Jeremia 29:1-32
29 Tikki di Jerusalem Panurirang* Jeremia, dikirim ibana ma surat tu akka pangituai* na rap dohot akka halak na diboan musu, tu akka malim, tu akka panurirang, dohot tu sude rakyat, i ma halak na diboan si Nebukadnesar sian Jerusalem tu Babel.
2 Diulahon ibana do i dung diboan sian Jerusalem Raja Jekonia,+ omak ni raja i,+ akka pejabat na adong di istana, akka pamimpin ni Juda dohot pamimpin ni Jerusalem, akka tukkang logam,* dohot akka tukkang na malo.+
3 Dikirim ibana ma surat i marhite si Elasa anak ni si Sapan+ dohot marhite si Gemaria anak ni si Hilkia na disuru si Sedekia+ raja ni Juda tu Babel lao mandapotton si Nebukadnesar raja ni Babel. Songon on ma isi ni surat i,
4 “Songon on ma hata ni Jahowa Pamimpin ni Akka Tentara,* Debata ni Israel tu sude halak naung diboan musu, na hupasombu diboan sian Jerusalem tu Babel,
5 ‘Pajongjong hamu ma jabu jala ingani hamu ma i. Suan hamu ma akka ladang jala allang hamu ma hasilna.
6 Lului hamu ma borua lao gabe istrimuna jala maranak marboru ma hamu. Lului hamu ma istri lao tu akka anakmuna jala pamuli hamu ma borumuna, asa ditubuhon nasida anak dohot boru. Ikkon tamba do godangmuna, dang boi moru.
7 Marsitutu ma hamu asa dame ngolumuna di kota ingananmuna na diboan musu i. Tangiakkon hamu ma tu Jahowa kota i. Ai molo dame kota i, dame do ngolumuna.+
8 Ai songon on do hata ni Jahowa, Pamimpin ni Akka Tentara, Debata ni Israel i, “Unang ma olo hamu dioto-otoi akka panurirang dohot akka peramal na adong di tonga-tongamuna.+ Jala unang ma porsea hamu tu nipi ni nasida.
9 Ai ‘nang pe di bagasan goarhu nasida paboahon aha na lao masa, gabus do hata ni nasida i. Jala dang adong husuru nasida,’+ ninna Jahowa.”’”
10 “Ai songon on do hata ni Jahowa, ‘Molo dung 70 taon hamu di Babel, parrohahonokku do hamu muse,+ pasautokku do janjikku lao mamboan hamu mulak tuson.’+
11 “‘Ai takkas do huboto aha na lao bahenokku tu hamu,’ ninna Jahowa, ‘hadameon do na lao bahenokku tu hamu dang jea.+ Jala marjanji do Au na boi pos rohamuna na lao denggan do ngolumuna di ari na naeng ro.+
12 Jouonmuna ma Au. Ro nama hamu martangiang tu Au, jala tangihonokku do hamu.’+
13 “‘Luluanmuna ma Au jala juppangmuna ma Au.+ Ai luluanmuna ma Au sian nasa rohamuna.+
14 Paloasokku do dirikku boi juppangmuna,’+ ninna Jahowa. ‘Papunguokku ma hamu akka na diboan bangso i. Jala papunguokku ma hamu sian marragam bangso, ingananmuna na hubahen marserak i,’+ ninna Jahowa. ‘Boanokku ma hamu mulak sian inganan ni musu i.’+
15 “Alai didok hamu do, ‘Nungnga dipillit Jahowa be akka panurirang lao di hami di Babel.’
16 “Songon on ma hata ni Jahowa tu raja na hundul di tahta ni si Daud+ dohot tu sude halak na tinggal di kota on, i ma dongan sabangsomuna na so olo lao rap dohot hamu tu luat ni musumuna.
17 ‘Songon on ma hata ni Jahowa Pamimpin ni Akka Tentara, “Parookku ma podang, haraparon, dohot sahit na masa di godang inganan tu nasida.+ Bahenokku ma nasida songon parbue ni hau ara na busuk,* na so tarallang be alani roana.”’+
18 “‘Leleokku ma nasida mamakke podang,+ haraparon, dohot sahit na masa di godang inganan. Bahenokku ma sude harajaon na di tano on mabiar mangida na masa tu nasida.+ Diburai halak ma nasida, longang ma roha ni halak mangida nasida, direhei do nasida,+ jala dileai di tonga-tonga ni sude bangso inganan ni nasida na hubahen marserak i.+
19 Ai dang ditangihon nasida akka hata na hupaboa marhite panurirang naposokki, na sai torus husuru* tu nasida,’+ ninna Jahowa.
