Hesekiel 22:1-31
22 Dung i didok Jahowa ma muse tu au,
2 “Ale anak ni jolma, nungnga rade be ho paboahon panguhuman tu kota na mangusehon mudar ni godang halak na so marsala i?+ Nungnga rade be ho paboahon akka ulaon ni nasida na huhagigihon i?+
3 Dokkon ma, ‘Songon on ma hata ni Jahowa Tuan Natumimbul i, “Ale kota na mangusehon mudar ni godang halak na so marsala,+ marujung nama ho satokkin nai.+ Ai dibahen ho do akka patung na huhagigihon* lao mambahen ramun* dirim.+
4 Nungnga mardosa be ho, ala nungnga diusehon ho be godang mudar ni halak na so marsala.+ Ramun ma ho alani akka patungmu na huhagigihon i.+ Dibahen ho do lam jeppek ari-arim. Jala satokkin nai juppang nama taon panguhumanmi. Alani i, bahenokku ma ho dileai akka bangso, jala direhei sude luat.+
5 Nungnga roa be goarmu jala kota na gok hasusaan do ho. Alani i, sude luat na jonok dohot na dao sian ho ikkon mangarehei ho.+
6 Ida ma! Ganup pamimpin ni Israel na adong di tonga-tongamuna mamakke huaso ni nasida lao mangusehon mudar ni halak na so marsala.+
7 Dileai nasida do omak dohot bapak ni nasida,+ dioto-otoi nasida do halak na sian bangso na asing, jala ditindas nasida do akka na so marama* dohot akka ina na mabalu.”’”+
8 “‘Lea do roham tu akka inganakku na badia i jala ramun do dibahen ho ari Sabat na hutottuhon.+
9 Adong do di tonga-tongamuna akka halak na mandok na so tutu lao mangusehon mudar ni halak na so marsala.+ Adong do muse di tonga-tongamuna na mangallang sipanganon naung dipelehon di akka dolok. Jala adong do muse di tonga-tongamuna akka halak na mangulahon ulaon ni halak na so umboto ila.+
10 Adong do di tonga-tongamuna na mangulahon seks dohot istri ni bapak ni nasida.+ Jala mangulahon seks do nasida dohot borua na ramun ala datang bulan.+
11 Adong do bawa di tonga-tongamuna na mangulahon pangalaho na huhagigihon rap dohot istri ni donganna.+ Adong do muse bawa na mambahen ramun parumaenna marhite mangulahon pangalaho na so umboto ila.+ Jala adong dope di tonga-tongamuna bawa na memperkosa itona, boru ni bapakna.+
12 Adong do di tonga-tongamuna na manjalo suap lao mangusehon mudar ni halak na so marsala.+ Tikki dilehon hamu hepeng lao dipinjam, dijalo hamu do bungana+ jala dilului hamu do uttung tu dirimuna sandiri. Dipaksa hamu do asa dilehon akka donganmuna hepengna tu hamu.+ Tutu, nungnga lupa hamu tu Au,’ ninna Jahowa Tuan Natumimbul i.
13 “‘Martopak tangan ma Au ala nungnga magigi Au mangida hamu. Ai dilului hamu do uttung marhite cara na so sittong, jala diusehon hamu do mudar ni godang halak di tonga-tongamuna.
14 Di tikki ro Au manghukum hamu,+ boi dope hamu toktong barani? Jala boi dope sai gogo tanganmuna i? Au do Jahowa naung mandok i jala Au sandiri do na lao mangulahon i.
