4 Musa 14:1-45
14 Dung i, gogo ma mangangguki sude halak Israel di na saborngin i.+
2 Marungut-ungut ma sude halak Israel i tu si Musa dohot tu si Aron.+ Didok nasida ma, “Tumagonan ma hami mate di Mesir manang mate di gurun on!
3 Boasa ma pola diboan Jahowa hami tu luat i? Asa pamateonna do hami pakke podang?+ Asa boanon ni musu do istri dohot ianakkonnami?+ Tumagon ma hami mulak tu Mesir!”+
4 Didok nasida ma sama nasida, “Beta, tapillit ma sada pamimpin di hita, asa mulak hita tu Mesir!”+
5 Alani hata ni nasida i, marsinggang ma si Musa dohot si Aron di jolo ni sude halak Israel.
6 Dung i, ro ma si Josua+ anak ni si Nun dohot si Kaleb+ anak ni si Jepune na dohot gabe mata-mata tu luat i. Diribak nasida ma baju ni nasida.
7 Jala didok nasida ma tu halak Israel, “Massai denggan situtu do+ luat na humata-matai hami i.
8 Molo lomo do roha ni Jahowa mangida hita, boanonna do hita tu luat i. Jala lehononna do luat i tu hita, i ma luat na godang susu dohot madu.+
9 Alai unang mangalo hamu tu Jahowa. Jala unang pola mabiar hamu tu akka halak na di luat i.+ Mura do tataluhon nasida,* ai so adong na manjaga nasida. Alai molo hita, donganan ni Jahowa do hita.+ Alani i, unang pola mabiar hamu tu nasida.”
10 Gabe naeng didangguri bangso i ma nasida.+ Alai toppu ma diida bangso i marsinondang hamuliaon ni Jahowa di atas ni kemah parpunguan i.+
11 Dung i didok Jahowa ma tu si Musa, “Sadia leleng nai dang diargai bangso on Au?+ Jala sadia leleng nai dang porsea nasida tu Au? Hape nungnga godang hubahen akka tanda halongangan* di jolo ni nasida.+
12 Lok ma huparo sahit na masa di godang inganan, asa mate nasida sude. Jala tumagon ma pinopparmu hubahen gabe bangso na umbalga jala na umgogo sian nasida.”+
13 Alai didok si Musa ma tu Jahowa, “Nungnga pola dipatuduhon Ho huasom lao pakaluarhon bangsomon sian Mesir. Molo dibahen Ho do songon i, jala dibege halak Mesir i,+
14 paboaon ni nasida ma i tu akka halak na di luat i. Hape nungnga dibege nasida na Ho do Jahowa na mandongani bangso on,+ jala naung takkas dipaboa Ho dirim tu bangsomon.+ Nungnga dibege nasida Ho do Jahowa na mambahen ombun* di jolo ni nasida, na mardalan di jolo ni nasida di bagasan ombun di tikki arian, jala di bagasan api* di tikki borngin.+
15 Molo sahali sude do dipamate Ho bangso on, dohonon ni akka bangso naung mambege hasangaponmi ma songon on,
16 ‘Ai dang sanggup Jahowa i mamboan bangsona tu luat naung dijanjihon Ibana hian lao lehononna tu nasida. Alani i do dipamate Ibana nasida di gurun.’+
17 Saonari, mangelek ma au tu Ho ale Jahowa, pataridahon ma huasom na balga i songon naung hea dijanjihon Ho. Ai didok Ho do,
18 ‘Au do Jahowa na lambat tarrimas, jala gok holong ni roha*+ do Au. Husesa do hasalaan ni halak, dohot hajahatonna. Alai dang pasombuonku dang dihukum halak na jahat. Ai manang ise na mangulahon na jahat, hona hukum do hubahen. Jala hupasombu do anakna, pahoppuna, dohot ninina manaon hasusaan alani dosana i.’+
19 Alani i, patudu ma holong ni roham* na massai balga i, salpuhon ma hasalaan ni bangso on songon naung dibahen Ho tu bangso on mulai sian tikki di Mesir sahat tu saonari.”+
20 Didok Jahowa ma, “Husalpuhon pe dosa ni nasida songon pangidoanmi.+
21 Alai nang pe songon i, songon pastina Au mangolu,* pasti gok do sogot hamuliaon ni Jahowa di liat portibi on.+
22 Alai dang adong nanggo sada pe sian halak naung mangida hasangapokki, dohot tanda halongangan+ naung hubahen di Mesir dohot di gurun, na toktong dope mulak-ulak manguji Au,+ jala dang olo manangihon hatakku,+
23 dang adong sian nasida na boi mangida luat naung hujanjihon i tu akka ompu ni nasida. Dang adong nanggo sahalak pe sian akka halak na so pasangappon Au i, na lao mangida luat i.+
24 Alai anggo si Kaleb naposokki,+ asing do rohana sian na asing. Torus do diihutton ibana Au sian nasa rohana. Alani i, boanokku do ibana tu luat naung didalani ibana i, jala gabe appuna ni pinopparna ma tano i.+
25 Marsogot, marbalik ma hamu muse doppak gurun pasir mardalan lewat sian dalan na tu Laut Merah.+ Ai di rura do halak Amalek dohot halak Kanaan+ maringanan.”
