1 Raja-Raja 13:1-34
13 Disuru Jahowa ma naposona,+ i ma sahalak panurirang,* lao sian Juda tu Betel. Tikki i, jongjong do si Jerobeam di labbung ni langgatan+ lao manutung pelean.*
2 Gogo ma soara ni naposo ni Debata na sittong i paboahon hata ni Jahowa. Didok ma, “Ale langgatan, langgatan! Songon on ma hata ni Jahowa, ‘Tubu nama sada poso-poso pinoppar ni si Daud. Jala bahenon ma goarna si Josia!+ Di inganan panombaon* on, tutungonna ma akka malim na manutung akka pelean, jala tutungonna ma holi-holi ni jolma di atasmu.’”+
3 Dilehon ibana ma sada tanda* di ari i. Didok ibana ma, “On ma tanda* sian Jahowa: Bola dua nama langgatan on. Jala marsaburan ma abu* na di atasna.”
4 Dung i, dibege Raja Jerobeam ma hata ni naposo ni Debata na sittong i taringot tu langgatan na di Betel. Ditudu ibana ma doppak naposo ni Debata na sittong i, didok ma, “Takkup ma ibana!”+ Pittor marjogal ma tanganna i jala dang boi be dipahusor.+
5 Dung i, saut ma hata ni Jahowa na pinasahat ni naposo ni Debata na sittong i. Bola dua ma langgatan i jala marsaburan ma abu na di atasna.
6 Didok Raja Jerobeam ma tu naposo ni Debata na sittong i, “Tolong ma jo poang, martangiang ma jo ho mangido asi ni roha* ni Jahowa. Pangido ma asa dipamalum tangankon.”+ Martangiang ma naposo ni Debata na sittong i mangido asi ni roha ni Jahowa. Gabe malum ma tangan ni raja i.
7 Didok raja i ma tu naposo ni Debata na sittong i, “Tu jabu ma jolo hita, asa rap mangan hita. Adong naeng lehonokku tu ho.”
8 Alai didok naposo ni Debata na sittong i ma, “Tung dilehon ho pe satonga hamoraonmi tu au, dang olo au ro tu jabum. Jala dang olo au mangallang roti manang minum di inganan on.
9 Ai songon on do hata ni Jahowa tu au, ‘Unang ma mangallang roti manang minum ho disi, jala unang ma sian dalan haroroanmi ho mulak.’”
10 Mulak ma naposo ni Debata na sittong i sian dalan na asing, jala dang mardalan be ibana sian dalanna tikki na ro i ibana tu Betel.
11 Adong do sahalak panurirang na matua tinggal di Betel. Tikki mulak akka anakna tu jabu, dipaboa nasida ma sude na binahen ni naposo ni Debata na sittong i di Betel. Dipaboa nasida ma muse tu ibana sude na nidok ni naposo ni Debata na sittong i tu raja. Dung sae dipaboa nasida i,
12 didok bapakna i ma, “Sian dalan na dia do ibana mulak?” Dipatudu akka anakna i ma dalan na dibolus naposo ni Debata na sittong i, na ro sian Juda i.
13 Didok ibana ma tu akka anakna i, “Parade jo halodekki.” Diparade nasida ma halodena i jala borhat ma ibana.
14 Dilului ibana ma naposo ni Debata na sittong i. Jala juppangna ma ibana hundul di toru ni hau na balga. Dung i didok ibana ma, “Ai ho do naposo ni Debata na sittong na ro sian Juda i?”+ Dialusi naposo ni Debata na sittong i ma, “Ido.”
15 Didok ibana ma, “Tu jabu ma jolo hita mangallang roti.”
16 Alai dialusi naposo ni Debata na sittong i ma, “Dang boi au lao rap dohot ho manang lao tu jabum. Jala dang boi au mangallang roti manang minum rap dohot ho di inganan on.
17 Ai songon on do hata ni Jahowa tu au, ‘Unang ma mangallang roti manang minum ho disi, jala unang ma sian dalan haroroanmi ho mulak.’”