15 Bahenokku ma hamu marserak di tonga-tonga ni akka bangso dohot di tonga-tonga ni akka luat.+ Bahenokku ma marujung akka ulaonmuna na huhagigihon i.+
16 Bahenokku ma ho marlea di tonga-tonga ni akka bangso na asing. Jala sian i botoonmu ma Au do Jahowa.’”+
17 Dung i didok Jahowa ma muse tu Au,
18 “Ale anak ni jolma, nungnga songon kotoran* ni logam na so marguna be halak Israel di Au. Songon tombaga do nasida sude, songon timah hitam, songon bosi, dohot songon timah putih na adong di bagasan ni tungku ni api. Songon kotoran ni perak na so marguna do nasida sude.+
19 “Alani i, songon on ma hata ni Jahowa Tuan Natumimbul i, ‘Ala nungnga songon kotoran ni logam na so marguna be hamu sude,+ papunguokku nama hamu tu Jerusalem.
20 Dos songon perak, tombaga, bosi, timah hitam, dohot timah putih na dipapungu tu bagasan tungku asa malala dibahen api, papunguokku ma hamu di bagasan rimas dohot murukki. Huombusson nama api lao mangalala hamu.+
21 Papunguokku ma hamu jala di bagasan muruk, ombusokku ma api tu hamu+ asa malala hamu di bagasan kotamuna i.+
22 Songon perak na malala di bagasan ni tungku, songon i ma hamu malala di bagasan ni kota i. Sian i botoonmuna ma Au do Jahowa, Au sandiri do na mangusehon rimashi tu hamu.’”
23 Dung i didok Jahowa ma muse tu au,
24 “Ale anak ni jolma, dokkon ma tu luat i, ‘Di ari di tikki na muruk i Au, songon luat na so hea dipaias jala luat na so hea mandapot udan ma hamu.
25 Marsada do akka panurirangna,+ songon singa na mangallang mangsana huhut marauang.+ Dibunu nasida do godang halak jala dirampas nasida arta dohot akka barang ni nasida na arga. Gabe unggodang ma akka ina na mabalu disi dibahen nasida.
26 Dilanggar akka malim na di kota i do patikku+ jala dibahen nasida do torus ramun akka inganakku na badia i.+ Dang boi dibahen nasida imbar ni akka na badia dohot na so badia.+ Dang dipaboa nasida na dia akka na ramun jala na dia na ias.+ Dang diulahon nasida ari Sabat na hutottuhon i, jala dibahen nasida do Au ramun di tonga-tonga ni nasida.
27 Dos songon serigala na mangallang mangsana do akka pamimpin na disi. Diusehon nasida do mudar ni akka halak jala dipamate nasida do akka halak asa dapot ni nasida uttung marhite cara na so sittong.+
28 Alai ditabunihon akka panurirang i do pangalaho ni nasida dos songon tembok na ditutupi tano kapur. Dipaboa nasida do taringot parnidaan na so tutu dohot ramalan na so sittong.+ Didok nasida do, “Songon on ma hata ni Jahowa Tuan Natumimbul i,” hape so adong didok Jahowa manang aha.
29 Panipu jala pangarampok+ do pangisi ni luat i. Jahat do nasida tu halak na marhahurangan dohot tu na pogos. Ditipu nasida do muse halak na sian bangso na asing, jala dang adil nasida mambahen hukum tu halak na sian bangso na asing.’
30 “‘Hulului do sian tonga-tonga ni nasida halak na olo padenggatton tembok na sian batu i. Hulului do halak na olo jongjong di jolokku di bagian ni tembok naung sega, lao manjaga akka halak na disi, jala asa unang hancur luat i.+ Alai dang adong dapottu nanggo sahalak.
31 Alani i, huusehon ma murukku tu nasida, jala pamateonku ma nasida alani rimashu na songon api na marsigorgor. Bahenokku ma nasida makkilala akibat ni pangalaho ni nasida,’ ninna Jahowa Tuan Natumimbul i.”
Surat na di toru
^ Molo di bahasa Heber istilah on berkaitan tu hata “kotoran” jala on patuduhon na magigi situtu do tu sada ulaon.
^ Manang “na so marama na so marina”.
^ Na nidokna, i ma sampah hasil sian mangalala logam.