26 Dung i, didok Jahowa ma muse tu si Musa dohot tu si Aron,
27 “Sadia leleng nai marungut-ungut bangso na jahat on tu Au?+ Nungnga massai godang hubege ungut-ungut ni nasida.+
28 Dokkon ma tu nasida, ‘“Songon pastina Au mangolu,” ninna Jahowa, “Songon hatamuna i do bahenokku tu hamu!+
29 Marragean ma bahenokku bakke+ ni akka halak na marumur 20 taon tu ginjang, jala naung tardaftar, na sai marungut-ungut tu Au di gurun on.+
30 Dang adong nanggo sada pe sian hamu na boi sahat tu luat naung hujanjihon lao ingananmuna,+ asing ni si Kaleb anak ni si Jepune dohot si Josua anak ni si Nun.+
31 “‘“Didok hamu do na lao boanon ni musu akka ianakkonmu.+ Alai nasida ma na lao boanokku masuk tu luat i. Nasida ma na lao mangida luat i. Ai lea do rohamuna mangida luat i.+
32 Alai bahenokku ma marragean bakkemuna di gurun on.
33 Gabe parmahan ma akka ianakkonmuna di gurun on saleleng 40 taon.+ Ai dang setia hamu.* Alani i, nasida ma na martanggung jawab tu pambahenanmuna, sahat tu na mate halak na parpudi sian hamu di gurun on.+
34 Nungnga dimata-matai hamu luat i saleleng 40 ari.+ Alani i, ikkon martanggung jawab ma hamu tu hasalaanmuna i saleleng 40 taon.+ Sataon ma gatti ni sadari, asa diboto hamu akibatna molo dialo hamu Au.*
35 “‘“On ma na lao bahenokku tu bangso na jahat on, na marsada mangalo Au: Di gurun on ma ujung ni ngolu ni nasida, dison ma nasida mate.+ Au do Jahowa na mandokkon i.
36 Jala akka bawa na sinuru ni si Musa gabe mata-mata tu luat i, na mambahen marungut-ungut bangso i tu ibana, i ma akka bawa na paboahon barita na so tutu taringot tu luat i dung mulak nasida,+
37 ikkon dipamate do nasida. Au do Jahowa na manghukum jala na pamatehon sude akka bawa na paboahon akka barita na roa taringot tu luat i.+
38 Alai anggo si Josua anak ni si Nun dohot si Kaleb anak ni si Jepune na dohot gabe mata-mata mamareso luat i, toktong do nasida mangolu.”’”+
39 Tikki dipaboa si Musa sude hata i tu halak Israel, marsak situtu ma nasida jala mangangguki.
40 Alai manogot nai, tibu ma nasida dungo jala lao ma nasida tu pussu ni dolok. Didok nasida ma, “Nungnga mardosa be hami.+ Alai saonari, rade do hami lao tu luat na nidok ni Jahowa i.”
41 Didok si Musa ma, “Boasa dang dioloi hamu paretta ni Jahowa? Dang na lao marhasil hamu.
42 Unang pola lao hamu. Ai dang didongani Jahowa hamu. Talu do hamu annon bahenon ni musu.+
43 Halak Amalek dohot halak Kanaan do disi alomuna.+ Jala pamateon ni nasida ma hamu pakke podang. Ai dang diihutton hamu be Jahowa. Alani i, dang didongani Jahowa be hamu.”+
44 Nang pe songon i, dijugulhon nasida do lao tu pussu ni dolok i.+ Alai, anggo si Musa dohot poti parpadanan ni Jahowa, toktong do di tonga-tonga ni perkemahan i, dang meret nasida sian i.+
45 Dung i, turun ma halak Amalek dohot halak Kanaan na tinggal di dolok i. Ditaluhon ma halak Israel i. Gabe marlarian ma nasida sahat tu Horma.+
Surat na di toru
^ As. “Songon roti do nasida di hita”.
^ Manang “mukjizat”.
^ Di bahasa Heber, api na nidokna dison i ma api na bentukna songon tiang.
^ Di bahasa Heber, ombun na nidokna dison i ma ombun na bentukna songon tiang.
^ Sumpa on patuduhon pasti do ikkon saut janji on, songon pastina Debata mangolu.
^ Manang “Ai dang setia hamu tu Debata songon boru-boru na so hasea”.
^ Manang “molo dibahen hamu Au gabe musumuna”.
