Jeremia 11:1-23
11 On ma hata ni Jahowa tu si Jeremia,
2 “Sude hamu, tangihon hamu ma isi ni parjanjian on!
“Paboa ma* i tu halak Juda dohot penduduk ni Jerusalem
3 jala dokkon ma, ‘Songon on ma hata ni Jahowa Debata ni Israel i, “Hona bura ma manang ise pe na so mangoloi isi ni parjanjian on,+
4 i ma parjanjian na huparettahon tu akka ompumuna di ari tikki huboan nasida kaluar sian Mesir,+ inganan ni panutungan ni bosi.*+ Hudok do tu nasida, ‘Oloi hamu ma hatakku, ulahon hamu ma akka parettakku. Au ma na gabe Debatamuna jala hamu ma na gabe bangsokku.+
5 Molo diulahon hamu songon i, pasautokku ma sude na husumpahon tu akka ompumuna, i ma lao mangalehon tu nasida luat na godang susu dohot madu.+ Jala saonari, tinggal do hamu di luat i.’”’”
Dung i hualusi ma, “Songon i ma tutu,* ale Jahowa.”
6 Dung i didok Jahowa ma muse tu au, “Paboa ma muse hata on di akka kota na di Juda dohot di akka dalan na di Jerusalem, ‘Tangihon hamu ma parjanjian on jala ulahon hamu ma i.
7 Mulai sian na huboan kaluar akka ompumuna sian Mesir, torus do sai hupasingot nasida. Jala sahat tu sadari on mulak-ulak do sai hupasingot* nasida. Torus do hudok, “Oloi hamu ma hatakku.”+
8 Alai dang ditangihon nasida manang diparrohahon nasida i. Gariada marjugul do nasida lao mangihutton roha ni nasida na jahat i.+ Alani i, hukumokku ma nasida mangihutton na adong di parjanjian i. Ai nungnga huparettahon tu nasida asa diulahon parjanjian i jala dang olo nasida mangulahon i.’”
9 Dung i didok Jahowa ma tu au, “Marsada do halak Juda dohot penduduk ni Jerusalem lao mangalo Au.
10 Nungnga mulak be muse nasida mangulahon hasalaan ni akka ompu ni nasida najolo i, na so olo mangoloi hatakki.+ Diihutton nasida do muse akka debata na asing jala marsomba do nasida tusi.+ Nungnga dilanggar halak Israel dohot halak Juda be parjanjian na hubahen dohot akka ompu ni nasida.+
11 Alani i didok Jahowa ma, ‘Parookku ma jea tu nasida+ jala dang boi nasida malua sian i. Molo dijou nasida Au lao mangurupi nasida, dang tangihonokku nasida.+
12 Lao do akka halak na di Juda dohot penduduk ni Jerusalem tu akka debata ni nasida lao mangalehon pelean.* Lao do nasida tusi lao mangido asa diurupi nasida.+ Alai dang na lao boi paluaon ni akka debata i nasida di tikki ro jea tu nasida.
13 Ale Juda, nungnga dos be godang ni akka debatamuna songon godang ni akka kotamuna. Dipajongjong hamu do akka langgatan jala dilehon hamu do pelean di langgatan i lao tu Baal+ debata na pailahon i. Godang ni akka langgatanmuna nungnga dos be godangna songon akka dalan na di Jerusalem.’
14 “Alai anggo ho Jeremia, unang pola tangiakkon bangso i. Unang pola mangandungi ho jala unang pola tangiakkon nasida.+ Ai tikki ro jea i tu nasida, jouon ni nasida ma Au, alai dang tangihonokku nasida.
15 Ai marhak dope bangso na huhaholongi i di jabukku?Nungnga godang diulahon nasida akka rencana na jahat.
Boi ma disundati nasida dang ro jea i marhite mangalehon binatang* gabe pelean ni nasida?
Jala boi ma nasida marlas ni roha di tikki ro jea i?
16 Hea do ho didok Jahowa hau jetun na lomak,Na uli jala na denggan parbuena.
Marhite soara na gogo, tutungonna ma i,Jala diponggoli ma akka dakkana.
17 “Nungnga dipaboa Jahowa Pamimpin ni Akka Tentara* na manuan ho,+ na lao paroonna jea i tu ho. Ai paroonna do i alani hajahaton ni halak Israel dohot halak Juda. Ai dibahen nasida do haccit rohana, dipelehon nasida do pelean tu Baal.”+
18 Ale Jahowa, dipaboa Ho do tu au asa huboto sudena i,Di tikki i, dipatuduhon Ho do tu au sude pambahenan ni nasida.
19 Nungnga songon anak ni biru-biru na jinak jala na diboan tu pamotongan au.
Dang huboto naung direncanahon nasida na jahat tu au,+ didok nasida do,
“Beta ma tapamate hau i rap dohot parbuena,Beta ma tabunu ibanaAsa unang diingot be goarna.”
20 Ai tigor do Jahowa Pamimpin ni Akka Tentara i manguhumi,Dipareso Ibana do roha dohot pikkiran ni jolma na buni.*+
Ale Debata, paloas ma au mangida Ho mambalos nasida,Ai tu tanganmu do hupasahat sude parsoalakku.
21 Alani i, songon on ma hata ni Jahowa tu halak Anatot+ na naeng pamatehon au jala na mandok, “Unang be manurirangi ho di bagasan goar ni Jahowa.+ Molo dang, mate ma ho di tangannami.”
22 Songon on ma hata ni Jahowa Pamimpin ni Akka Tentara i, “Hukumokku ma nasida. Mate ma akka doli-doli dibahen podang,+ jala mate ma anak ni nasida dohot boru ni nasida dibahen haraparon.+
23 Dang adong nanggo sahalak pe sian nasida na hupasombu mangolu. Ai parookku do jea tu halak Anatot,+ di taon tikki hupangido pertanggung jawaban sian nasida.”
Surat na di toru
^ Ra tu si Jeremia do hata on.
^ Panutungan ni bosi patuduhon sitaonon na massai borat.
^ Manang di bahasa Heber, ‘Amen’.
^ As. “tibu do Au dungo manogot lao pasingotton”.
^ Manang “lao manutung pelean asa nakkok timusna”.
^ Na didokna dison, i ma pelean na di bagas joro.
^ Manang “Sebaot”, lapatanna pamimpin ni akka suru-suruan na di banua ginjang.
^ As. “dohot ginjal”.
