5 Musa 1:1-46
1 Songon on ma hata ni si Musa tu halak Israel tikki nasida di gurun na di luat Jordan na di jolo ni Sup, di holang-kolang ni Elaparan, Topel, Laban, Hazerot, dohot Disahab.
2 Molo lewat sian dalan na tu Dolok Seir, 11 ari ma leleng ni pardalanan sian Horeb tu Kades-barnea.+
3 Di ari na parjolo, di bulan na pasappulu sadahon, di taon na paopat puluhon,*+ makkatai ma si Musa tu halak Israel. Dipaboa ibana ma tu nasida sude paretta ni Jahowa.
4 Dipaboa si Musa ma i dung ditaluhon nasida si Sihon+ raja ni halak Amori na tinggal di Hesbon dohot si Og+ raja ni Basan na tinggal di Astarot, di Edrei.+
5 Dipaboa si Musa ma akka Patik ni Debata+ on tu nasida tikki di sabola timur ni Jordan na di luat Moab nasida. Didok ma,
6 “Tikki di Horeb, didok Jahowa Debatanta i do tu hita, ‘Nungnga leleng hamu tinggal di inganan na mardolok-dolok on.+
7 Parade hamu ma dirimuna jala borhat ma hamu tu inganan na mardolok-dolok na di luat ni halak Amori+ dohot tu sude luat na di sakalilingna na di Araba,+ na di inganan na mardolok-dolok, di Syefela, di Negeb, dohot di topi ni laut+ huta ni halak Kanaan dohot di Libanon*+ sahat tu sunge na balga, i ma Sunge Euprat i.+
8 Nungnga huparade luat i lao di hamu. Alani i, lao ma hamu jala buat hamu ma luat i gabe appunamuna. Buat hamu ma luat na dijanjihon Jahowa tu akka ompumuna, tu si Abraham, si Isak,+ dohot si Jakkob.+ Ai marjanji do Ibana tu nasida na lao lehononna i tu nasida dohot tu pinoppar ni nasida.’+
9 “Jala di tikki i, hudok do tu hamu, ‘Dang sanggup sahalakku mamimpin hamu.+
10 Nungnga dibahen Jahowa Debatamuna hamu massai godang, jala saonari nungnga songon godang ni bintang na di langit godangmuna.+
11 Sai anggiat ma dibahen Jahowa Debata ni ompumuna i hamu lam marlipat ganda godangna,+ sahat tu saribu hali lompit godangna sian na saonari on. Jala sai anggiat ma dipasu-pasu Ibana hamu songon janjina i.+
12 Alai boha ma bahenokku mananggung bobanmuna na borat i, dohot pasaehon parsoalanmuna?+
13 Alani i, pillit hamu ma akka bawa na malo, na marbisuk, jala na marpengalaman sian sude margamuna. Dung i, hulantik ma nasida gabe pamimpin di hamu.’+
14 Jala didok hamu do tu au, ‘Denggan do na nidokmi.’
15 Alani i, hulantik ma akka pamimpin ni margamuna, i ma akka bawa na malo jala na marpengalaman gabe pamimpin di hamu. Hulantik ma nasida gabe pamimpin ni na sasaribu, pamimpin ni na sasaratus, pamimpin ni na lima pulu, dohot pamimpin ni sappulu halak. Jala nasida ma na gabe pengawas di akka margamuna.+
16 “Tikki i, hudok ma tu akka hakimmuna, ‘Ikkon tigor do hamu mangadili+ donganmu sabangso, i ma tikki adong parsoalanna dohot donganna sabangso manang dohot halak na sian bangso na asing.+
17 Unang mamihak hamu tu manang ise pe tikki mangadili.+ Ikkon ditangihon hamu do parsoalan ni halak na so sangap dohot na sangap.+ Unang mabiar hamu tu manang ise pe,+ ai na gabe wakil ni Debata do hamu tikki mangadili.+ Molo maol hamu pasaehon parsoalan i, paboa hamu ma tu au, asa hutangihon parsoalan i.’+
18 Di tikki i, hupaboa ma tu hamu sude na ikkon ulahononmuna.
19 “Dung i, songon na diparettahon Jahowa Debatanta i, borhat ma hita sian Horeb. Mardalan ma hita sian gurun na bidang na mambahen hita mabiar.+ Nungnga diida hamu hian gurun i tikki mardalan hamu sian dalan na tu luat ni halak Amori, na di inganan na mardolok-dolok.+ Ujungna, sahat ma hita di Kades-barnea.+
20 Hudok ma tu hamu, ‘Nungnga sahat be hamu di inganan na mardolok-dolok, di luat ni halak Amori, na dilehon Jahowa Debatanta i tu hita.
21 Ida ma! Nungnga dilehon Jahowa Debatamuna luat i tu hamu. Lao ma hamu, buat hamu ma i gabe appunamuna, songon na nidok ni Jahowa Debata ni akka ompumuna tu hamu.+ Unang pola mabiar hamu jala unang pola ganggu rohamuna.’
22 “Alai ro do hamu sude manjuppangi au. Didok hamu ma, ‘Tasuru ma piga-piga halak mamareso luat i, asa dipaboa nasida tu hita sian dalan na dia do na ikkon tadalani. Jala songon dia do akka kota na lao tataluhon i.’+
23 Denggan do di rohakku na nidokmuna i. Alani i, hupillit ma 12 bawa, sada sian ganup marga.+
24 Dung i borhat ma nasida tu inganan na mardolok-dolok+ jala sahat ma nasida di Rura* Eskol. Dipareso nasida ma luat i sian i.
