Jeremia 30:1-24
-
Janji lao mamboan mulak jala dipamalum (1-24)
30 Didok Jahowa ma tu si Jeremia,
2 “Songon on ma hata ni Jahowa Debata ni Israel, ‘Surat ma di sada bukku sude hata na hupaboa tu ho.
3 “Ai ida ma, na lao juppang ma tikkina,” ninna Jahowa, “papunguokku nama bangsokki, halak Israel dohot halak Juda sian luat ni musu,”+ ninna Jahowa, “boanokku nama nasida mulak tu luat na hulehon tu akka ompu ni nasida, jala appuna ni nasida ma muse luat i songon najolo.”’”+
4 Songon on ma hata ni Jahowa tu halak Israel dohot tu halak Juda.
5 Songon on ma hata ni Jahowa,
“Begeonnami ma soara ni na mabiar,Ai holan biar nama na adong, dang adong be hadameon.
6 Sukkun ma, ai boi do bawa manubuhon anak?
Attong boasa huida sude bawa na gogo maniop butuhana* ala haccitan,Songon borua na naeng partus?+
Boasa puccat sude bohi ni nasida?
7 Marjea nai! Massai ngeri* situtu do di ari i.+
Dang adong ari na tudos tusi,I ma tikki ari hasusaan ni si Jakkob.
Alai boi do ibana selamat sian i.”
8 Didok Jahowa Pamimpin ni Akka Tentara* i ma, “Di ari i, ponggolhonokku ma auga* sian rukkungmi, jala putus ma bahenokku tali pangikkatmi. Dang adong be halak na sian bangso na asing na mambahen ibana* gabe hatoban.
9 Oloan ni nasida ma Jahowa Debata ni nasida dohot si Daud raja ni nasida na lao hupillit i.”+
10 “Jala ho Jakkob naposokku, unang pola mabiar ho,” ninna Jahowa,“Jala unang pola hitir-hitir ho, ale Israel.+
Ai selamat do ho bahenokku sian inganan na dao,Rap dohot akka pinopparmu sian luat ni akka musu.+
Ai na lao mulak do muse si Jakkob, sonang ma ngoluna jala dame,Dang adong be na mambahen nasida mabiar.”+
11 “Ai Au do na mandongani ho lao mambahen ho selamat,” ninna Jahowa.
“Pamateonku ma sude halak na di ingananmuna hubahen marserak i,+Alai anggo hamu, dang na lao pamateonku hamu.+
Ai ikkon hupissang* do hamu marhite cara na sittong,Dang pasombuonku hamu dang hona hukum.”+
12 Ai songon on do hata ni Jahowa,
“Nungnga massai posi be sahitmu,
Dang haubatan be lukkam.+
13 Dang adong na olo mambela parkarom,Dang adong na boi pamaluppon bisulmu.
Dang tarubatan be ho.
14 Nungnga lupa be tu ho sude halak na massai makkaholongi ho.+
Dang dilului nasida be ho.
Ai nungnga huattuk be ho dos songon na binahen ni musu,+Dos songon hukuman na binahen ni halak na kejam,Ai massai balga do hasalaanmu jala massai godang dosam.+
15 Boasa mangangguki ho alani akka lukkami?
Ai dang na boi be dipamalum sahitmi!
Hubahen do songon i tu hoAlani hasalaanmu na balga i dohot alani dosam na godang i.+
16 Pasti hancur do sude na mambahen hamu hancur,+Ikkon ditakkup do sude musumuna jala diboan tu luat na asing.+
Ikkon dibuat do arta ni sude na mambuat artamuna,Jala hupasahat do tu pangarampok sude na mangarampok artamuna.”+
17 “Alai na lao bahenokku do ho sehat jala pamalumokku do akka lukkami,”+ ninna Jahowa,“Nang pe didok nasida ho halak naung dibolokkon tikki didok,
‘Ale Sion, inganan na so dilului manang ise pe.’”+
18 Songon on ma hata ni Jahowa,
“Lao ma Au tu akka kemah ni si Jakkob jala papunguokku ma akka halak naung diboan musu,*+Asi ma rohakku tu nasida jala padengganokku ma akka inganan ni nasida tinggal i.
Na lao dibangun ma muse kota ni nasida di atas ni dolok,+Jala dipajongjong ma menara ni nasida di ingananna hian.
19 Mandok mauliate ma nasida, pola tarbege soara ni na marlas ni roha.+
Bahenokku ma nasida martamba-tamba, jala dang na lao otik be nasida+Bahenokku ma nasida lam godang,*Jala dang na lao leas be roha ni halak tu nasida.+
20 Sonang ma pinoppar ni nasida songon najolo,Jala gabe bangso na gogo ma nasida di jolokku.+
Hukumokku ma sude halak na kejam tu nasida.+
21 Sian tonga-tonga ni nasida do ro pamimpin ni nasida,Jala sian tonga-tonga ni nasida do ro na mangarajai nasida.
Paloasokku ma ibana jonok tu Au, jala ro tu labbungku.”
“Ai molo dang songon i, ise ma na barani ro jonok tu Au?” ninna Jahowa.
22 “Hamu ma na gabe bangsokku+ jala Au ma na gabe Debatamuna.”+
23 Ida ma! Muruk ma Jahowa dos songon alogo na massai gogo,+Dos songon halisuksung na marputar-putar, na turun tu atas ni ulu ni parjahat.
24 Andorang so diulahon jala dipasaut Jahowa lomo ni rohana,Dang na lao malum murukna i.+
Di ujung ni akka ari i, diattusi hamu ma sude na masa i.+
Surat na di toru
^ Manang “pinggangna”.
^ As. “bolon”.
^ Manang “Sebaot”, lapatanna pamimpin ni akka suru-suruan na di banua ginjang.
^ Manang “nasida”.
^ Manang “hupareso”.
^ As. “Papunguonku ma akka halak sian kemah ni si Jakkob na diboan musu”.
^ Manang boi do “sangap”.
