2 Samuel 2:1-32
2 Dung salpu na masa i, disukkun si Daud ma tu Jahowa,+ “Boi do au lao tu sada kota na di Juda?” Dialusi Jahowa ma, “Boi, lao ma ho.” Didok si Daud ma muse, “Tu kota na dia do au lao?” Didok Debata ma, “Tu kota Hebron.”+
2 Dung i, borhat ma si Daud tu kota i. Diboan ibana do istrina na dua i, si Ahinoam+ halak Jisreel i dohot si Abigail+ halak Karmel istri ni si Nabal hian.
3 Diboan si Daud do muse akka halak na mangihutton ibana.+ Jala diboan nasida do akka keluarga ni nasida. Tinggal ma nasida di akka kota na jonok tu Hebron.
4 Dung i ro ma akka halak Juda mandapotton si Daud. Jala dipillit* ma ibana gabe raja ni marga Juda.+
Didok nasida ma tu si Daud, “Akka halak Jabes-gilead do na mangubur si Saul.”
5 Disuru si Daud ma halak mandok tu akka halak Jabes-gilead, “Sai dipasu-pasu Jahowa ma hamu, ala dikubur hamu do si Saul tuanmuna i. Marhite i, dipatudu hamu do holong ni rohamuna* tu si Saul.+
6 Anggiat ma toktong dipatudu Jahowa holong ni rohana* tu hamu. Jala au pe bahenokku ma na denggan tu hamu ala dibahen hamu songon i.+
7 Ikkon togu do hamu jala barani. Nungnga mate si Saul tuanmuna i. Alai, nungnga dipillit* marga Juda au gabe raja ni nasida.”
8 Ro ma si Abner+ anak ni si Ner, pamimpin ni tentara ni si Saul mamboan si Isboset+ anak ni si Saul. Lao ma nasida menyeberang tu Mahanaim.+
9 Dibahen si Abner ma si Isboset gabe raja ni sude halak Israel na di Gilead,+ i ma halak Asyur, halak Jisreel,+ halak Epraim,+ dohot halak Benjamin.
10 Marumur 40 taon ma si Isboset anak ni si Saul tikki gabe raja ni halak Israel. Jala saleleng dua taon ma ibana mamaretta. Alai marpihak tu si Daud do marga Juda.+
11 Saleleng pitu satonga taon ma si Daud mamaretta di Hebron gabe raja ni marga Juda.+
12 Di pudian ni ari, lao ma si Abner anak ni si Ner dohot akka tentara ni si Isboset anak ni si Saul i sian Mahanaim+ tu Gibeon.+
13 Ro ma si Joab+ anak ni si Seruya+ dohot akka tentara ni si Daud mandapotton nasida di kolam paridian na di Gibeon. Hundul ma nasida sude disi. Sapunguan di bariba na sada jala sapunguan nai di bariba na sada nai.
14 Didok si Abner ma tu si Joab, “Tasuru ma akka tentaranta i martarung di jolotta.” Dialusi si Joab ma, “Boi.”
15 Dipillit ma 12 tentara sian marga Benjamin. Tentara ni si Isboset anak ni si Saul do nasida. Jala dipillit ma 12 tentara ni si Daud.
16 Ditarik nasida ma obuk ni alona be jala masitikkaman ma nasida. Gabe rap mate ma nasida sude. Alani i ma digoari inganan na di Gibeon i Helkat-hasurim.
17 Lam tu boratna ma parporangan i di ari i. Alai talu do si Abner dohot tentara ni Israel dibahen tentara ni si Daud.
18 Disi do anak ni si Seruya na tolu i,+ si Joab,+ si Abisai,+ dohot si Asahel.+ Hatop do si Asahel marlojong dos songon kijang na di tombak.
19 Dilele si Asahel ma si Abner, jala dang marnaso ibana mangalele.
20 Diida si Abner ma tu pudi, didok ibana ma, “Ho do i Asahel?” Dialusi si Asahel ma, “Ido.”
21 Dung i didok si Abner ma, “Unang ma sai lele au. Akka tentara i ma lele jala buat ma manang aha na adong di nasida.” Alai torus do dilele si Asahel ibana.
22 Didok si Abner ma muse tu si Asahel, “Unang ma sai lele au. Dang olo au pamatehon ho. Molo mate ho, dang tarbereng au be abangmu si Joab.”
23 Alai sai dilele ibana do si Abner. Gabe ditullang si Abner ma tombakna*+ tu pudi jala hona ma butuha ni si Asahel, pola tombus sahat tu tanggurungna. Mate ma ibana jala peak di inganan i. Jala ganup halak na mardalan sian i, so lao mangida bakke ni si Asahel.
24 Dilele si Joab dohot si Abisai ma si Abner. Dung botari, sahat ma nasida di Dolok Amma. Dolok on adong di dalan na lao tu gurun na di Gibeon, di jolo ni Gia.
25 Dung i, marroan ma halak Benjamin mangihutton si Abner. Marpungu ma nasida jala jongjong di pussu ni sada dolok.
26 Gogo ma didok si Abner tu si Joab, “Torus nama hita masipamatean? Holan parohon jea do on. Dokkon jo tu akka tentarami asa unang sai dilele hami, ai na marhaha maranggi do hita.”
27 Didok si Joab ma, “Songon pastina Debata na sittong mangolu,* autsugari dang didok ho songon i, torus do leleon ni tentarakku hamu sahat tu manogot.”
28 Dung i diombus si Joab ma tarompet na sian tanduk. Gabe so ma akka tentarana mangalele tentara ni halak Israel jala dang marporang be nasida.
29 Mulak ma si Abner dohot akka tentarana. Mardalan pat do nasida saborngin manipat mangalewati Araba.+ Dung i, menyeberang ma nasida sian Sunge Jordan, jala dibolus nasida ma muse sada rura.* Ujungna sahat ma nasida di Mahanaim.+
30 Dung dipaso si Joab mangalele si Abner, dipapungu ibana ma sude tentarana. Gabe diboto ibana ma adong 19 tentara ni si Daud na mate, asing ni si Asahel.
31 Alai nungnga ditaluhon akka tentara ni si Daud be marga Benjamin dohot akka tentara ni si Abner. Dipamate nasida do 360 halak.
32 Diboan si Joab dohot akka tentarana i ma bakke ni si Asahel.+ Dikubur nasida ma i di kuburan ni bapakna di Betlehem.+ Dung i, mardalan ma nasida saborngin manipat, jala dung torang ari sahat ma nasida di Hebron.+
Surat na di toru
^ Manang “hujurna”.
^ Sumpa on patuduhon pasti do ikkon saut janji on, songon pastina Debata mangolu.
^ Manang boi do “saluhut luat Biteron”.
