Jeremia 23:1-40
23 “Marjea ma akka parmahan na pamatehon jala na mambahen marserak akka biru-biru di inganan panjappalan appunakki!” ninna Jahowa.+
2 Alani i songon on ma hata ni Jahowa Debata ni Israel taringot tu akka parmahan na marmahan bangsona i, “Dibahen hamu do marserak biru-birukki. Dibahen hamu do marsirang na sada sian na asing, jala dang diurus hamu nasida.”+
“Alani i hukumokku ma hamu alani pangalahomuna na jahat i,” ninna Jahowa.
3 “Dung i papunguokku ma muse akka biru-birukku na mangolu dope sian sude luat inganan ni nasida hubahen marserak i.+ Boanokku ma nasida mulak tu inganan panjappalan ni nasida.+ Disi, marpinoppari ma nasida asa lam godang.+
4 Pillitokku ma akka parmahan na burju marmahan nasida.+ Dang na lao mabiar be nasida manang tarsonggot. Jala dang adong nanggo sada pe sian nasida na mago,” ninna Jahowa.
5 “Ida ma, na lao ro ma tikkina,” ninna Jahowa, “bahenokku ma sahalak na tigor marroha sian pinoppar ni si Daud hundul di atas ni tahta.*+ Mamaretta ma ibana gabe raja.+ Marbisuk do ibana jala diulahon ibana do hukum na sittong dohot na tigor di luat on.+
6 Di tikki pamarettaonna, aman ma ngolu ni halak Juda+ jala sonang ma ngolu ni halak Israel.+ Dijou ma goar ni ibana Jahowa do Mual ni Hatigoran.”+
7 Didok Jahowa ma, “Alai na lao juppang ma tikkina, dang dokkonon ni nasida be, ‘Songon pastina Jahowa mangolu,* Debata na mamboan Israel kaluar sian Mesir!’+
8 Alai dohonon ni nasida ma, ‘Songon pastina Jahowa mangolu, na mamboan kaluar jala na mamboan mulak pinoppar ni halak Israel sian luat na di utara dohot sian luat manang didia pe,’ i ma sian inganan ni nasida hubahen marserak i. Jala bahenokku ma nasida tinggal di luat ni nasida sandiri.”+
9 Songon on ma hatakku tu akka panurirang,*
Nungnga malala be ate-atekku.
Jala nungnga makkahitir be sude holi-holikku.
Nungnga songon halak na mabuk be au,Songon halak na pagodangku minum anggur,Di tikki hubege hata ni Jahowa na badia i.
10 Gok do pangalangkup+ di luat on,Mangandungi+ ma pangisi ni luat i ala nungnga hona buraJala ala nungnga koring inganan panjappalan na di ladang.+
Ai diulahon nasida do na jahat jala lomo-lomo ni nasida do mamakke huaso ni nasida.
11 “Nungnga manimbil* be panurirang dohot malim.+
Haru di jabukku sandiri, huida do nungnga mangulahon na jahat nasida,”+ ninna Jahowa.
12 “Landit ma dalan ni nasida jala golap,+Tartuktuk ma nasida jala madabu.
Ai parookku ma jea tu nasidaDi taon panguhuman i,” ninna Jahowa.
13 “Huida do akka ulaon na huhagigihon diulahon akka panurirang ni Samaria.+
Dipaboa nasida do akka na lao masa di bagasan goar ni Baal,Dililuhon nasida do Israel bangsokki.
14 Adong do huida akka ulaon na massai jahat di akka panurirang ni Jerusalem.
Mangalakkup+ do nasida jala gok do gabus+ di parngoluon ni nasida.Diurupi nasida do akka parjahatJala dang olo nasida muba sian ulaon na jahat.
Songon Sodom+ do nasida sude di Au, jala songon Gumora+ do pendudukna.”
15 Alani i songon on ma hata ni Jahowa Pamimpin ni Akka Tentara* taringot tu akka panurirang,
“Bahenokku ma nasida mangallang suan-suanan na paet,Jala manginum aek na marraccun.+
Ai akka panurirang ni Jerusalem do na mambahen rarat halak na manimbil di luat i.”
16 Songon on ma hata ni Jahowa Pamimpin ni Akka Tentara,
“Unang ma tangihon hata ni panurirang na paboahon na lao masa tu hamu.+
Mangaliluhon do nasida.*
Na dikarang-karang nasida sandiri do parnidaan i.+Dang sian pamangan ni Jahowa i.+
17 Sai mulak-ulak do torus didok nasida tu akka halak na so pasangappon Au,‘Songon on do didok Jahowa, “Dapotmuna do ngolu na dame.”’+
Jala tu ganup na mangihutton lomo ni rohana sandiri, jala na so olo mangoloi Au didok nasida do,‘Dang na lao masa jea tu hamu.’+
18 Ise do na jongjong di tonga-tonga ni halak na jonok tu JahowaLao manangihon jala mangattusi hatana i?
Ise do na mamparrohahon jala na mambege hatana i?
19 Ida ma, muruk ma Jahowa dos songon alogo na massai gogo,Dos songon halisuksung na marputar-putar na turun tu ulu ni parjahat.+
20 Andorang so dipasaut Jahowa lomo ni rohana,Dang na lao malum murukna i.
Di ujung ni akka ari i, takkas ma diattusi hamu lapatan ni na masa i.
