Rom 5:1-21
5 Saonari, nunga didok Debata hita mangulahon na sintong alani haporseaon. Alani i, anggiat ma tongtong hita mardame tu Debata marhite Jesus Kristus Tuanta i.
2 Marhite haporseaonta boi ma tadapot asi ni roha ni Debata na mansai balga i, songon na tahilala saonari. Alani i, marlas ni roha ma hita ala marpangkirimon laho manjalo hasangapon sian Debata.
3 Ndang holan i, marlas ni roha ma hita nang pe marsitaonon. Ai taboto, gabe sabar do hita dibahen sitaonon i.
4 Molo sabar hita, lomo ma roha ni Debata tu hita. Molo lomo rohana tu hita, gabe marpangkirimon ma hita.
5 Jala ndang gabe mandele hita dibahen pangkirimon i. Ai nunga digohi holong ni Debata rohanta* marhite tondi parbadia na nilehonna i tu hita.
6 Tingki mardosa* dope hita, mate do Kristus i di tingki naung ditontuhon humongkop halak na mardosa.
7 Adong do ra na olo mate humongkop halak na burju. Alai jarang do adong na olo mate humongkop halak na sintong.
8 Hape mate do Kristus i humongkop hita tingki mardosa dope hita. Marhite i ma Debata patuduhon holongna tu hita.
9 Alani i, ala nunga didok Debata hita mangulahon na sintong marhite mudar ni Kristus i, pos ma rohanta paluaonna do hita sian rimasna marhite ibana.
10 Tingki musuna dope hita, nunga dibahen hita mardame dohot Debata marhite hamamate ni Anakna i. Saonari, nunga mardame hita dohot Debata. Alani i, pos ma rohanta paluaonna do hita marhite hangoluan ni Anakna i.
11 Alai ndang holan i, marlas ni roha do hita ala boi marale-ale tu Debata marhite Tuanta Jesus Kristus. Jala marhite ibana do hita mardame dohot Debata.
12 Alani i, masuk do dosa i tu portibi on marhite sada jolma. Jala dosa i parohon hamatean. Ujungna rarat ma hamatean i tu sude jolma, ala nunga mardosa sude jolma.
13 Nunga adong dosa i di portibi on andorang so adong dope Patik i. Alai molo ndang adong patik i, ndang boi jolma diuhumi alani dosana.
14 Nang pe songon i, nunga marhuaso hamatean i sian tingki ni si Adam sahat tu tingki ni si Musa. Gariada marhuaso do hamatean i tu halak na so mangulahon dosa songon na niulahon ni si Adam. Jala suman tu si Adam do halak na naeng ro i.
15 Alai marimbar do silehon-lehon ni Debata tu dosa. Mate do torop halak alani dosa ni sahalak jolma. Alai, asi ni roha ni Debata na mansai balga i dohot silehon-lehonna i parohon laba na mansai balga tu torop halak. Dilehon Ibana do i marhite asi ni roha na mansai balga i sian sahalak jolma, i ma Jesus Kristus!
16 Asing do pangkorhon ni silehon-lehon ni Debata tu pangkorhon ni dosa ni sahalak jolma. Ai gabe mardosa do sude halak alani dosa ni na sahalak i. Alai gabe didok do torop halak mangulahon na sintong alani silehon-lehon i. Ai ala na godang do jolma mardosa umbahen na dilehon Debata silehon-lehon i.
17 Molo marhuaso do hamatean i gabe raja alani sahalak jolma, pos ma rohanta, boi do mangolu angka jolma jala marhuaso gabe raja marhite sahalak jolma, i ma Jesus Kristus. Ai dapot ni nasida do gok asi ni roha ni Debata na mansai balga i, jala dijalo nasida do gok silehon-lehon ni Debata na mambahen nasida didok mangulahon na sintong!
18 Alani i, songon dosa ni sahalak jolma mambahen sude halak gabe mardosa. Suang songon i ma, alani pambahenan ni sahalak na sintong, boi ma sude jolma didok mangulahon na sintong jala mandapot hangoluan.
19 Alani sahalak jolma na so mangoloi, gabe godang ma jolma mardosa. Suang songon i ma, ala mangoloi do sahalak jolma, boi ma godang halak didok mangulahon na sintong.
20 Dilehon do Patik ni si Musa laho pataridahon na godang dosa ni jolma. Alai dung lam godang dosa i, lam tamba ma asi ni roha ni Debata na mansai balga i.
21 Aha do na tinujuna? Songon dosa dohot hamatean na marhuaso gabe raja, asi ni roha ni Debata na mansai balga i pe marhuaso do gabe raja, asa boi halak didok mangulahon na sintong jala mandapot hangoluan na saleleng ni lelengna marhite Jesus Kristus Tuanta i.
