1 Samuel 9:1-27
-
Pajuppang si Samuel dohot si Saul (1-27)
9 Adong ma sahalak bawa na margoar si Kis.+ Halak Benjamin+ do ibana, anak ni si Abiel, anak ni si Zeror, anak ni si Behorat, anak ni si Apia. Jala na mora situtu do ibana.
2 Adong do anak ni si Kis na margoar si Saul.+ Poso dope ibana jala ganteng. Ibana ma na ungganteng sian sude halak Israel. Jala ibana ma na untimbo sian sude halak, ai holan nasa pundakna do halak na asing.
3 Tikki mago akka halode* ni si Kis bapak ni si Saul, didok ibana ma tu si Saul anakna i, “Togihon ma sahalak parkarejotta i mandongani ho mangalului akka halodetta i.”
4 Lao ma nasida tu akka huta na di Dolok Epraim dohot luat Salisa, alai dang dapot ni nasida akka halode i. Lao ma nasida tu luat Saalim, alai dang adong disi akka halode i. Lao do nasida tu sude luat ni halak Benjamin, alai dang dapot ni nasida halode i.
5 Dung sahat nasida di luat Sup, didok si Saul ma tu parkarejona i, “Beta, mulak ma hita, sotung gabe ummarsak bapak mamikkiri hita sian akka halode i.”+
6 Alai didok parkarejona i ma, “Adong do sahalak naposo ni Debata di kota on. Diparsangapi do ibana jala sai tutu do masa na nidokna.+ Beta ma tajuppangi ibana. Paboaonna do ra manang na tudia hita lao.”
7 Didok si Saul ma tu parkarejona i, “Molo lao hita manjuppangi ibana, aha ma lehonotta? Dang adong be roti di bagasan tas na taboan on. Dang adong be na boi talehon tu naposo ni Debata na sittong i. Ai dang adong be manang aha di hita.”
8 Didok parkarejona i ma, “Adong dope di au sada hepeng logam* perak. Hulehon pe i tu naposo ni Debata na sittong i asa dipaboa tudia hita lao.”
9 (Najolo, molo naeng mangido tudu-tudu halak Israel sian Debata, songon on ma didok nasida, “Beta ma tajuppangi halak na mandapot parnidaan.”+ Ai najolo, didok do panurirang* i halak na boi mandapot parnidaan.)
10 Didok si Saul ma tu parkarejona i, “Denggan do na nidokmi. Beta, lao ma hita.” Dung i, lao ma nasida tu kota inganan ni naposo ni Debata na sittong i.
11 Tikki mardalan nasida di dalan nakkok-nakkohan na tu kota i, juppang nasida ma akka anak boru na naeng manimba aek. Disukkun nasida ma tu akka anak boru i, “Dison do tahe halak na mandapot parnidaan i?”+
12 Dialusi akka anak boru i ma, “Ido. Baru dope ibana lewat. Pahatop hamu ma asa juppangmuna ibana. Ai ro do ibana tu kota ala naeng mangalehon pelean+ akka halak di langgatan na di dolok-dolok sadari on.+
13 Molo dung sahat hamu tu kota, juppangi hamu ma ibana andorang so nakkok ibana tu dolok-dolok lao mangan. Ai dang mangan akka halak molo so ro dope ibana. Ai ikkon jolo pasu-pasuonna do pelean i, baru pe mangan akka halak. Alani i, pahatop hamu ma asa boi juppangmuna ibana.”
14 Dung i lao ma nasida tu kota i. Dung sahat nasida di kota, kaluar ma si Samuel manjuppangi nasida. Ai naeng nakkok do ibana tu dolok-dolok i.
15 Sadari andorang so ro si Saul, songon on ma didok Jahowa tu* si Samuel,
16 “Marsogot, hira-hira di tikki sisongon on, suruokku ma sahalak sian huta ni halak Benjamin+ manjuppangi ho. Ikkon pillitonmu* do ibana gabe pamimpin ni halak Israel bangsokki.+ Jala paluaonna ma bangsokki sian tangan ni halak Palistim. Ai nungnga huida hasusaan ni bangsokki jala nungnga hubege angguk-angguk ni nasida.”+
17 Tikki diida si Samuel si Saul, didok Jahowa ma tu ibana, “Ibana ma bawa na hea hupaboa tu ho tikki na hudok i, ‘Ibana ma halak na lao mamaretta bangsokki.’”+
18 Dung i, didapotton si Saul ma si Samuel di gerbang jala didok ma, “Didia do jabu ni halak na mandapot parnidaan i amang?”
19 Didok si Samuel ma tu si Saul, “Au do halak na mandapot parnidaan i. Parjolo ma hamu nakkok tu dolok-dolok an asa rap mangan hita sadari on.+ Manogot, hutaruhon pe hamu mulak jala hualusi pe sude sukkun-sukkunmuna.*
20 Unang pola marsak be ho mamikkiri akka halode na mago tolu ari na salpu i.+ Ai nungnga dapot be i. Ai ise haroa nappuna sude arta na di Israel on? Appunam do i dohot appuna ni sude keluarga ni bapakmu.”+
21 Didok si Saul ma, “Boasa didok amang songon i tu au? Marga Benjamin do au, i ma marga na ummetmet sian sude marga ni Israel.+ Jala keluargakku ma na so apala sangap sian sude keluarga ni marga Benjamin.”
22 Dung i ditogihon si Samuel ma si Saul dohot parkarejona mangan. Disuru ma nasida hundul, jala hundulan ni nasida do na ussangap sian sude na ro i. Adong ma hira-hira 30 halak godang ni na ro i.
23 Didok si Samuel ma tu pangaloppa, “Boan ma tuson jagal na hulehon i tu ho, na husuru sippanonmu.”
24 Diboan pangaloppa ma jagal i, i ma hae-haena jala dipeakkon ma di jolo ni si Saul. Didok si Samuel ma, “Allang ma, ai nungnga disippan jagal i lao di ho, asa boi allangonmu saonari. Ai nungnga hupaboa hian tu nasida na lao adong tamukku.” Rap mangan ma si Saul dohot si Samuel di ari i.
25 Dung i turun ma nasida sian dolok-dolok i+ jala lao tu kota. Makkata-hatai ma si Samuel dohot si Saul di atap* ni jabu.
26 Marsogotna i tibu ma nasida dungo. Dung torang ari, dijou si Samuel ma si Saul. Tikki i, di atap ni jabu dope si Saul. Didok si Samuel ma, “Beta, asa hutaruhon ho mulak.” Dung i rap lao ma si Saul dohot si Samuel.
27 Dung mandapotton luar ni kota i nasida, didok si Samuel ma tu si Saul, “Suru ma parjolo lao parkarejomi.”+ Dung i lao ma parjolo parkarejona i. Didok si Samuel ma muse tu si Saul, “Alai dison ma ho, asa hupaboa tu ho na nidok ni Debata.”
Surat na di toru
^ As. “halode boru-boru”.
^ As. “saparopat sekel”. Ida Lampiran B14.
^ As. “nungnga dibukka Jahowa pinggol ni”.
^ As. “jala hupaboa pe tu ho sude na di roham”.
^ Godang jabu atapna dosdos jala somal do disi nasida mangulahon akka ulaon.
