Jeremia 25:1-38
25 Di taon na paopatton pamarettaon ni si Jehoyakim+ anak ni si Josia raja ni Juda, i ma di taon na parjolo pamarettaon ni si Nebukadnesar* raja ni Babel, makkatai ma Debata tu si Jeremia taringot tu sude halak Juda.
2 Songon on ma hata ni si Jeremia taringot tu* halak Juda dohot sude penduduk ni Jerusalem,
3 “Nungnga 23 taon lelengna Jahowa paboahon hatana tu au. Mulai ma i sian taon na pasappulu toluhon pamarettaon ni si Josia+ anak ni si Amon raja ni Juda sahat tu sadari on. Torus do hupaboa tu hamu aha na nidokna i.* Alai dang hea ditangihon hamu.+
4 Disuru Jahowa do sude panurirangna* asa makkatai tu hamu. Sai torus do disuru ibana* nasida. Alai nang pe songon i, dang olo hamu manangihon manang mamparrohahon hatana.+
5 Didok akka panurirang i do, ‘Tolong ma, muba ma hamu sian pangalahomuna dohot pambahenanmuna na jahat i,+ asa boi hamu toktong tinggal di luat naung dilehon Jahowa sian najolo tu hamu dohot tu akka ompumuna.
6 Unang ma ihutton hamu akka debata na asing. Unang ma oloi hamu nasida jala unang ma marsomba hamu tu nasida. Unang bahen hamu haccit rohakku marhite akka patung na binahen ni tanganmuna i. Ai molo diulahon hamuna i, parookku ma jea tu hamu.’
7 “‘Alai dang ditangihon hamu Au,’ ninna Jahowa. ‘Gariada dibahen hamu do haccit rohakku marhite akka patung na binahen ni tanganmuna, na mambahen gabe ro jea tu hamu.’+
8 “Alani i songon on ma hata ni Jahowa Pamimpin ni Akka Tentara* i, ‘“Ala dang ditangihon hamu hatakku,
9 jouokku ma sude bangso sian utara+ jala jouokku ma si Nebukadnesar* raja ni Babel naposokki,”+ ninna Jahowa. “Suruokku ma nasida ro lao marporang mangalo luat on,+ pendudukna, dohot sude bangso na di sakalilingna.+ Pamateonku ma nasida sude jala mabiar ma sude bangso i mangida na masa tu nasida. Direhei halak ma* nasida jala hancur ma nasida saleleng ni lelengna.
10 Pasookku ma soara ni na marlas ni roha dohot na marsonang-sonang,+ soara ni pengantin bawa dohot soara ni pengantin borua,+ dohot soara ni batu gilingan.* Jala pamateonku ma lampu.
11 Maruppak ma sude bangunan na di luat on, jala mabiar do sude halak mangida luat on. Gabe hatoban ni raja ni Babel ma sude bangso on saleleng 70 taon.”’+
12 “‘Alai dung salpu 70 taon,+ hukumokku ma raja ni Babel dohot bangso i alani hasalaan ni nasida,’+ ninna Jahowa. Jala luat ni halak Kasdim bahenokku ma gabe luat na harsang jala na tarulang sappe saleleng ni lelengna.+
13 Pasautokku do sude naung hudok taringot tu luat on, i ma sude naung tarsurat di bukku on, sude naung dipaboa si Jeremia taringot tu na lao masa tu sude bangso.
14 Ai godang do akka bangso dohot akka raja na gogo+ mambahen nasida gabe hatoban.+ Balosokku ma nasida hombar tu pangalaho dohot pambahenan ni nasida.’”+
15 Songon on ma hata ni Jahowa tu au, “Buat ma makkuk na marisi anggur rimashu sian tanganku. Tu bangso na dia pe ho husuru, ikkon suruonmu do nasida minum sian makkuk i.
16 Ikkon minum do nasida sian i jala gabe mabuk. Gabe songon halak na rittik ma pangalaho ni nasida di tikki huparo podang i tu tonga-tonga ni nasida.”+
17 Dung i hubuat ma makkuk i sian tangan ni Jahowa. Jala tu bangso na dia pe au disuru Jahowa, husuru do nasida minum sian makkuk i.+
18 Mulai ma i sian Jerusalem dohot akka kota na di Juda,+ tu akka raja dohot tu akka pejabatna, asa sude nasida hancur. Gabe mabiar ma sude halak mangida na masa tu nasida. Dileai halak ma nasida jala dipakke halak ma goar ni nasida gabe uppasa lao mangaleai+ dos songon na lao masa sadari on.
