Jeremia 39:1-18
39 Di bulan na pasappuluhon, di taon na pasiahon pamarettaon ni si Sedekia, ro ma Raja Nebukadnesar* na sian Babel dohot sude tentarana mangalo Jerusalem. Dikepung nasida ma kota i.+
2 Di ari na pasiahon, di bulan na paopatton, di taon na pasappulu sadahon pamarettaon ni Raja Sedekia, nungnga marhasil be nasida mangaruppakkon tembok ni kota i.+
3 Ro do sude pejabat ni raja ni Babel, hundul ma nasida di Gerbang Partonga-tonga.+ Hundul do disi Sumgar* na margoar Nergal-sareser, Rabsaris* na margoar Nebo-sarsekim, dohot Rabmag* na margoar Nergal-sareser dohot sude pejabat ni raja ni Babel na asing.
4 Dung diida si Sedekia raja ni Juda dohot sude akka tentarana na masa i, lari ma nasida.+ Kaluar ma nasida sian kota i di tikki borngin. Lari ma nasida sian taman ni raja lewat sian gerbang na di holang-kolang ni tembok na marlappis dua. Dung i lao ma nasida tu dalan na tu Araba.+
5 Alai dilumba tentara ni Kasdim ma nasida jala ditakkup ma si Sedekia di gurun na di Jeriko.+ Ditakkup ma ibana jala diboan tu si Nebukadnesar* raja ni Babel i di Ribla+ di luat ni Hamat.+ Dihukum si Nebukadnesar ma si Sedekia disi.
6 Dibunu raja ni Babel ma akka anak ni si Sedekia di Ribla. Di jolo ni si Sedekia do dibunu raja i nasida. Dipamate+ raja ni Babel i do muse sude akka halak na sangap di Juda.
7 Dibahen raja i ma buta mata ni si Sedekia. Diikkat ma ibana mamakke ratte tombaga, dung i diboan tu Babel.+
8 Ditutung halak Kasdim ma sappe habis istana ni raja dohot akka jabu ni bangso i.+ Diruppakkon nasida do muse akka tembok ni Jerusalem.+
9 Diboan si Nebusaradan+ kepala ni panjaga i ma akka halak na mangolu dope di kota i. Diboan ma nasida tu Babel. Diboan do muse akka halak na marpihak tu ibana dohot manang ise pe na adong disi.
10 Alai ditinggalhon si Nebusaradan kepala ni panjaga i do deba akka halak na pogos di Juda, i ma akka halak na so adong manang ahana pe. Di ari i, dilehon ibana ma akka ladang anggur dohot akka porlak na asing lao* dikarejohon nasida.+
11 Alai taringot tu si Jeremia, dilehon si Nebukadnesar* raja ni Babel i do paretta tu si Nebusaradan kepala ni panjaga i songon on,
12 “Boan ma ibana jala urus ma ibana. Unang hahua ibana, jala lehon ma manang aha pe na dipangido ibana.”+
13 Alani i, ro ma si Nebusaradan kepala ni panjaga i, Rabsaris* na margoar Nebusasban, Rabmag* na margoar Nergal-sareser, dohot sude akka halak na sangap di harajaon ni Babel i.
14 Disuru nasida ma halak lao mamboan si Jeremia kaluar sian Alaman ni Panjaga.+ Dung i, dilehon ma si Jeremia tu si Gedalia+ anak ni si Ahikam+ pahoppu ni si Sapan,+ asa di jabu ni si Gedalia si Jeremia tinggal. Songon i ma si Jeremia boi tinggal rap dohot penduduk na asing.
15 Tikki dipenjara si Jeremia di Alaman ni Panjaga,+ didok Jahowa ma tu ibana,
16 “Lao ma ho jala dokkon ma tu si Ebedmelek+ halak Etiopia i, ‘Songon on do hata ni Jahowa, Pamimpin ni Akka Tentara,* Debata ni Israel, “Parookku ma jea tu kota on, songon naung hudokkon i. Dang parookku na denggan tu kota on. Di ari tikki masa i, idaonmu ma sudena i.”’
17 “‘Alai di ari i, paluaokku do ho,’ ninna Jahowa, ‘dang pasahatonku ho tu tangan ni akka halak na dihabiari ho.’
18 “‘Pasti bahenokku do ho selamat, dang na lao mate ho dibahen podang. Na lao malua do hosam,+ ai porsea do ho tu Au,’+ ninna Jahowa.”
Surat na di toru
^ As. “Nebukadresar”, ejaan na asing tu goar on.
^ Ra pangkat ni si Nergal-sareser do on.
^ Di bahasa Heber boi do dibahen gabe “Nergal-sareser, Sumgar-nebo, Sarsekim, Rabsaris”.
^ Manang “pamimpin ni akka tukkang sihir (ahli perbintangan)”.
^ As. “Nebukadresar”, ejaan na asing tu goar on.
^ Manang boi do “lao dipaksa asa”.
^ As. “Nebukadresar”, ejaan na asing tu goar on.
^ Manang “kepala ni akka pejabat istana”.
^ Manang “pamimpin ni akka tukkang sihir (ahli perbintangan)”.
^ Manang “Sebaot”, lapatanna pamimpin ni akka suru-suruan na di banua ginjang.
