1 Raja-Raja 20:1-43
20 Dung i dipapungu Raja Ben-hadad+ na sian Siria+ ma sude tentarana. Dipapungu ibana ma muse 32 raja na asing rap dohot akka hoda dohot kareta porang ni nasida. Lao ma nasida makkaliangi+ kota Samaria+ jala marporang ma nasida mangalo kota i.
2 Disuru si Ben-hadad ma halak mandok tu si Ahab+ raja ni Israel, “On ma na nidok ni Raja Ben-hadad,
3 ‘Appunakku do perak dohot masmu. Jala appunakku do akka istrim na ubbagak dohot akka anakmu na ungganteng.’”
4 Dialusi raja ni Israel ma, “Tutu do na nidokmi ale raja, appunam do sude na adong di au.”+
5 Disuru Raja Ben-hadad ma muse halak mandok, “On ma na nidok ni Raja Ben-hadad, ‘Nungnga hupaboa hian tu ho asa lehononmu perak, mas, akka istrim dohot akka anakmu tu au.
6 Alai marsogot, hira-hira di tikki sisongon on, suruokku ma muse akka parkarejokku mandapotton ho. Paresoon ni nasida ma jabum dohot jabu ni akka parkarejom lao mambuat sude artam.’”
7 Dipapungu raja ni Israel ma sude pangituai.* Didok ma, “Nungnga diboto hamu, naeng bahenon si Ben-hadad do hita susa. Ai dipangido ibana do akka istriku, akka anakku, perakku, dohot mashu. Jala nungnga sanga huoloi pangidoanna i.”
8 Sude ma akka pangituai dohot akka halak mandok tu si Ahab, “Unang oloi jala unang lean pangidoanna i.”
9 Alani i, didok si Ahab ma tu halak na sinuru ni si Ben-hadad i, “Dokkon ma tu raja i, ‘Huoloi pe pangidoanmu na parjolo i. Alai dang boi huoloi pangidoanmu sisaonari.’” Dung i mulak ma ibana jala dipasahat ma hata ni si Ahab i tu si Ben-hadad.
10 Disuru si Ben-hadad ma muse halak mandok tu si Ahab, “Ruppakkonokku ma kota Samaria. Jala bahenokku ma unggodang akka tentarakku sian orbuk ni kota i, gabe paotikku ma orbuk ni kota i golomon ni akka tentarakku. Sai borat ma au hukumon ni akka debata molo dang hubahen songon i.”
11 Dialusi Raja Ahab ma, “Dokkon ma songon on tu si Ben-hadad, ‘Unang ma anggar jago halak na naeng marporang, songon halak naung monang marporang.’”+
12 Dipaboa ma alus ni Raja Ahab i tu si Ben-hadad. Tikki i, minum-minum do si Ben-hadad rap dohot akka raja na asing di perkemahan ni nasida. Pittor didok ibana ma tu akka tentarana, “Mangarade ma hamu, asa marporang hita!” Dung i mangarade ma nasida lao marporang tu kota Samaria.
13 Ro ma sahalak panurirang* mandok tu Raja Ahab,+ “On ma na nidok ni Jahowa, ‘Diida ho do tentara na massai godang i? Lao pasahatonku do nasida tu tanganmu sadari on. Dung i botoonmu ma, Au do Jahowa,’”+
14 Disukkun si Ahab ma, “Ise ma bahenonmu mangurupi au?” Didok panurirang i ma, “On ma na nidok ni Jahowa, ‘Urupan ni akka tentara ni sude pejabat provinsi do ho.’” Disukkun si Ahab ma muse, “Ise ma na parjolo mamukka porang on?” Dialusi panurirang i ma, “Ho ma na parjolo.”
15 Dung i dietong si Ahab ma sude tentara ni akka pejabat provinsi i, godangna 232 halak. Jala dietong ibana ma muse sude tentara ni Israel, godangna 7.000 halak.
16 Dung borngin, borhat ma nasida. Tikki i, mabuk do si Ben-hadad rap dohot 32 raja na mangurupi ibana di perkemahan ni nasida.
17 Dung i kaluar ma parjolo akka tentara ni pejabat provinsi i sian kota Samaria. Disuru si Ben-hadad ma akka tentarana mangida. Didok tentarana i ma tu si Ben-hadad, “Adong halak na kaluar sian Samaria.”
18 Didok si Ben-hadad ma, “Atik na lao mardame manang na lao marporang pe nasida, takkup ma nasida!”
19 Alai dung kaluar akka tentara ni pejabat provinsi i dohot akka tentara i sian kota Samaria,
20 dibunu nasida ma halak Siria. Lari ma halak Siria,+ alai dilele halak Israel do nasida. Lari ma si Ben-hadad raja ni Siria i mamakke hoda rap dohot akka tentara na marhoda.
21 Alai dilele raja ni Israel ma nasida. Ditaluhon ma akka tentara na marhoda dohot na mamakke kareta porang. Godang ma tentara ni Siria na dipamate.
22 Di pudian ni ari, ro ma muse panurirang i+ mandapotton raja ni Israel. Didok ma, “Pagogo ma partahananmu jala pikkirhon ma aha na lao sibahenonmu.+ Ai ro do muse raja ni Siria lao mamorangi ho di mula ni taon na naeng ro.”*+
23 Didok akka penasehat ni raja i ma tu si Ben-hadad, “Di akka dolok do tinggal Debata ni nasida. Alani i do monang nasida. Alai molo di gurun do hita marporang, talu ma nasida.
24 Asing ni i, unang be bahen akka raja i gabe komandan ni akka tentara i.+ Bahen ma akka gubernur gatti ni nasida.
25 Dung i papungu* ma akka tentara songon godang ni tentaram naung mate i. Songon i ma muse bahen tu akka hoda dohot kareta porang. Jala ikkon di gurun do alootta halak Israel asa monang hita.” Dioloi si Ben-hadad ma na nidok ni penasehatna i.
