Hesekiel 39:1-29
39 “Ale anak ni jolma, paboa ma aha na lao masa taringot tu Gog.+ Paboa ma tu ibana, ‘Songon on do hata ni Jahowa Tuan Natumimbul i, “Ale Gog, pamimpin na untimbo na di Mesek dohot Tubal,+ Au ma na gabe alom.
2 Bahenokku ma ho manirpang, boanokku ma ho sian inganan na undao di sabola utara+ asa ro tu akka dolok ni Israel.
3 Attukonku ma panahmi sappe madabu sian tangan kirim. Jala bahenokku ma madabu akka anak panahmu sian tangan kananmu.
4 Bahenokku ma ho mate di akka dolok ni Israel.+ Mate ma ho rap dohot sude pasukan tentaram rap dohot akka halak na sian akka bangso na rap dohot ho. Bahenokku ma ho gabe siallangon ni sude ragam ni pidong siallang bakke. Jala bahenokku ma ho gabe siallangon ni binatang buas na di ladang.”’+
5 “‘Na lao mate ma ho di ladang.+ Ai nungnga Au na mandok i,’ ninna Jahowa Tuan Natumimbul i.
6 “‘Parookku ma api tu Magog dohot tu akka halak na dame ngoluna tinggal di akka pulo.+ Sian i botoon ni nasida ma na Au do Jahowa.
7 Bahenokku ma goarhu na badia i tarbarita di tonga-tonga ni Israel bangsokki. Dang pasombuonku be marlea goarhu na badia i, asa diboto akka bangso na Au do Jahowa+ Debata Nabadia ni Israel.’+
8 “Didok Jahowa Tuan Natumimbul i ma, ‘Tutu, na lao masa do i jala na ikkon saut. On ma ari naung hudokkon i.
9 Kaluar ma sude penduduk ni akka kota na di Israel. Dipagalak nasida ma api marhite manutung akka sinjata, i ma perisai na balga dohot perisai na gelleng,* panah dohot anak panah, tukkot, dohot tombak.* Pakkeon ni nasida ma i lao pagalakkon api+ saleleng pitu taon.
10 Dang porlu buaton ni nasida hau sian ladang, manang papunguon ni nasida soban sian tombak. Ai akka sinjata do pakkeon ni nasida lao pagalakkon api.’
“‘Dibuat nasida ma akka arta ni halak naung mambuat arta ni nasida. Jala dirampok nasida ma akka arta ni halak naung mangarampok nasida,’ ninna Jahowa Tuan Natumimbul i.
11 “‘Di ari i, lehonokku ma kuburan tu Gog+ di Israel, di rura inganan ni halak lao menyeberang na di sabola timur ni laut. Rura i mangabbati halak, asa dang boi mardalan lao menyeberang. Disi ma Gog dohot akka pasukanna dikuburhon jala digoari ma inganan i Rura Hamon-Gog.*+
12 Saleleng pitu bulan ma halak Israel makkubur nasida asa boi ias luat i.+
13 Dohot do sude penduduk ni luat i makkubur nasida. Gabe tarbarita ma sude halak na di luat i alani na masa i, di ari tikki hupasangap dirikku,’+ ninna Jahowa Tuan Natumimbul i.
14 “‘Torus do adong halak na disuru mandalani luat i jala mangubur akka bakke na so ditanom dope asa ias luat i. Torus do diulahon nasida i saleleng pitu bulan.
15 Molo diida akka halak na mandalani luat i adong holi-holi ni jolma, dipasang nasida ma tanda di labbung ni holi-holi i. Dung i, ro ma halak na ditugasson lao mambuat holi-holi i asa dikubur tu rura Hamon-Gog.+
16 Adong do muse kota na jonok tu rura i goarna Hamona.* Jala dipaias nasida do luat i.’+
17 “Ale anak ni jolma, songon on do hata ni Jahowa Tuan Natumimbul i, ‘Dokkon ma tu sude ragam ni pidong dohot tu sude binatang buas na di ladang, “Marpungu ma hamu jala ro ma hamu. Marpungu ma hamu di sakaliling ni silehon-lehon na huparade tu hamu, silehon-lehon na massai godang di akka dolok ni Israel.+ Lao mangallang jagal nama hamu jala manginum mudar.+
18 Na lao mangallang sibuk ni akka halak na gogo ma hamu, jala manginum mudar ni akka pamimpin ni tano on. Songon biru-biru jantan do nasida, anak ni lombu, hambing, lombu jantan, jala songon sude binatang na mokmok na sian Basan.
19 Sappe butong ma hamu mangallang tabo-tabo jala sappe mabuk manginum mudar ni sude silehon-lehon na huparade i tu hamu.”’
20 “‘Ro ma hamu mangan di mejakki. Allangonmuna ma akka hoda, akka halak na hundul di atas ni hoda, akka halak na gogo, dohot sude akka tentara,’+ ninna Jahowa Tuan Natumimbul i.
21 “‘Patuduokku ma hamuliaokku di tonga-tonga ni akka bangso. Idaon ni akka bangso i ma panguhuman na huulahon i. Jala idaon ni nasida ma huaso* na hupatudu tu nasida.+
22 Mulai sian ari i, botoon ni halak Israel ma na Au do Jahowa Debata ni nasida.
23 Botoon ni akka bangso ma alani hasalaan ni halak Israel sandiri do umbahen na diboan musu nasida. Ai dang setia nasida tu Au.+ Alani i do umbahen na hupadao bohikku sian nasida+ jala hupasahat nasida tu tangan ni akka musu.+ Jala gabe mate nasida sude dibahen podang.
24 Aha na hubahen tu nasida hombar do tu dosa dohot tu pangalaho ni nasida na ramun* i. Hupadao do bohikku sian nasida.’
25 “Alani i, songon on do hata ni Jahowa Tuan Natumimbul i, ‘Boanokku nama mulak akka pinoppar ni si Jakkob naung diboan tu luat ni musu.+ Asi nama rohakku tu sude halak Israel.+ Jala bahenokku nama sian nasa gogokku mambela goarhu na badia i.+
26 Dung marlea nasida ala dang setia tu Au,+ aman ma nasida tinggal di luat ni nasida jala dang adong be na mambahen nasida mabiar.+
27 Tikki huboan nasida mulak sian tonga-tonga ni akka bangso, jala dung hupapungu nasida sian luat ni akka musu,+ pabadiaokku ma dirikku di tonga-tonga ni nasida di jolo ni godang bangso.’+
28 “‘Tikki hupasombu nasida diboan akka bangso na asing tu luat ni musu, jala dung hupapungu muse nasida mulak jala dang adong na tinggal nanggo sahalak pe sian nasida,+ botoon ni nasida ma na Au do Jahowa Debata ni nasida.
29 Dang padaookku be bohikku sian nasida,+ ai huusehon nama tondi parbadiakku tu bangso Israel,’+ ninna Jahowa Tuan Natumimbul i.”
Surat na di toru
^ Perisai na somal dipakke akka pemanah.
^ Manang “hujur”.
^ Manang “Rura Pasukan ni si Gog”.
^ Lapatanna, “Pasukan”.
^ As. “tangan”.