25 Diboan nasida ma sian luat i akka parbue ni hau. Jala didok nasida do, ‘Massai denggan do luat na lao lehonon ni Jahowa Debatanta i tu hita.’+
26 Alai dang olo hamu lao tu luat i. Dialo hamu do paretta ni Jahowa Debatamuna.+
27 Sai marungut-ungut do hamu di kemahmuna jala didok hamu do, ‘Na sogo do roha ni Jahowa tu hita umbahen na diboan hita kaluar sian Mesir. Na lao pasahatonna do hita tu tangan ni halak Amori, asa dipamate nasida hita.
28 Ai lao tu inganan na songon dia do huroa hita? Dibahen akka haha anggitta i do hita mabiar.+ Ai didok nasida do, “Umbalga do halak na disi sian hita jala untimbo. Akka kota ni nasida pe balga do jala timbo-timbo do tembokna, pola sahat tu langit.+ Huida hami do muse disi akka halak Anakim.”’+
29 “Alani i, hudok ma tu hamu, ‘Unang pola ganggu rohamuna, jala unang pola mabiar hamu alani hata ni nasida i.+
30 Jahowa Debatamuna i do na mardalan di jolomuna. Ibana do na marporang humokkop hamu,+ songon naung hea dibahen Ibana di jolomuna tikki di Mesir.+
31 Jala diida hamu do songon dia Jahowa Debatamuna mamboan hamu saleleng di padang gurun on. Diboan Ibana do hamu songon sahalak ama na mamboan anakna. Songon i do dibahen Ibana tu hamu manang na tudia pe hamu lao sappe sahat hamu tu inganan on.’
32 Alai nang pe nungnga dibahen Ibana songon i, dang porsea hamu tu Jahowa Debatamuna,+
33 na mardalan di jolomuna lao mangalului ingananmuna markemah. Ditogu-togu Ibana do hamu marhite api* di tikki borngin jala marhite ombun* di tikki arian, asa diboto hamu dalan sidalananmuna.+
34 “Saleleng na masa i, dibege Jahowa do akka hatamuna i. Gabe muruk ma Ibana jala marsumpa.+ Didok Ibana ma,
35 ‘Dang adong nanggo sahalak pe sian nasida* na jahat on, na lao mangida luat na denggan, naung hujanjihon i lao lehonokku tu akka ompumuna,+
36 asing ni si Kaleb anak ni si Jepune. Idaonna do luat naung didalani ibana i, jala lehonokku do luat i tu ibana dohot tu pinopparna. Ai diihutton ibana do Jahowa sian nasa rohana.+
37 (Jala alani hamu, muruk do Jahowa tu au. Didok do, “Ho pe, dang boi masuk tu luat i.+
38 Alai si Josua anak ni si Nun, na mangurupi ho i+ do na lao masuk tu luat i.+ Patogu ma ibana.*+ Ai ibana do na lao mamimpin halak Israel mambuat luat i.”)
39 Alai anggo taringot tu akka anakkonmuna na didok hamu lao boanon ni akka musu,+ jala na so mamboto dia na denggan dohot na roa saonari on, nasida ma na lao masuk tu luat i. Lehonokku ma luat i tu nasida.+
40 Anggo hamu, mamutar ma hamu muse tu gurun, mardalan lewat sian dalan na tu Laut Merah.’+
41 “Dung i didok hamu ma tu au, ‘Nungnga mardosa hami tu Jahowa. Saonari, lao pe hami marporang, songon na diparettahon Jahowa tu hami!’ Sude ma hamu mamboan akka sinjata lao marporang, jala dirippu hamu do mura nakkok tu dolok i.+
42 Alai didok Jahowa ma tu au, ‘Paboa ma tu nasida, “Unang lao hamu marporang, ai dang donganakku hamu.+ Molo lao hamu, talu do hamu bahenon ni musu.”’
43 Hupaboa ma i tu hamu, alai dang ditangihon hamu. Dialo hamu do paretta ni Jahowa. Jala lao do hamu tu dolok i alani ginjang ni rohamuna.
44 Dung i, kaluar ma halak Amori na tinggal di dolok i mangalo hamu. Songon loba* do nasida mangalele hamu. Gabe marlarian ma hamu jala marserak di Seir sahat tu Horma.
45 Mulak ma hamu muse jala mangandungi di jolo ni Jahowa. Alai dang ditangihon Jahowa hamu jala dang diparrohahon.
46 Alani i do umbahen na leleng situtu hamu tinggal di Kades.
Surat na di toru
^ Na nidokna, i ma 40 taon dung kaluar sian Mesir.
^ Ra na nidokna, i ma inganan na mardolok-dolok na di Libanon.
^ Di bahasa Heber, ombun na nidokna dison, i ma ombun na bentukna songon tiang.
^ Di bahasa Heber, api na nidokna dison, i ma api na bentukna songon tiang.
^ Manang “sian sundut”.
^ Manang boi do “Nungnga dibahen Debata ibana togu”.
^ Manang “harinuan”.
