5 Musa 20:1-20
20 “Molo marporang hamu mangalo musu, jala diida hamu unggodang hoda, kareta porang, dohot tentara ni nasida sian hamu, unang pola mabiar hamu. Ai Jahowa Debatamuna i do na mandongani hamu, i ma na mamboan hamu kaluar sian Mesir.+
2 Andorang so lao hamu marporang, ikkon jolo ro do malim jala ikkon makkatai do ibana tu hamu.+
3 Dohononna ma songon on, ‘Ale Israel, tangihon hamu ma, satokkin nai, borhat nama hamu marporang mangalo musu. Unang pola gale rohamuna. Unang mabiar hamu, unang ganggu roham, manang unang humitir rohamuna alani nasida.
4 Ai Jahowa Debatamuna i do na mardalan rap dohot hamu. Ibana do na marporang mangalo musumuna jala paluahon hamu.’+
5 “Ikkon dokkonon ni komandan tentara do songon on, ‘Adong do sian hamu na baru mambangun jabu alai dang hea dope diingani? Molo adong, lok ma mulak ibana tu jabuna i. Ai molo mate ibana di parporangan, halak na asing nama na mangingani jabu i.
6 Adong do sian hamu na manuan anggur di ladang alai dang dope dipanen hamu parbuena? Molo adong, lok ma mulak ibana tu jabuna. Ai molo mate ibana di parporangan, halak na asing nama na mambuat parbuena.
7 Adong do sian hamu na martunangan dohot sahalak borua, alai dang dibuat dope borua i gabe istrina? Molo adong, lok ma mulak ibana tu jabuna.+ Ai molo mate ibana di parporangan, halak na asing nama na mambuat borua i gabe istrina.’
8 Ikkon sukkunon ni komandan tentara i do muse songon on, ‘Adong do sian hamu na mabiar jala na mulai ganggu rohana?+ Ikkon mulak do ibana tu jabuna asa unang dibahen ibana akka donganna i mabiar songon ibana.’+
9 Molo dung sae makkatai akka komandan i, ikkon pilliton ni nasida do akka pamimpin ni tentara.
10 “Molo nungnga jonok hamu tu sada kota lao marporang dohot halak na disi, ikkon jolo paboaonmuna do tu nasida cara lao mardame.+
11 Molo olo do nasida mangulahon cara na pinaboamuna i, jala olo nasida mambukka gerbang ni kotana tu hamu, bahenonmuna ma sude halak na disi gabe hatobanmuna, appunamuna ma nasida jala karejo ma nasida tu hamu.+
12 Alai molo dang olo halak na di kota i mardame dohot hamu, jala naeng marporang nasida mangalo hamu, ikkon dikepung jala diserang hamu do kota i.
13 Pasti lehonon ni Jahowa Debatamuna i do kota i tu tanganmuna, ikkon pamateonmuna do sude bawa na di kota i mamakke podang.
14 Alai boi do buatonmuna akka borua, dakdanak, binatang na dipiaro nasida, manang aha pe na adong di kota i, dohot sude arta ni nasida.+ Boi do pakkeonmuna sude na dibuat hamu sian akka musumuna i, i ma akka na dilehon Jahowa Debatamuna tu hamu.+
15 “Songon i ma na ikkon diulahon hamu tu sude kota na dao sian hamu, i ma kota na so appuna ni akka bangso na jonok tu hamu.
16 Alai dang boi pasombuonmuna mangolu sude+ jolma* na adong di akka kota na di luat ni akka bangso on, i ma luat ni akka bangso na lao lehonon ni Jahowa Debatamuna i gabe appunamuna.
17 Ikkon pamateonmuna do nasida sude. Ikkon dipamate hamu do halak Het, halak Amori, halak Kanaan, halak Perisi, halak Hevi, dohot halak Jebus.+ Ai songon i do diparettahon Jahowa Debatamuna tu hamu.
18 Molo dibahen hamu songon i, dang boi be ajaran ni nasida hamu taringot tu sude ulaon na dihagigihon, i ma ulaon na diulahon nasida tu akka debata ni nasida. Ai molo diulahon hamu i, gabe mardosa do hamu tu Jahowa Debatamuna.+
19 “Molo dikepung hamu sada kota, jala saleleng piga-piga ari hamu marporang lao mambuat kota i, unang taba hamu akka hau na disi. Boi do allangonmuna parbuena, alai unang taba hamu hauna.+ Ai dang songon jolma hau i, na ikkon dipamate.
20 Holan hau na so boi allangon parbuena do na boi ditaba hamu. Boi do ditaba hamu i, jala dibahen hamu gabe pagar lao mangepung kota ni musumuna sahat tu na talu nasida.
Surat na di toru
^ Manang “sude na marhosa”.
