1 Raja-Raja 2:1-46
2 Nungnga naeng mate si Daud. Alani i, didok ibana ma akka tudu-tudu on tu si Salomo,
2 “Nungnga naeng mate au.* Jadi, ikkon togu+ do ho jala barani.*+
3 Ikkon toktong do oloanmu Jahowa Debatam, asa marhasil* sude na niulam jala asa marhasil ho manang na tudia pe ho lao. Ihutton ma akka dalanna, jala oloi ma akka aturanna, akka parettana, akka hukumna, dohot akka sipaingotna na tarsurat di Patik ni si Musa.+
4 Molo diulahon ho songon i, pasauton ni Jahowa ma janji naung binahenna tu au. Ai didok Ibana do tu au, ‘Molo diparrohahon akka anakmu parange ni nasida, jala molo toktong nasida setia mangihutton akka dalanku sian nasa roha dohot sian nasa ngolu* ni nasida,+ sian pinopparmu ma na toktong hundul di tahta ni harajaon ni Israel.’+
5 “Takkas do diboto ho songon dia pambahenan ni si Joab anak ni si Seruya tu au. Dipamate ibana do dua pamimpin ni tentara ni Israel, si Abner+ anak ni si Ner dohot si Amasa+ anak ni si Jeter. Dipamate ibana do nasida,+ hape di tikki i so adong porang. Jala hona do mudar ni nasida tu ikat pinggangna dohot tu sipatuna.
6 Alani i, ikkon marbisuk do ho. Pamate ma si Joab jala unang pasombu ibana mate songon parmate ni halak somalna.*+
7 “Alai ikkon patuduhononmu do holong ni roham* tu akka anak ni si Barsilai+ halak Gilead i. Ikkon dohot do nasida mangan di mejam. Ai diurupi nasida do au+ tikki dilele si Absalom abangmi au.+
8 “Unang ma lupa ho tu si Simei anak ni si Gera halak Benjamin na sian Bahurim i. Ai massai posi do diburai ibana au+ tikki na lao i au tu Mahanaim.+ Alai tikki ro ibana mandapotton au di Jordan, nungnga marsumpa au tu ibana di jolo ni Jahowa na so pamateonku ibana mamakke podang.+
9 Alai saonari ikkon hukumonmu do ibana.+ Marbisuk do ho jala diboto ho do aha na ikkon ulahononmu. Pamate ma ibana jala unang pasombu ibana mate songon parmate ni halak somalna.”*+
10 Dung i mate* ma si Daud jala dikubur ma ibana di Kota ni si Daud.+
11 Saleleng 40 taon ma si Daud mamaretta halak Israel. Mamaretta do ibana di Hebron+ saleleng 7 taon, jala di Jerusalem saleleng 33 taon.+
12 Dung i hundul ma si Salomo di tahta ni si Daud bapakna. Jala lam leleng, lam marhuaso ma harajaonna.+
13 Di sada tikki, ro ma si Adonia anak ni si Haggit manjuppangi si Bat-seba omak ni si Salomo. Disukkun si Bat-seba ma tu ibana, “Di bagasan dame do haroromon?” Dialusi ibana ma, “Ido.”
14 Dung i didok si Adonia ma, “Adong naeng hudokkon tu ho.” Didok si Bat-seba ma, “Dokkon ma.”
15 Didok si Adonia ma, “Takkas do diboto ho, au hian do na ikkon gabe raja, jala i do pangidoan* ni sude halak Israel.+ Alai dang au na saut gabe raja, gabe anggikku do. Ai Jahowa do na mamillit ibana.+
16 Saonari adong sada pangidoakku tu ho. Molo boi, oloi ma pangidoakkon.” Didok si Bat-seba ma, “Aha huroa pangidoanmi?”
17 Didok si Adonia ma, “Pangido ma jolo tu Raja Salomo asa dilehon tu au si Abisag+ halak Sunem i gabe istrikku. Ai huboto do, oloanna do pangidoanmu.”
