Pilippi 2:1-30
2 Ala marsada hamu dohot Kristus, masipatoguan, masiapulan di bagasan holong, mamparrohahon na asing, mangkaholongi nasida, jala sabar hamu tu nasida,
2 bahen hamu ma las rohangku marhite mardos ni roha jala masihaholongan, saroha jala sapingkiran.
3 Unang ma sai naeng marbada hamu manang holan mamingkiri diri sandiri. Alai sangap ma bahen hamu tu donganmuna di bagasan toruk ni roha.
4 Unang ma holan mamparrohahon na ringkot di hamu, alai parrohahon ma na ringkot di na asing.
5 Sai songon Kristus Jesus ma pingkiran dohot pangalahomuna.
6 Nang pe songon Debata ibana, alai ndang hea tarpingkir ibana laho manggulut asa sarupa tu Debata.
7 Ndang hea tarpingkir ibana songon i. Alai ditadingkon do sude na di ibana, gabe songon hatoban ibana jala gabe jolma.*
8 Gariada, tingki gabe jolma ibana, dipatutoru do dirina jala mangoloi sahat tu na mate, mate di hau partinaonan.*
9 Alani i, dilehon Debata do tu ibana inganan na tumimbo sian ingananna hian jala dilehon do tu ibana goar na umsangap sian sude goar.
10 Alani i, ingkon marsinggang do sude na di banua ginjang, na di tano on, dohot na di toru ni tano on tu jolo ni goar ni Jesus.
11 Jala sude ma nasida mangakkui Jesus Kristus do Tuan na parohon hasangapon ni Debata Amangta.
12 Angka dongan na huhaholongi, tongtong ma hamu mangoloi, ndang holan ala disi ahu alai tarlumobi saleleng ndang disi ahu. Di bagasan biar ni roha dohot sangap, marsitutu ma hamu asa malua.
13 Ai Debata do na mangalehon gogo tu hamu laho mangulahon lomo ni rohana. Dibahen Ibana do hamu rade jala margogo mangulahon i.
14 Ulahon hamu ma sude so pola marungut-ungut dohot mangalo-alo,
15 asa ias rohamuna jala ndang marsala, songon angka anak ni Debata na so mardosa di tonga-tonga ni sundut* na pargabus jala na jahat. Marsinondang ma hamu di tonga-tonga ni nasida songon siboan panondang tu portibi on,
16 huhut maniop hata ni Debata na parohon hangoluan. Dung i, marlas ni roha ma ahu di ari ni Kristus i, ai ndang marisuang na marlojong i ahu jala ndang marisuang halojaonki.
17 Nang pe diusehon ahu songon pelean siinumon laho marhobas tu Debata, alai rap marlas ni roha do ahu dohot hamu. Ai gabe diulahon hamu do songon i alani haporseaonmuna.
18 Suang songon i ma, ingkon dohot ma nian hamu marlas ni roha rap dohot ahu.
19 Molo lomo roha ni Tuan Jesus, hatop ma nian sahat si Timoteus mandapothon hamu, asa las rohangku mambege baritamuna.
20 Ai ndang adong donganku na songon ibana burjuna, na sian ias ni roha mamparrohahon hamu.
21 Molo na asing i, holan mamparrohahon na ringkot di dirina do nasida, ndang na ringkot tu Jesus Kristus.
22 Alai diboto hamu do songon dia si Timoteus. Songon anak dohot ama, gabe hatoban do ibana rap dohot ahu laho mambahen asa lam denggan ulaon marbarita na uli.
23 Alani i, hirim do rohangku asa ibana na mandapothon hamu dung huboto aha na masa tu ahu.
24 Gariada pos do rohangku di Tuan i, na boi ahu hatop mandapothon hamu.
25 Alai saonari, ringkot do didok rohangku manuru si Epaproditus mandapothon hamu. Ibana ma ale-aleku, donganku saulaon, jala donganku sapartinaonan. Laos ibana do na dipangido hamu mangkobasi na ringkot di ahu.
26 Ai masihol do ibana naeng pajumpang dohot hamu jala marsak do rohana, ala diboto hamu do na marsahit ibana.
27 Tutu do ibana marsahit jala naeng mate. Alai asi do roha ni Debata tu ibana, ndang holan tu ibana dohot do tu ahu, asa unang gabe tamba lungun ni rohangku.
28 Alani i, husuru ma asa hatop ibana mandapothon hamu, asa marlas ni roha hamu muse dung mangida ibana, jala ndang marsak be ahu.
29 Alani i denggan ma jalo* hamu ibana di bagasan las ni roha, songon na somal diulahon hamu manjalo siihuthon Tuan i. Songon i ma bahen hamu manjalo angka dongan na songon ibana.
30 Ai nunga naeng mate ibana alani ulaon ni Kristus i. Dilehon ibana do ngoluna laho manggantihon hamu mangkobasi angka na porlu di ahu.
Surat na di toru
^ As. “gabe dos tu jolma”.
^ Ida di Kamus.
^ Manang “generasi”.
^ Manang “jangkon”.
