Jeremia 27:1-22
27 Di mula ni pamarettaon ni si Jehoyakim* anak ni si Josia raja ni Juda, makkatai ma Jahowa tu si Jeremia.
2 Dung i didok si Jeremia ma, “Songon on do hata ni Jahowa tu au, ‘Buat ma piga-piga tali pangikkat dohot piga-piga auga.* Dung i pasang ma i tu rukkungmu.
3 Kirim ma tali dohot auga i tu raja ni halak Edom,+ tu raja ni halak Moab,+ tu raja ni halak Ammon,+ tu raja ni Tirus,+ dohot tu raja ni Sidon.+ Kirim ma i marhite akka utusan na disuru manjuppangi si Sedekia raja ni Juda di Jerusalem.
4 Paboa ma tu nasida asa dipaboa paretta on tu akka raja ni nasida,
“‘“Songon on do hata ni Jahowa Pamimpin ni Akka Tentara,* Debata ni Israel, songon on ma hata na ikkon paboaonmuna tu akka rajamuna i,
5 ‘Au do na manoppa tano on, jolma, dohot akka binatang na di tano on. Hutoppa do i marhite tanganku na gogo i dohot huasokku na balga i. Jala hulehon do sudena i tu manang ise pe lomo ni rohakku.*+
6 Nungnga hupasahat be sude luat on tu tangan ni naposokku si Nebukadnesar+ raja ni Babel. Gariada, binatang buas na di ladang pe, nungnga hubahen tunduk tu ibana.
7 Sude bangso ikkon tunduk do tu ibana, tu anakna, dohot tu akka pahoppuna sahat tu na juppang tikkina marujung harajaonna i.+ Di tikki marujung harajaonna i, godang do akka bangso dohot akka raja na gogo ro naeng mambahen ibana gabe hatoban ni nasida.’+
8 “‘“‘Alai molo adong bangso dohot harajaon na so olo tunduk tu si Nebukadnesar raja ni Babel, jala dang mangoloi* raja ni Babel i, hukumokku ma bangso i mamakke podang,+ haraparon, dohot sahit na masa di godang inganan sahat tu na mate nasida sude di tanganna,’ ninna Jahowa.
9 “‘“‘Unang ma tangihon hamu hata ni akka panurirang, akka peramal, akka penafsir nipi, akka datu, dohot tukkang sihir na mandok, “Dang na lao tunduk hamu tu raja ni Babel.”
10 Ai gabus do na nidok ni nasida i. Alani i molo dibege hamu hata ni nasida, na lao diboan ma hamu dao sian luatmuna on. Bahenokku ma hamu marserak jala mate ma hamu sude.
11 “‘“‘Alai bangso na dia pe na olo mangoloi* raja ni Babel jala tunduk tu ibana, pasombuonku ma bangso i toktong tinggal di luat ni nasida. Ulaonna ma tano na di luat i jala tinggal ma ibana disi,’ ninna Jahowa.”’”
12 Jala songon i do hudok tu si Sedekia+ raja ni Juda, “Oloi ma* raja ni Babel jala tunduk ma ho tu ibana, tu rakyatna, asa toktong ho mangolu.+
13 Boasa ma pola ikkon mate ho rap dohot rakyatmu alani podang,+ haraparon,+ dohot sahit na masa di godang inganan?+ Ai songon i do didok Jahowa taringot tu bangso na so olo mangoloi tu raja ni Babel.
14 Unang ma tangihon hata ni akka panurirang na mandok, ‘Dang na lao tunduk ho tu raja ni Babel,’+ ai gabus do na nidok ni nasida i tu ho.+
15 Didok Jahowa ma, “‘Dang adong husuru nasida. Alai di bagasan goarhu do nasida paboahon aha na lao masa. Jala dang sittong na nidokna i. Molo ditangihon hamu nasida, bahenokku ma hamu marserak jala mate ma hamu sude rap dohot akka panurirang na mangoto-otoi hamu.’”+
16 Hudok do muse tu akka malim dohot tu sude halak na disi, “Songon on do hata ni Jahowa, ‘Unang tangihon hamu akka panurirang na mandok tu hamu, “Ida ma! Satokkin nai, diboan nama mulak sian Babel akka parkakas ni jabu ni Jahowa!”+ Ai sasittongna na margabus do nasida disi.+
17 Unang pola tangihon nasida. Tunduk ma hamu tu raja ni Babel asa boi hamu toktong mangolu.+ Ai molo dang diulahon hamu songon i, hancur ma kota on.
18 Alai molo tutu do nasida akka panurirang na paboahon hata ni Jahowa, suru ma dipangido nasida tu Jahowa Pamimpin ni Akka Tentara i, asa unang diboan tu Babel akka parkakas na adong dope di jabu ni Jahowa, di istana ni raja ni Juda, dohot na adong di Jerusalem.’
19 “Ai songon on do hata ni Jahowa Pamimpin ni Akka Tentara i taringot tu akka tiang,+ Laut Tombaga,+ akka kareta,+ dohot parkakas na asing na adong dope di kota on,
20 i ma akka na so diboan si Nebukadnesar raja ni Babel i sian Jerusalem. Dang diboan ibana akka parkakas i tu Babel tikki ditakkup ibana si Jekonia anak ni si Jehoyakim raja ni Juda, rap dohot sude akka halak na sangap na adong di Juda dohot di Jerusalem.+
21 Tutu, songon on ma hata ni Jahowa Pamimpin ni Akka Tentara Debata ni Israel taringot tu akka parkakas na adong dope di jabu ni Jahowa, di istana ni raja ni Juda, dohot na di Jerusalem,
22 ‘“Sudena parkakas i diboan do tu Babel,+ jala disi ma i sahat tu na huboan muse mulak tu luat on,” ninna Jahowa. “Di tikki i, boanokku ma i mulak jala paulakokku ma i tu luat on.”’”+
Surat na di toru
^ Manang “si Sedekia,” mangihutton piga-piga manuskrip najolo.
^ Manang “Sebaot”, lapatanna pamimpin ni akka suru-suruan na di banua ginjang.
^ As. “tu manang ise pe na sittong di Au”.
^ As. “jala dang olo mambahen rukkungna di toru ni auga ni raja ni Babel”.
^ As. “bangso na olo mambahen rukkungna di toru ni auga ni”.
^ As. “Bahen ma rukkungmu di toru ni auga ni”.
