Jeremia 37:1-21
37 Mamaretta ma Raja Sedekia+ anak ni si Josia manggattihon si Konia*+ anak ni si Jehoyakim. Ai nungnga dibahen si Nebukadnesar* raja ni Babel ibana gabe raja di luat ni Juda.+
2 Alai dang olo ibana manangihon hata ni Jahowa na dipaboa marhite Panurirang* Jeremia. Songon i do nang sude parkarejona i, dohot penduduk ni luat i.
3 Dung i disuru Raja Sedekia ma si Jehukal+ anak ni si Selemia dohot si Sepania+ anak ni Malim Maaseya mandapotton Panurirang Jeremia lao mandok, “Tangiakkon ma sude bangsotta on tu Jahowa Debatanta i.”
4 Tikki i bebas dope si Jeremia lao manang na tudia di tonga-tonga ni bangso i. Ai dang dipamasuk nasida dope ibana tu penjara.+
5 Di tikki i, dikepung halak Kasdim do Jerusalem. Alai tikki dibege nasida naung borhat tentara ni si Firaun sian Mesir,+ gabe mundur ma nasida sian Jerusalem.+
6 Dung i didok Jahowa ma muse tu Panurirang Jeremia,
7 “Songon on ma hata ni Jahowa Debata ni Israel, ‘Ikkon dokkononmuna do songon on tu raja ni Juda na manuru hamu lao mangido tudu-tudu sian Au, “Na lao mulak nama tu Mesir akka tentara ni si Firaun na ro lao mangurupi hamu.+
8 Alai na lao ro do muse halak Kasdim mangalo kota on, taluhononna ma on jala tutungonna.”+
9 Songon on do hata ni Jahowa, “Unang ma dioto-otoi hamu dirimuna sandiri marhite mandok, ‘Dang na lao mulak be halak Kasdim i tuson,’ ai sasittongna pasti ro do nasida.
10 Autsura pe boi ditaluhon hamu sude tentara ni Kasdim na ro marporang mangalo hamu, jala gabe holan halak na lukka nama na tinggal disi, pasti boi do nasida hehe sian kemah ni nasida lao manutung kota on.”’”+
11 Di tikki mundur tentara ni halak Kasdim sian Jerusalem alani tentara ni si Firaun,+
12 lao ma si Jeremia sian Jerusalem tu luat ni marga Benjamin+ lao manjalo tano parbagiananna di tonga-tonga ni bangsona i.
13 Alai tikki sahat ibana di Gerbang ni Benjamin, ro ma kepala panjaga goarna si Jeria anak ni si Selemia pahoppu ni si Hanania manakkup Panurirang Jeremia. Didok si Jeria ma, “Naeng lari nama ho kan tu halak Kasdim!”
14 Alai didok si Jeremia ma, “Daong! Dang naeng lari au tu halak Kasdim.” Alai dang olo si Jeria manangihon ibana. Ditakkup si Jeria ma si Jeremia jala diboan tu jolo ni akka pejabat.
15 Muruk situtu ma akka pejabat i tu si Jeremia,+ diattuki ma ibana jala dipenjarahon+ di jabu ni si Jehonatan sekretaris i. Ai di jabuna i do dibahen penjara.
16 Dung i dipamasuk ma si Jeremia tu penjara na di toru ni tano jala disi ma ibana saleleng piga-piga ari.
17 Dung i disuru Raja Sedekia ma halak mangalap si Jeremia, sipsip ma raja i manukkun tu ibana di istana.+ Didok ibana ma, “Ai adong do ro hata ni Jahowa tu ho?” Didok si Jeremia ma, “Adong!” jala didok ibana ma muse, “Na lao dipasahat nama tuan tu tangan ni raja ni Babel!”+
18 Dung i disukkun si Jeremia ma tu Raja Sedekia, “Ai aha do huroa salakku tu ho ale tuan dohot tu sude parkarejom, dohot tu bangso on umbahen na dipamasuk hamu au tu penjara?
19 Didia do akka panurirang na mandok tu hamu, ‘Na so ro raja ni Babel marporang mangalo hamu dohot luat on?’+
20 Saonari ale raja, tuannami. Tolong ma jo tangihon au, tolong ma jo oloi pangidoakkon. Unang ma paulak au tu jabu ni si Jehonatan+ sekretaris i. Ai molo mulak au tusi, mate disi nama au.”+
21 Gabe diparettahon Raja Sedekia ma asa dipenjarahon si Jeremia di Alaman ni Panjaga.+ Ganup ari dilehon do tu ibana roti na bulat na sian tukkang roti na di dalan i.+ Dilehon do tu ibana roti sahat tu na habis roti sian kota i.+ Alani i, toktong ma si Jeremia tinggal di Alaman ni Panjaga.
Surat na di toru
^ Digoari do ibana muse si Jehoyakin dohot si Jekonia.
^ As. “Nebukadresar”, ejaan na asing tu goar on.