26 Di mula ni taon na mangihut,* dipapungu si Ben-hadad ma halak Siria. Lao ma nasida tu Apek+ marporang mangalo halak Israel.
27 Songon i ma nang halak Israel. Marpungu ma nasida jala diboan nasida do sipanganon. Lao ma nasida mangalo halak Siria. Markemah ma nasida di jolo ni halak Siria. Songon dua punguan ni hambing ma nasida martimbakkon halak Siria. Ai godang do halak Siria di gurun i jala rarak do nasida disi.+
28 Dung i ro ma panurirang ni Debata na sittong mandapotton raja ni Israel. Didok ma, “On ma na nidok ni Jahowa, ‘Didok halak Siria do Au Jahowa, Debata na tinggal di akka dolok, jala dang tinggal Au di rura. Alani i, pasahatonku ma tentara ni nasida na godang i tu tanganmu.+ Dung i botoonmu ma, Au do Jahowa.’”+
29 Saleleng pitu ari ma nasida markemah masiadop-adopan. Di ari na papituhon, marporang ma nasida. Di bagasan sadari, dipamate halak Israel ma 100.000 tentara ni Siria na mardalan pat.
30 Alai adong do akka tentara ni Siria na lari tu bagasan kota Apek.+ Hape maruppak ma tembok ni kota i manipa 27.000 tentara ni Siria. Dohot do si Ben-hadad lari tu bagasan ni kota i. Jala martabuni do ibana di bagasan sada kamar.
31 Didok akka tentarana ma tu si Ben-hadad, “Halak na parasi roha* do hubege hami akka raja ni Israel. Loas ma hami manjuppangi raja ni Israel huhut marabit goni jala martali-tali rukkungnami.* Anggiat ma dipalua ibana ho.”+
32 Dung i ro ma tentara ni si Ben-hadad mandapotton raja ni Israel huhut marabit goni jala martali-tali rukkung ni nasida. Didok nasida ma, “Didok si Ben-hadad naposom, unang ma pamate ibana.” Didok Raja Ahab ma, “Ai mangolu dope ibana? Ale-alekku do i.”
33 Ala denggan hata ni si Ahab dibege nasida, gabe porsea ma nasida. Didok nasida ma, “Ale-alem do tutu si Ben-hadad.” Didok si Ahab ma, “Lao ma hamu, alap hamu ma ibana.” Dung i didapotton si Ben-hadad ma Raja Ahab, jala ditogihon si Ahab ma ibana nakkok tu kareta porangna.
34 Didok si Ben-hadad ma tu si Ahab, “Hupaulak pe akka kota naung dibuat bapakku sian bapakmu. Jala boi do pillitonmu akka dalan di Damaskus na gabe inganan partiga-tigaanmu, songon na binahen ni bapakku hian di Samaria.”
Didok si Ahab ma, “Alani hatamon,* hupalua pe ho.”
Dung i dibahen nasida ma parjanjian jala diloas ma si Ben-hadad lao.
35 Disuru Jahowa ma sahalak pinoppar ni panurirang*+ mandok tu donganna, “Attuk jo au poang.” Alai dang olo donganna i mangattuk ibana.
36 Gabe didok pinoppar ni panurirang i ma tu donganna i, “Disi lao ho sian on, pamateon ni singa ma ho. Ai dang ditangihon ho hata ni Jahowa.” Dung i lao ma donganna i, diroro singa ma ibana. Gabe mate ma ibana.
37 Didok pinoppar ni panurirang i ma muse tu na asing, “Attuk jo au poang.” Diattuk bawa i ma ibana sappe luka.
38 Dung i, dililitton panurirang i ma abit-abit lao manutup matana asa unang ditanda halak ibana. Lao ma ibana tu pinggir ni dalan paimahon Raja Ahab.
39 Tikki lewat raja i, dijou panurirang i ma raja i. Didok ma, “Tikki di parporangan naposomon, adong ma sahalak tentara na pasahatton sahalak tawanan tu au. Didok tentara i ma, ‘Jaga jo tawanan on. Molo malua ibana, ikkon pamateon do ho gattina.+ Molo dang, ikkon gararonmu ma sada talenta* perak.’
40 Hape tikki i, godang ma ulaon ni naposomon. Gabe malua ma tawanan i.” Didok raja i ma, “Attong ikkon dihukum ma ho songon na nidokmi. Ai ho sandiri do na mambahen ho dihukum.”
41 Pittor dibukka panurirang i ma abit-abit na di matana i. Gabe diboto raja i ma na sahalak panurirang do ibana.+
42 Didok panurirang i ma tu si Ahab, “On ma na nidok ni Jahowa, ‘Nungnga hudok asa pamateonmu si Ben-hadad. Hape dipalua ho do ibana.+ Alani i, ikkon mate do ho manggattihon ibana.+ Jala ikkon mate do rakyatmu manggattihon rakyatna.’”+
43 Mulak ma raja i tu Samaria.+ Jut do rohana jala marsak.
Surat na di toru
^ Olo do ra hira-hira di bulan Maret manang April. Ida Lampiran B15.
^ As. “etong”.
^ Olo do ra hira-hira di bulan Maret manang April. Ida Lampiran B15.
^ As. “martali-tali ulunami”.
^ Manang “Alani parjanjian on”.
^ “Pinoppar ni panurirang” na nidokna boi do ra patuduhon sikkola tu akka panurirang manang punguan ni akka panurirang.
^ 1 talenta = 34,2 kilogram. Ida Lampiran B14.