19 Dung i lao ma au tu si Firaun raja ni Mesir, tu akka parkarejona, pejabatna, dohot sude rakyatna.+
20 Jala lao ma muse au tu sude halak na sian bangso na asing na tinggal di luat i, tu sude raja na di Us, tu sude raja na di luat ni halak Palistim,+ Askelon,+ Gasa, Ekron, dohot tu sude halak na tinggal dope di Asdod,
21 tu Edom,+ Moab,+ dohot tu halak Ammon,+
22 tu sude raja na di Tirus, tu sude raja na di Sidon,+ dohot akka rajana di pulo na di tonga-tonga ni laut,
23 tu Dedan,+ tu Tema, tu Bus, dohot tu sude halak naung maccukur jambangna sappe habis,+
24 tu sude raja ni halak Arab,+ dohot tu sude raja ni akka halak na sian bangso na asing na tinggal di gurun,
25 tu sude raja na di Zimri, tu sude raja ni Elamit,+ dohot tu sude raja ni halak Media,+
26 tu sude raja na sian utara na dao dohot na jonok, marturut-turut do nasida juppangakku, dohot sude akka harajaon na adong di tano on. Jala dung sae nasida sude, Raja Sesak*+ ma na minum sian makkuk i.
27 “Dokkon ma songon on tu nasida, ‘Songon on do hata ni Jahowa Pamimpin ni Akka Tentara, “Minum ma hamu sude sappe mabuk, muta-uta, jala madabu. Dang na lao boi be hamu jongjong.+ Ai parookku nama podang tu tonga-tongamuna.”’
28 Molo dang olo nasida mambuat makkuk i sian tanganmu jala dang olo minum sian i, dokkon ma tu nasida ‘Songon on do hata ni Jahowa Pamimpin ni Akka Tentara, “Ikkon minum do ho sian makkuk i!
29 Ida ma, haru kota na hupillit lao mamakke goarhi,+ tusi do huparo parjolo jea i. Alani i, unang ma dirippu hamu na so hona hukum hamu.”’+
“‘Pasti hona hukum do hamu. Ai parookku do podang lao manghukum sude halak na di tano on,’ ninna Jahowa Pamimpin ni Akka Tentara.
30 “Ikkon paboaonmu do akka na lao masa on tu nasida,‘Marauang do Jahowa sian inganan na timbo songon singa,Jala marsoara do Ibana sian ingananna na badia i.
Massai gogo do Ibana marauang sian ingananna na di tano on.
Jala manggora do Ibana songon halak na mandege-dege anggur di inganan pamoroan.Jala diendehon Ibana do ende tu sude halak na di tano on patuduhon naung monang ibana.’
31 ‘Tarbege do soara na gaor sahat tu ujung ni tano on,Ai adong do parsoalan ni Jahowa dohot akka bangso.
Ibana sandiri do na lao manghukum sude jolma.+
Pasahatonna ma halak na jahat tu podang,’ ninna Jahowa.
32 Songon on ma hata ni Jahowa Pamimpin ni Akka Tentara,
‘Ida ma, na lao rarat ma jea i sian bangso tu bangso,+Jala na lao ro ma halisuksung na massai gogo sian inganan na massai dao di tano on.+
33 “‘Akka halak na dipamate Jahowa di tikki i marpeakan ma di atas ni tano on, sian ujung sahat tu ujung ni tano on. Dang adong na lao mangandungi nasida, dang na lao dipapungu nasida manang dikuburhon. Jala gabe pupuk ma nasida na martimbun-timbun di atas ni tano.’
34 Tangis ma hamu sagogo ni gogona, hamu akka parmahan!
Marsurak ma hamu marguling-guling, hamu akka na sangap,*Ai nungnga juppang be tikkina di hamu lao diseat jala dibahen marserakNa lao madabu ma hamu jala maputtar dos songon hudon na sian tano liat na arga!
35 Dang na lao lari manang na tudia be akka parmahan i,Jala dang na lao boi malua akka halak na sangap na sian tonga-tonga ni jolma.
36 Tangihon ma andung-andung ni parmahanJala soara ni akka halak na sangap na sian tonga-tonga ni jolma na tangis i,Ai nungnga hancur dibahen Jahowa inganan panjappalan ni nasida.
37 Jala dang adong be na mangolu di inganan na gok hadameonAi nungnga marsigorgor muruk ni Jahowa.
38 Dos songon singa na poso+ na kaluar sian sarang do Ibana,Jala mabiar do sude halak mangida luat i,Ai dang asi rohana lao pamatehon sude jolma pakke podang.Jala nungnga marsigorgor murukna.”
Surat na di toru
^ As. “Nebukadresar”, ejaan na asing tu goar on.
^ Manang “tu”.
^ As. “tibu do Au dungo manogot lao makkatai tu nasida”.
^ As. “tibu do Au dungo manogot lao makkatai tu”.
^ Manang “Sebaot”, lapatanna pamimpin ni akka suru-suruan na di banua ginjang.
^ As. “Marsiul ma halak mangida”.
^ As. “Nebukadresar”, ejaan na asing tu goar on.
^ Ra goar on lao patuduhon sandi lao mandok Babel (Babilon).
^ As. “di tonga-tonga ni na diparmahan i”.
