Jeremia 19:1-15
19 Songon on ma hata ni Jahowa, “Lao ma ho tu sitopa hudon jala tuhor ma sada botol na dibahen sian tano liat.+ Jou ma piga-piga pangituai* ni bangso on dohot piga-piga halak malim na marpengalaman.
2 Dung i lao ma ho tu Rura Anak ni Hinnom*+ di jolo ni Gerbang Sitopa Hudon. Disi ma paboa hata na hupaboa tu ho.
3 Paboa ma songon on, ‘Tangihon ma hata ni Jahowa, hamu akka raja ni Juda dohot penduduk ni Jerusalem. Tangihon ma hata ni Jahowa Pamimpin ni Akka Tentara,* Debata ni Israel na mandok,
“‘“Parookku ma hasusaan tu inganan on jala tarsonggot ma* manang ise pe na mambege i.
4 Masa ma songon i tu nasida, ai ditadikkon nasida do Au,+ jala dibahen nasida do gabe dang hutanda inganan i.+ Dilehon nasida do disi akka pelean tu debata na asing na so ditanda nasida jala na so ditanda akka ompu ni nasida dohot akka raja ni Juda. Digohi nasida do inganan i dohot mudar ni akka halak na so marsala.+
5 Dipajongjong nasida do akka inganan panombaon* tu Baal lao manutung anak dohot boru ni nasida tu api lao gabe pelean situtungon tu Baal.+ Hape dang hea huparettahon i, dang hea hudokkon taringot i tu nasida jala dang hea tubu di rohakku ulaon sisongon i.”’+
6 “‘Didok Jahowa ma, “Alani na masa i, di ari na naeng ro, dang digoari be inganan i Topet manang Rura Anak ni Hinnom,* alai Rura Pamunuan+ nama i.
7 Bahenokku ma dang marhasil rencana ni Juda dohot Jerusalem di inganan on. Mate ma nasida sude alani podang ni musu ni nasida, jala dipamate tangan ni halak na naeng mambunu ma nasida. Lehonokku ma bakke ni nasida gabe siallangon ni akka pidong na di langit dohot siallangon ni akka binatang buas na di tano on.+
8 Bahenokku ma kota on gabe inganan na massai ngeri jala dileai akka halak. Manang ise na lewat mangida luat i, marsisir ma ibbuluna, jala dileai nasida ma luat i alani sude jea na masa tu luat i.+
9 Nungnga dikalilingi musu dohot akka halak be kota i naeng mambunu nasida. Marsak situtu ma nasida ala nungnga dikepung. Alani i, bahenokku ma nasida mangallang daging ni anak ni nasida dohot boru ni nasida. Jala ganup halak ma mangallang daging ni donganna.”’+
10 “Dung i puttarhon ma botol i di jolo ni akka halak na lao rap dohot ho.
11 Dokkon ma tu nasida, ‘Songon on do hata ni Jahowa Pamimpin ni Akka Tentara, “Dos songon cara ni sasahalak mamuttarhon hudon tano na so boi dipadenggan be, songon i ma bahenokku manghancurhon bangso on dohot kota on. Dikuburhon ma bakke ni nasida di Topet, sappe dang adong be inganan na kosong lao kuburan ni nasida.”’+
12 “Didok Jahowa ma, ‘Songon i ma na lao bahenokku tu luat on dohot tu akka pendudukna, bahenokku ma kota on songon Topet.
13 Gabe ramun* ma akka jabu na di Jerusalem dohot istana ni akka raja na di Juda. Ramun ma i songon Topet,+ ai dilehon nasida do pelean di atap ni jabu ni nasida lao tu sude akka na di langit+ jala diusehon nasida do disi pelean siinumon lao tu akka debata na asing.’”+
14 Dung mulak si Jeremia sian Topet, sian inganan na sinuru ni Jahowa lao paboahon na lao masa, jongjong ma ibana di alaman ni jabu ni Jahowa. Dung i didok ibana ma tu sude bangso i,
15 “Songon on ma hata ni Jahowa Pamimpin ni Akka Tentara, Debata ni Israel i, ‘Parookku ma akka jea tu kota dohot tu sude huta songon naung hudok i. Ai takkang do roha ni nasida, ai marjugul do nasida lao mangalo Au jala dang olo nasida mangoloi hatakku.’”+
Surat na di toru
^ Manang “Sebaot”, lapatanna pamimpin ni akka suru-suruan na di banua ginjang.
^ As. “jala marnginging do pinggol ni”.
