1 Kronika 29:1-30
29 Didok Raja Daud ma tu sude halak na marpungu i, “Nungnga dipillit Debata be si Salomo anakki.+ Alai poso dope ibana, jala dang diboto dope manang aha.*+ Hape ulaon na balga do pajongjokkon jabu i. Ai dang na lao di jolma bagas joro* na lao dipajongjong i, alai lao di Debata Jahowa do.+
2 Nungnga hubahen sian nasa gogokku lao paradehon akka na porlu lao pajongjokkon jabu ni Debatakku. Huparade do mas, perak, tombaga, bosi,+ dohot akka hau.+ Huparade do muse batu oniks, akka batu na dilokkotton mamakke simin, akka batu karikil na marwarna na gabe hiasan, sude batu na arga, dohot massai godang batu pualam.
3 Asing ni akka na huparade tu jabu na badia i, hulehon do muse artakku+ lao pajongjokkon jabu ni Debatakku.+ Hulehon do mas dohot perak. Ai holong do rohakku tu jabu ni Debatakku.
4 Hulehon do muse 3.000 talenta* mas na sian Opir+ dohot 7.000 talenta perak murni na lao dipakke mangalappis dinding ni jabu i.
5 Hulehon do muse mas dohot perak na lao pakkeon ni akka tukkang mambahen akka barang. Saonari, ise ma na olo sadari on mangalehon na adong di ibana tu Jahowa?”+
6 Alani i, ro ma akka pamimpin ni na sasaompu, akka pamimpin ni ganup marga, akka pamimpin ni na sasaribu dohot na sasaratus,+ dohot akka pamimpin na mangurus ulaon ni raja.+
7 Dilehon nasida do 5.000 talenta mas, 10.000 darik,* 10.000 talenta perak, 18.000 talenta tombaga, dohot 100.000 talenta bosi. Dilehon nasida do i lao pajongjokkon jabu ni Debata na sittong.
8 Manang ise nappuna batu na arga, diboan do i tu inganan panimpanan ni arta di jabu ni Jahowa. Si Jehiel+ pinoppar ni si Gerson+ do pengawas ni inganan panimpanan ni arta i.
9 Marlas ni roha do bangso i mangalehon na adong di nasida. Ai sian nasa roha do nasida mangalehon i tu Jahowa.+ Jala dohot do Raja Daud marlas ni roha.
10 Dung i, dipuji si Daud ma Jahowa di jolo ni sude halak na marpungu i. Didok ibana ma, “Ale Jahowa Debata ni ompunami Israel, sai dipuji ma Ho sahat tu saleleng ni lelengna.
11 Ale Jahowa, balga do huasom,+ na gogo do Ho,+ na marmulia, na burju, jala na sangap.+ Ai appunam do saluhut na di langit dohot na di tano on.+ Appunam do harajaon ale Jahowa.+ Jala dibahen Ho do dirim gabe pamimpin ni saluhutna.
12 Sian Ho do ro hamoraon dohot hasangapon.+ Ho do na mamaretta di saluhutna.+ Marhuaso+ jala margogo do Ho.+ Jala boi do dibahen Ho manang ise pe gabe sangap+ jala margogo.+
13 Saonari, mandok mauliate ma hami tu Ho, ale Debatanami. Jala hupuji hami do goarmu na sangap i.
14 “Alai ise ma au jala ise ma bangsokku umbahen diloas Ho hami mangalean na adong di hami tu Ho? Sian Ho do saluhutna, jala sian Ho do sude na hulehon hami on.
15 Diboto Ho do panoppang do hami, songon akka ompunami.+ Songon bayangan+ do ngolunami di tano on jala jeppek do ari-arinami.
16 Ale Jahowa Debatanami, sian Ho do sude arta na huparade hami lao pajongjokkon jabu na pasangappon goarmu. Jala appunam do i sude.
17 Takkas do huboto ale Debatakku, diida Ho do roha ni jolma+ jala lomo do roham tu halak na ias rohana.+ Sian ias ni rohakku, hulehon do na adong di au. Jala las do rohakku mangida bangsom mangalehon na adong di nasida tu Ho.
18 Ale Jahowa Debata ni akka ompunami si Abraham, si Isak, dohot si Israel, urupi ma asa toktong ias roha ni bangsomon saleleng ni lelengna. Jala urupi ma nasida, asa holan tu Ho nasida marsomba.+
19 Urupi ma si Salomo anakki asa mangoloi parettam,+ sipaingotmu, dohot aturanmu sian nasa rohana.+ Urupi ma ibana mangulahon i sude. Jala urupi ma ibana pajongjokkon bagas joro,* ai nungnga huparade akka na porlu tusi.”+
20 Dung i, didok si Daud ma tu sude halak na marpungu i, “Puji hamu ma Jahowa Debatamuna.” Sude ma halak na marpungu i mamuji Jahowa Debata ni akka ompu ni nasida. Marsomba ma nasida tu Jahowa dohot tu raja i.
21 Sadari i, dilehon nasida ma pelean tu Jahowa dohot pelean situtungon+ tu Jahowa. Dilehon nasida ma muse songon i marsogot nai. Dipelehon nasida do 1.000 lombu jantan na poso, 1.000 biru-biru jantan, 1.000 anak ni biru-biru, dohot pelean siinumon.+ Massai godang do pelean na dilehon sude halak Israel.+
22 Sadari i, marlas ni roha ma nasida jala mangan minum di jolo ni Jahowa.+ Dibahen nasida ma muse si Salomo anak ni si Daud gabe raja. Jala dipillit nasida ma ibana gabe pamimpin di jolo ni Jahowa.+ Laos dipillit ma si Sadok gabe malim.+
23 Dung i, hundul ma si Salomo di tahta ni Jahowa+ manggattihon si Daud bapakna. Marhasil do ibana jala sude do halak Israel mangoloi ibana.
24 Sude pejabat,+ tentara na jago,+ dohot sude anak ni Raja Daud+ tunduk do tu Raja Salomo.
25 Massai sangap do si Salomo dibahen Jahowa di jolo ni halak Israel. Jala ibana do na ussangap sian sude raja ni Israel andorang so ibana.+
26 Songon i ma si Daud anak ni si Isai mamaretta di saluhut luat ni Israel.
27 Saleleng 40 taon ma si Daud mamaretta halak Israel. Mamaretta do ibana di Hebron saleleng 7 taon,+ jala di Jerusalem saleleng 33 taon.+
28 Dung i, mate ma si Daud. Ganjang do umurna+ jala sonang do dihilala ibana saleleng ni ngoluna. Mamora jala sangap do ibana. Dukkon i, si Salomo anakna ma na manggattihon ibana gabe raja.+
29 Disurat si Samuel, Panurirang* Natan,+ dohot si Gad do sude na masa di ngolu ni Raja Daud mulai sian mulana sahat tu ujungna. Boi do si Samuel dohot si Gad+ mandapot parnidaan.
30 Disurat do muse taringot tu harajaon ni si Daud dohot huasona na balga. Jala disurat do muse taringot akka na masa di ngoluna, akka na masa tu halak Israel, dohot tu sude harajaon di sakalilingna.
Surat na di toru
^ Manang “jala dang berpengalaman”.
^ Manang “istana”.
^ 1 talenta = 34,2 kilogram. Ida Lampiran B14.
^ Hepeng logam ni halak Persia na sian mas. Ida Lampiran B14.
^ Manang “istana”.