18 Didok si Bat-seba ma, “Olo. Hupaboa pe pangidoanmi tu raja.”
19 Dijuppangi si Bat-seba ma Raja Salomo lao paboahon pangidoan ni si Adonia. Pittor hehe ma raja i jala marsomba tu jolona. Dung i, hundul ma Raja Salomo di tahtana. Disuru ma asa diparade sada tahta di sabola kananna jala hundul ma omakna disi.
20 Didok si Bat-seba ma, “Adong saotik pangidoakku tu ho. Molo boi, oloi ma da.” Didok raja i ma, “Aha huroha pangidoanmu omak? Dokkon ma, huoloi pe.”
21 Didok si Bat-seba ma, “Molo boi, lehon ma si Abisag halak Sunem i gabe istri ni si Adonia abangmi.”
22 Didok Raja Salomo ma, “Boasa dipangido ho asa hulehon si Abisag halak Sunem i gabe istri ni si Adonia? Sapala pangido ma asa gabe raja ibana.+ Ai abangku do ibana,+ jala diurupi Malim Abiatar dohot si Joab+ anak ni si Seruya do ibana.”+
23 Marsumpa ma Raja Salomo di jolo ni Jahowa, “Sai borat ma au hukumon ni Debata molo dang hupamate si Adonia alani pangidoanna i.
24 Nungnga dibahen Debata au hundul di tahta ni bapakku si Daud jala nungnga dilehon Ibana harajaon i tu au+ dohot tu pinopparhu.*+ Saonari, songon pastina Jahowa mangolu,* ikkon pamateonku+ do si Adonia sadari on.”
25 Disuru Raja Salomo ma si Benaya+ anak ni si Jehoyada pamatehon si Adonia. Dung i lao ma si Benaya jala dipamate ma si Adonia.
26 Didok Raja Salomo ma tu Malim Abiatar,+ “Lao ma ho tu ladangmu na di Anatot.+ Ikkon pamateon hian do ho, alai dang pamateonku ho sadari on. Ai tikki rap ho dohot bapakku,+ ho do na mamboan poti parpadanan ni Jahowa Tuan Natumimbul i, jala dohot do ho manaon sude hasusaan ni bapakku.”+
27 Dipalao si Salomo ma si Abiatar jala dang gabe malim ni Jahowa be ibana. Gabe saut ma hata ni Jahowa na pinaboana di Silo+ taringot tu si Eli dohot pinopparna.+
28 Dibege si Joab ma na masa i. Gabe lari ma ibana tu tabernakel ni Jahowa+ jala ditiop ibana ma tanduk ni langgatan i. Ai marpihak do ibana tu si Adonia.+ Hape najolo, dang marpihak ibana tu si Absalom.+
29 Adong ma halak na paboahon i tu Raja Salomo. Didok ma, “Nungnga lari be si Joab tu tabernakel ni Jahowa jala di labbung ni langgatan i do ibana.” Dung i didok si Salomo ma tu si Benaya anak ni si Jehoyada, “Lao ma ho tusi, pamate ma ibana!”
30 Sahat ma si Benaya di tabernakel ni Jahowa. Didok ma tu si Joab, “Diparettahon raja do asa kaluar ho sian on!” Alai didok si Joab ma, “Dang olo au! Dison ma au mate.” Mulak ma si Benaya mandapotton raja i jala dipaboa ma sude na nidok ni si Joab.
31 Didok Raja Salomo ma tu ibana, “Ulahon ma songon na nidokna i. Pamate ma ibana jala kuburhon ma. Molo dibahen ho songon i, malua ma au dohot keluarga ni bapakku sian mudar ni halak na so marsala na niusehon ni si Joab.+
32 Baloson ni Jahowa do si Joab alani mudar ni halak na niusehonna i. Ai dang diboto bapakku na dibunu ibana si Abner+ anak ni si Ner pamimpin ni tentara ni Israel+ dohot si Amasa+ anak ni si Jeter pamimpin ni tentara ni Juda.+ Dibunu si Joab do nasida mamakke podang, hape dang marsala nasida jala dumenggan do nasida sian ibana.