“‘Dang olo hamu manangihon,’+ ninna Jahowa.
20 “Alani i tangihon ma hata ni Jahowa, hamu akka halak naung diboan musu naung huusir sian Jerusalem tu Babel.
21 Songon on do hata ni Jahowa Pamimpin ni Akka Tentara, Debata ni Israel, taringot si Ahab anak ni si Kolaya dohot si Sedekia anak ni si Maaseya na makkatahon gabus tu hamu di bagasan goarhu,+ ‘Pasahatonku ma nasida tu tangan ni si Nebukadnesar* raja ni Babel. Pamateon ni raja i ma nasida di jolomuna.
22 Molo mamburai halak Juda na diboan musu tu Babel i, didok nasida ma, “Sai anggiat ma dibahen Jahowa tu ho songon na binahenna tu si Sedekia dohot tu si Ahab, na dipanggang raja ni Babel di bagasan api.
23 Ai nungnga diulahon nasida ulaon na so umboto ila di Israel.+ Mangalakkup do nasida dohot akka istri ni dongan ni nasida jala dipasahat nasida do akka hata gabus di bagasan goarhu, nang pe sasittongna dang adong husuru nasida.+
“‘“Au do na mamboto i jala Au do na gabe saksina,”+ ninna Jahowa.’”
24 “Dokkononmu do songon on tu si Semaya+ halak Nehelam i,
25 ‘Songon on do hata ni Jahowa Pamimpin ni Akka Tentara, Debata ni Israel, “Di bagasan goarmu sandiri do dibahen ho surat tu sude halak Jerusalem, tu Malim Sepania+ anak ni si Maaseya, dohot tu akka malim na asing. Dibahen ho do di suratmi songon on,
26 ‘Nungnga dibahen Jahowa be ho gabe malim gatti ni Malim Jehoyada na gabe pengawas di jabu ni Jahowa. Jala ho do na martanggung jawab tu halak na rittik na mambahen dirina songon panurirang. Ho do na martanggung jawab mamasung* pat ni nasida, tanganna, dohot rukkungna.+
27 Alai boasa dang dimuruki ho si Jeremia halak Anatot+ na mambahen dirina songon panurirang di tonga-tongamuna?+
28 Ai dikirim ibana do surat tu hami di Babel, didok ibana do, “Hamu akka halak na ditakkup, na lao leleng dope hamu tinggal dison. Pajongjong hamu ma akka jabu jala ingani ma i. Suan hamu ma akka ladang jala allang ma hasilna,+ . . .”’”’”
29 Tikki dijahahon Malim Sepania+ surat on tu Panurirang Jeremia,
30 makkatai ma Jahowa tu si Jeremia, ninna ma,
31 ‘Bahen ma surat tu sude halak naung diboan musu i. Songon on ma isina, ‘Songon on ma hata ni Jahowa taringot tu si Semaya halak Nehelam, “Nungnga dipaboa si Semaya taringot aha na lao masa tu hamu, hape so adong husuru ibana. Marsitutu do ibana lao mambahen hamu porsea tu gabus na nidokna i.+
32 Alani i songon on ma na nidok ni Jahowa, ‘Hukumokku ma si Semaya halak Nehelam i dohot pinopparna. Dang adong nanggo sahalak pe sian pinopparna na boi toktong mangolu di tonga-tonga ni bangsokkon. Jala dang na lao idaonna akka na denggan na lao bahenokku tu bangsokki,’ ninna Jahowa, ‘ai nungnga dijujui ibana sude jolma lao mangalo Jahowa.’”’”
Surat na di toru
^ Manang boi do “akka halak na pajongjokkon benteng pertahanan”.
^ Manang “Sebaot”, lapatanna pamimpin ni akka suru-suruan na di banua ginjang.
^ Manang boi do “na pocca”.
^ As. “na tibu dungo manogot lao makkatai”.
^ As. “Nebukadresar”, ejaan na asing tu goar on.
^ Manang “mamasung pakke ratte bosi”.