18 Didok panurirang na matua i ma, “Ai au pe panurirang do songon ho. Nungnga disuru Jahowa suru-suruanna mandok tu au, ‘Togihon ma ibana tu jabum asa mangallang roti jala minum ibana.’” Hape na margabus do ibana.
19 Dioloi ibana ma hata ni panurirang na matua i. Lao ma ibana tu jabuna, mangallang roti, jala minum rap dohot ibana.
20 Tikki rap mangan nasida di meja, ro ma hata ni Jahowa tu panurirang na manogihon ibana mulak i.
21 Didok panurirang na matua i ma tu naposo ni Debata na sittong i, “Songon on ma hata ni Jahowa, ‘Nungnga dialo ho hata ni Jahowa, jala dang diihutton ho paretta na nilehon ni Jahowa Debatam tu ho,
22 mulak do ho tu inganan on lao mangallang roti jala minum. Hape nungnga didok hian tu ho, “Unang ma mangallang roti manang minum ho.” Alani i, dang tanomon be bakkem di kuburan ni akka ompumu.’”+
23 Dung sae naposo ni Debata na sittong i mangallang roti jala minum, diparade panurirang na matua i ma halodena tu ibana.
24 Borhat ma ibana. Alai di tonga dalan, ro ma singa mangaroro jala pamatehon ibana.+ Peak do bakkena di dalan i. Jala jongjong do halode dohot singa i di labbung ni bakkena.
25 Diida sude halak na lewat sian dalan i do bakkena i. Diida nasida do jongjong singa i di labbung ni bakkena i. Gabe lao ma nasida tu kota ni panurirang na matua i, jala diceritahon nasida ma na masa i di kota.
26 Dibege panurirang na matua i ma na masa i. Pittor didok ibana ma, “Naposo ni Debata na sittong i do i. Ai dang dioloi ibana hata ni Jahowa.+ Gabe dilehon Jahowa ma ibana tu singa, asa diallang jala dipamate, songon naung didok Jahowa hian tu ibana.”+
27 Dung i didok ibana ma tu akka anakna, “Parade ma halodekki.” Diparade nasida ma i.
28 Lao ma ibana, jala diida ibana ma bakke ni naposo ni Debata na sittong i peak di tonga dalan. Diida ibana do muse jongjong halode dohot singa di labbung ni bakkena i. Alai dang diallang singa bakke i, jala halode i pe dang dihahua.
29 Diangkat panurirang na matua i ma bakke ni naposo ni Debata na sittong i tu halodena. Diboan ibana ma bakke i tu kotana, asa diandungi jala dikubur.
30 Dipeakkon ibana ma bakke i di kuburan ni akka ompuna. Sai mangandungi ma nasida, ninna ma, “O ale anggia, asi nai rohakki mangida ho!”
31 Dung dikubur bakkena i, didok ibana ma tu akka anakna, “Molo dung mate au amang, kuburhon ma au di labbung ni naposo ni Debata na sittong on. Peakkon ma holi-holikku di labbung ni holi-holina.+
32 Ai pasti do saut sude hata ni Jahowa na pinasahatna marhite naposo ni Debata na sittong i taringot tu langgatan na di Betel. Songon i nang hatana taringot tu akka inganan panombaon*+ na di kota Samaria, pasti saut do i.”+
33 Nang pe nungnga masa sudena i, dang muba si Jerobeam sian pangalahona na jahat. Toktong do dipillit ibana akka malim lao martugas di inganan i, nang pe dang marga Lepi.+ Manang ise na marlomo ni roha gabe malim, pillitonna ma i jala dohononna ma, “Lok ma ibana gabe malim di inganan panombaon* on.”+
34 Alani dosa ni keluarga ni si Jerobeam,+ dipamate ma nasida jala dang adong na dipasombu mangolu di tano on.+
Surat na di toru
^ Manang “manutung pelean asa nakkok timusna”.
^ Manang “tanda halongangan”.
^ Manang “tanda halongangan”.
^ Manang “abu na marcampur dohot tabo-tabo”.
^ Manang “palambok ma bohi”.