33 Ikkon martanggung jawab do si Joab dohot pinopparna di parmate ni si Abner dohot si Amasa saleleng ni lelengna.+ Alai sai anggiat ma ro dame na sian Jahowa tu si Daud, tu pinopparna, tu keluargana, dohot tu harajaonna saleleng ni lelengna.”
34 Dung i lao ma si Benaya anak ni si Jehoyada pamatehon si Joab. Dikubur ma si Joab di labbung ni jabuna na di gurun.
35 Dipillit Raja Salomo ma si Benaya+ anak ni si Jehoyada gabe pamimpin ni tentara manggattihon si Joab. Dipillit raja i ma muse si Sadok+ gabe malim manggattihon si Abiatar.
36 Dung i dijou Raja Salomo ma si Simei.+ Didok ma tu ibana, “Pajongjong ma jabum di Jerusalem jala disi ma ho tinggal. Toktong ma ho disi, unang tinggalhon kota i.
37 Alai molo kaluar ho sian kota on jala ditaripari ho Rura Kidron,+ ikkon pamateon do ho. Ho sandiri ma na martanggung jawab tu hasalaanmi.”*
38 Didok si Simei ma, “Denggan do na nidokmi ale raja. Huulahon pe songon na nidokmi.” Jadi tinggal ma si Simei di Jerusalem manang na piga-piga leleng.
39 Dung salpu tolu taon, lari ma dua parkarejo ni si Simei tu si Akis+ anak ni si Maaka raja ni Gat. Dung i, adong ma na mandok tu si Simei, “Nungnga lari parkarejom tu Gat.”
40 Pittor dipasang si Simei ma palano ni halodena jala lao ma ibana tu Gat mandapotton si Akis mangalului akka parkarejona i. Dung i mulak ma ibana sian Gat jala diboan ma akka parkarejona i.
41 Adong ma na paboahon tu si Salomo naung lao si Simei sian Jerusalem tu Gat, jala nungnga mulak ibana muse.
42 Dijou ma si Simei tu jolo ni Raja Salomo, jala didok raja ma, “Nungnga husuru ho marsumpa di jolo ni Jahowa. Jala nungnga hupasingot ho, molo kaluar ho sian kota on ikkon pamateon do ho. Jala ho sandiri do na mandok tu au, ‘Denggan do na nidokmi ale raja. Huulahon pe songon na nidokmi.’+
43 Alai boasa ma dilanggar ho sumpa na binahenmu tu Jahowa jala dialo ho paretta naung hubahen tu ho?”
44 Didok raja ma tu ibana, “Takkas do diboto ho sude hajahaton na binahenmu tu bapakku si Daud.+ Jala baloson ni Jahowa do tu ho sude hajahatonmi.+
45 Alai pasu-pasuon ni Jahowa ma Raja Salomo+ jala bahenonna ma hot tahta ni si Daud saleleng ni lelengna.”
46 Disuru raja i ma si Benaya anak ni si Jehoyada pamatehon si Simei. Dung i lao ma ibana, jala dibunu ma si Simei.+
Lam hot ma harajaon i dung si Salomo na mamaretta.+
Surat na di toru
^ Manang “Patudu ma na bawa do ho”.
^ As. “Topotokku nama dalan ni sude jolma na di tano on”.
^ Manang “asa marbisuk ho di”.
^ As. “dipeakkon rap dohot akka ompuna”. Puisi lao manggombarhon hamatean.
^ As. “jala tu au do bohi”.
^ As. “jala dipajongjong do sada jabu di au”.
^ Sumpa on patuduhon pasti do ikkon saut janji on, songon pastina Debata mangolu.
^ As. “Marsapata tu ho ma mudarmi”.
