1 Raja-Raja 10:1-29
10 Tarbarita do si Salomo ala dipasangap ibana goar ni Jahowa.+ Dung dibege Ratu Syeba taringot i, ro ma ibana mandapotton si Salomo. Dibahen ibana ma akka sukkun-sukkun na maol* lao manguji si Salomo.+
2 Massai godang do na mandongani Ratu Syeba.+ Diboan ibana do miak balsam,*+ mas na massai godang, dohot akka batu na arga. Dibahen ibana do akka unta lao mamboan i. Dung sahat ibana di Jerusalem, ro ma ibana mandapotton si Salomo jala disukkun ibana ma sude sukkun-sukkun na adong di rohana.
3 Dialusi si Salomo ma sude sukkun-sukkun ni ratu i. Ai dang adong na maol sukkun-sukkunna i di raja i.
4 Dung diida Ratu Syeba na massai malo* Raja Salomo,+ jala dung diida ibana jabu na dipajongjongna i,+
5 sipanganon na di mejana,+ didia akka pejabatna hundul, cara ni parkarejona paradehon sipanganon dohot siinumon, pakkean ni parkarejona i, dohot pelean situtungon na somal dipelehon di jabu ni Jahowa, gabe longang situtu ma rohana.
6 Dung i didok ibana ma tu raja i, “Tutu do hape sude na hubege di hutakki taringot tu sude na binahenmu.* Jala tutu do hape na massai malo do ho.
7 Dao do hape ummalo jala ummora ho sian barita na hubege i. Ai dang porsea hian au. Dung pe ro au tuson, huida ma dang adong dope hape nanggo satongana na hubege i.
8 Marlas ni roha ma akka pejabat dohot akka parkarejom na toktong rap dohot ho ganup ari. Ai boi do begeon ni nasida akka podam!+
9 Pinuji ma Jahowa Debatam.+ Holong do rohana tu ho jala dibahen do ho gabe raja ni Israel. Ai toktong do holong roha ni Jahowa tu Israel saleleng ni lelengna. Dibahen Ibana do ho gabe raja, asa adil ho tikki mangadili jala asa diulahon ho na sittong* tikki mamaretta.”
10 Dung i dilehon Ratu Syeba ma 120 talenta* mas, miak balsam na massai godang,+ dohot akka batu na arga.+ Holan ibana do na hea mangalehon miak balsam na songon i godangna tu si Salomo.
11 Asing ni i diboan kapal ni si Hiram na mamboan mas sian Opir i+ do muse godang hau cendana+ dohot akka batu na arga.+
12 Dipakke do akka hau cendana i tu jabu ni Jahowa dohot tu istana ni raja i. Dipakke do i muse mambahen harpa dohot akka alat musik na martali na dipakke akka parende.+ Dang hea dope songon i godangna hau cendana na diboan, manang na hea diida halak sahat tu sadari on.
13 Dilehon si Salomo do hadiah tu Ratu Syeba lao patuduhon burju ni rohana. Jala dilehon ibana do muse sude pangidoan ni Ratu Syeba. Dung i, mulak ma ratu i rap dohot akka parkarejona tu hutana.+
14 Ganup taon diboan do 666 talenta mas tu si Salomo.+
15 Dang dietong dope disi akka uttung na dapotna sian akka partiga-tiga, parbisnis, sian sude raja ni halak Arab, dohot sian akka gubernur.
16 Dibahen Raja Salomo do 200 perisai na balga na sian mas na dicampur.+ (Dibahen do 600 sekel* mas tu ganup perisai.)+
17 Dibahen Raja Salomo do muse 300 perisai na gelleng* na sian mas na dicampur. (Dibahen do tolu mina* mas tu ganup perisai.) Dibahen raja i ma sude perisai i tu Jabu Tombak Libanon.+
18 Balga do tahta ni raja i, sian gading do i dibahen,+ jala dilappis do i mamakke mas murni.+
19 Di jolo ni tahta i adong do onom anak tangga. Di pudi ni tahta i, adong do kanopi na bulat. Di sabola kanan dohot di sabola kiri ni tahta i, dibahen do inganan pangusandean ni tangan. Jala adong do patung singa+ dibahen di jonok ni ganup pangusandean ni tangan i.
20 Adong do dibahen 12 patung singa di tangga i, onom di sabola kanan, onom di sabola kiri. Dang adong harajaon na asing na mambahen songon i.
21 Sude makkuk ni Raja Salomo dibahen sian mas, jala sian mas murni do sude parkakas na adong di Jabu Tombak Libanon.+ Dang adong na dibahen sian perak. Ai dang mararga perak di tikki ni si Salomo.+
22 Adong do akka kapal Tarsis+ ni raja i na marlayar rap dohot kapal ni si Hiram. Sahali tolu taon mulak do akka kapal i mamboan mas, perak, gading,+ bodat, dohot burung merak.
23 Raja Salomo ma na ummalo+ jala na ummora sian sude raja di tano on.+
24 Sude halak na di tano on naeng pajuppang do dohot* si Salomo lao mambege akka poda* na dilehon Debata tu rohana.+
25 Ganup taon diboan nasida do akka barang na sian perak, mas, akka pakkean, sinjata, miak balsam, akka hoda, dohot akka halode.*
26 Dietong si Salomo ma kareta hoda dohot akka hodana.* Adong ma 1.400 kareta hodana jala 12.000 hodana.*+ Disippan ibana ma i di kota panimpanan ni karetana dohot di inganan na jonok tu istanana di Jerusalem.+
27 Songon godang ni batu do dibahen raja i godang ni perak di Jerusalem. Jala godang ni hau ares dos songon godang ni hau ara na di tombak Syefela.+
28 Sian Mesir do dituhor si Salomo akka hodana. Akka partiga-tigana ma na manuhor akka hoda i.* Jala sarupa do torus arga+ ni hoda i.
29 Arga ni sada kareta sian Mesir, i ma 600 hepeng perak jala arga ni sada hoda, i ma 150 hepeng perak. Digadis nasida do i muse tu sude raja ni halak Het+ dohot tu akka raja ni Siria.
Surat na di toru
^ Manang “teka-teki”.
^ Miak na angur na sian suan-suanan dohot hau.
^ Manang “massai marbisuk”.
^ Manang “sude hatam”.
^ 1 talenta = 34,2 kilogram. Ida Lampiran B14.
^ 1 sekel = 11,4 gram. Ida Lampiran B14.
^ Perisai na somal dipakke akka pemanah.
^ Di Akka Bukku Heber, 1 mina = 570 gram. Ida Lampiran B14.
^ As. “naeng mangida bohi ni”.
^ Manang “akka bisuk”.
^ Di bahasa Heber, binatang on i ma hasil perkawinan ni halode jantan dohot hoda boru-boru.
^ Manang “akka bawa na mamboan hoda”.
^ Manang “akka bawa na mamboan hoda”.
^ Manang boi do “Sian Mesir dohot sian kota Kue do akka hodana. Sian kota Kue do dituhor akka partiga-tiga i akka hoda i”. Olo do ra na nidokna dison, i ma kota Silisia.