21 Dang adong husuru akka panurirang i, alai pittor lari do nasida tusi.
Dang adong Au makkatai tu nasida alai dipaboa nasida do aha na lao masa.+
22 Ai molo nasida do na jongjong di tonga-tonga ni halak na jonok tu Au,Bahenon ni nasida do bangsokki manangihon hatakku,Jala bahenon ni nasida do bangsokku manadikkon pangalaho ni nasida na jahat dohot pambahenan ni nasida na roa.”+
23 “Dang holan na masa na jonok na boi huida,
Alai boi do huida na lao masa na dao sian Au,” ninna Jahowa.
24 “Tung tarbahen ni sasahalak ma martabuni di inganan na massai buni asa unang boi huida?”+ ninna Jahowa.
Didok Jahowa ma muse, “Ai adong ma na buni sian matakku di langit dohot di tano on?”+
25 “Nungnga hubege hata ni akka panurirang na makkatahon gabus di bagasan goarhu. Didok nasida do, ‘Marnipi do au! Marnipi do au!’+
26 Sadia leleng nai paboaon ni akka panurirang i gabus? Sian roha ni nasida sandiri do na dipaboa akka panurirang i lao mangoto-otoi.+
27 Dos songon akka ompu ni nasida naung lupa tu goarhu alani Baal,+ songon i ma na lao bahenon ni panurirang i tu bangsokku, asa lupa nasida tu goarhu marhite paboa-boahon akka nipi ni nasida tu akka donganna.
28 Pasombu ma dipaboa panurirang na marnipi i akka nipina. Alai anggo panurirang na mambege hatakki, ikkon sittong do paboaonna hatakki.”
“Ai dang boi disarupahon eme* tu durame,” ninna Jahowa.
29 Didok Jahowa ma, “Songon api do hatakki,+ dang i? Jala songon tokkok na boi mambahen hancur dolok batu.”+
30 “Hukumokku ma panurirang i. Ai nungnga dipabalik-balik* nasida hatakku asa boi dipaboa nasida lomo ni roha ni nasida,”+ ninna Jahowa.
31 “Hukumokku ma akka panurirang i, ai hata ni nasida sandiri do na dipaboa nasida.* Didok nasida do, ‘Songon on ma hata ni Ibana!’”+ ninna Jahowa.
32 “Hukumokku ma akka panurirang na paboahon nipi na so sittong i,” ninna Jahowa. “Ai dipaboa-boa nasida do nipi na so sittong i. Jala dililuhon nasida do bangsokki marhite gabus dohot hata manggang.”+
“Ai dang hea husuru nasida manang hulehon paretta tu nasida. Alani i, dang adong lapatan ni nasida sude di bangso on,”+ ninna Jahowa.
33 “Molo disukkun bangso on, manang panurirang, manang malim ho, ‘Aha do hata ni* Jahowa?’ alusi ma, ‘Didok Jahowa do, “Boban do hamu di Au. Alani i bolokkonokku ma hamu.”’+
34 Ai taringot tu akka halak, panurirang, manang malim na mandok, ‘Sada boban* na borat do hata ni Jahowa i!’ hukumokku ma halak na mandok i dohot sude keluargana.
35 Disukkun hamu do tu donganmuna dohot tu haha anggimuna, ‘Aha do alus ni Jahowa? Aha do hata ni Jahowa?’
36 Unang be dok hamu sada boban* do hata ni Jahowa. Ai hatamuna sandiri i do na gabe boban di ganup halak. Jala ala dipabalik-balik hamu do hata ni Jahowa Pamimpin ni Akka Tentara Debatanta na mangolu i umbahen na gabe boban i di hamu.
37 “Dokkon ma songon on tu akka panurirang i, ‘Aha do alus ni Jahowa tu hamu? Aha do hata ni Jahowa?
38 Molo torus do didok hamu, “Boban* do hata ni Jahowa!” Songon on ma hata ni Jahowa tu hamu, “Ala nungnga torus didok hamu, ‘Boban do hata ni Jahowa i!’ hape nungnga hudok tu hamu, ‘Unang be dok hamu, “Boban do hata ni Jahowa i!”’
39 ida ma! Angkatokku ma hamu jala sappatonokku ma hamu sian jolokku. Songon i ma bahenokku tu hamu dohot tu kota naung hulehon tu hamu dohot tu akka ompumuna.
40 Bahenokku ma hamu maila jala marlea sahat tu saleleng ni lelengna. Jala torus ma i diingot.”’”+
Surat na di toru
^ As. “Lehonokku ma tu si Daud sada tunas na mangulahon na sittong”.
^ Sumpa on patuduhon pasti do ikkon saut janji on, songon pastina Debata mangolu.
^ Manang “Sebaot”, lapatanna pamimpin ni akka suru-suruan na di banua ginjang.
^ Manang “Ai janji palsu do na dipaboa nasida i”.
^ Na nidokna dison, suan-suanan na songon eme na tubu di Israel na jotjot dipakke mambahen roti.
^ Manang “nungnga ditakko”.
^ As. “ai dila ni nasida sandiri do na dipakke nasida”.
^ Manang “boban sian”. Di bahasa Heber hata on adong dua lapatanna “barita na borat sian Debata” manang “boban”.
^ Manang “barita”.
^ Manang “barita na borat”.
^ Manang “Barita na borat”.
