak na tongtong jaga jala na mamangke abitna. Asa unang salang-salang ibana mardalan jala maila diida halak.”
16 Dipapungu ma angka raja i tu inganan na margoar Armagedon* di bahasa Heber.
17 Diusehon suru-suruan na papituhon ma mangkukna tu langit.* Tarbege ma soara sian bagas joro,* sian habangsa i na mandok, “Nunga sae!”
18 Dung i ro ma angka hilap, angka soara dohot ronggur. Masa ma gempa* na gogo jala na balga na so hea masa mulai sian na adong jolma di tano on.
19 Mabola ma kota na balga i gabe tolu bagian jala marumpak ma kota ni angka bangso. Diingot Debata ma Babel na Balga i, dilehon ma tu ibana mangkuk anggur na marisi rimasna.
20 Gabe mago ma angka pulo jala ndang adong be angka dolok.
21 Dung i ro ma udan es na balga sian banua ginjang manipa angka jolma. Borat ni sada es hira-hira 20 kilogram. Gabe dileai nasida ma Debata alani udan es i, ai balga situtu do bala i.
Surat na di toru
^ Na nidokna dison i ma Inganan na Badia Situtu na adong di bagas joro.
^ Manang “habinsaran”.
^ Manang “panurirang pargapgap”.
^ Manang “mukjizat”.
^ Di bahasa Junani: Har Magedon, na dibuat sian bahasa Heber i ma “Dolok Megido”.
^ Manang “udara”.
^ Na nidokna dison i ma Inganan na Badia Situtu na adong di bagas joro.
^ Manang “lalo”.
