4 Musa 6:1-27
6 Dung i didok Jahowa ma muse tu si Musa,
2 “Songon on ma dokkon tu halak Israel, ‘Molo adong sahalak bawa manang borua na marjanji lao gabe halak Nasir*+ tu Jahowa,
3 dang boi inumonna anggur dohot akka siinumon na asing na maralkohol. Dang boi inumonna cuka anggur, manang cuka aha pe na maralkohol.+ Dang boi inumonna siinumon na dibahen sian buah anggur, jala dang boi allangonna buah anggur naung dipakoring manang na baru dibuat.
4 Saleleng gabe halak Nasir ibana, dang boi allangonna siallangon na dibahen sian buah anggur, dohot ma i buah anggur na tata dope manang holan kulitna.
5 “‘Saleleng diulahon ibana janjina gabe halak Nasir, dang boi gustingonna obukna.+ Ikkon toktong do ibana badia, jala ikkon pasombuonna ganjang obukna sahat tu na sae tikkina ibana dipapulik tu Jahowa.
6 Saleleng dipapulik ibana tu Jahowa, dang boi ibana jonok tu bakke ni halak* na mate.
7 Dang boi ibana jonok tu halak na mate, nang pe na mate i omakna manang bapakna, abangna manang adekna manang ibotona. Ai nungnga dipasombu ibana obukna ganjang lao gabe tanda na halak Nasir ibana. Alani i, dang boi bahenonna ramun* dirina.+
8 “‘Saleleng gabe halak Nasir ibana, badia do ibana di Jahowa.
9 Alai molo adong na mate toppu di labbungna,+ jala gabe ramun obukna i, i ma tanda naung dipapulik ibana tu Debata,* ikkon gustingonna do obukna i+ di ari na papituhon. Ai di ari i do dipaboa tu godang halak na so ramun be ibana.
10 Di ari na paualuhon, ikkon boanonna do dua anduhur manang dua anak ni darapati tu malim di jolo ni pintu kemah parpunguan.
11 Dipelehon malim ma sada pidong i gabe pelean hasesaan ni dosa, jala na sada nai gabe pelean situtungon. Ikkon dipangido malim do tu Debata asa disesa dosana.+ Ai nungnga mardosa ibana alani halak na mate i. Dung i, ikkon dipabadia ibana do dirina* di ari i jala pasombuonna ma tubu obukna.
12 Ikkon papulikonna ma muse dirina tu Jahowa gabe halak Nasir. Jala ikkon boanonna do sada biru-biru jantan na marumur sataon manang hurang lao gabe pelean hasalaanna. Alai gabe dang masuk kira be akka ari naung hea didalani ibana gabe sahalak Nasir. Ai nungnga sanga ramun ibana.
13 “‘On ma patik taringot tu halak Nasir: Molo dung sae sude ari naung dijanjihon ibana lao gabe sahalak Nasir,+ ikkon diboan do ibana tu pintu kemah parpunguan.
14 Disi, ikkon dipelehon ibana do tu Jahowa sada biru-biru jantan na sehat, na marumur sataon manang hurang lao gabe pelean situtungon,+ sada biru-biru boru-boru na sehat marumur sataon manang hurang lao gabe pelean hasesaan ni dosa,+ dohot sada biru-biru jantan na sehat lao gabe pelean pardamean.*+
15 Ikkon dipelehon ibana do muse sakaranjang roti na so marragi na marbentuk golang, na dibahen sian topung na halus na dicampur dohot miak, roti na tipis na so marragi na diolesi dohot miak, pelean sipanganon,*+ dohot pelean siinumon.+
16 Ikkon diboan malim ma sudena i tu jolo ni Jahowa jala dipelehon ibana ma pelean hasesaan ni dosa dohot pelean situtungonna.
17 Dipelehon malim ma biru-biru jantan i gabe pelean pardamean tu Jahowa rap dohot roti na so marragi na sakaranjang i. Ikkon dipelehon malim do muse pelean sipanganon+ dohot pelean siinumon.
18 “‘Ikkon dicukkur halak Nasir i do obukna+ na gabe tanda halak Nasir ibana. Dicukkur ma i di pintu kemah parpunguan. Dung i dibuat ma obukna naung dicukkur i,* jala ditutung ma i tu api na di toru ni pelean pardamean i.
19 Buaton ni malim ma sada hae-hae bagian jolo ni biru-biru jantan naung dirobus.+ Dibuat ma muse sada roti na so marragi na marbentuk golang sian karanjang i, dohot sada roti na tipis na so marragi. Alani i, dung dicukkur obukna na gabe tanda na halak Nasir ibana, dipeakkon ma sudena i tu tangan ni halak Nasir i.
20 Diayun-ayunhon malim ma i tu pudi dohot tu jolo gabe pelean na diayunhon di jolo ni Jahowa.+ Badia do sudena i jala bagian ni malim do i, dohot ma i andora na sian pelean na diayunhon i dohot pat na gabe bagian na badia i.+ Dung i, boi ma minum anggur halak Nasir i.
21 “‘On ma patik taringot tu halak Nasir+ na mambahen janji: Molo marjanji ibana na boi lehononna pelean tu Jahowa lobi sian na dipangido tu halak Nasir, ikkon pasautonna do janjina i mangihutton patik taringot tu halak Nasir.’”
22 Dung i didok Jahowa ma tu si Musa,
23 “Songon on ma dok tu si Aron dohot tu akka anakna, ‘Ikkon songon on do dohononmuna tikki lao mangido pasu-pasu+ sian Debata tu halak Israel:
24 “Sai anggiat ma dipasu-pasu Jahowa hamu+ jala dijaga Ibana hamu.
25 Sai anggiat ma las roha ni Jahowa mangida hamu,+ jala sai anggiat ma asi rohana tu hamu.
26 Sai anggiat ma dipatudu Jahowa burju ni rohana tu hamu jala dilehon dame tu hamu.”’+
27 Tikki mangido pasu-pasu nasida, ikkon dipakke do goarhu asa hupasu-pasu+ halak Israel i.”+
Surat na di toru
^ Lapatanna, “Halak na Dipapulik”.
^ Manang “gabe ramun ma uluna na gabe tanda halak Nasir ibana”.
^ As. “uluna”.
^ Manang “obukna na gabe tanda halak Nasir ibana”.
