Jeremia 44:1-30
44 Songon on ma hata ni Debata marhite si Jeremia tu sude halak Jahudi na tinggal di Mesir,+ na tinggal di Migdol,+ di Tahpanhes,+ di Nop,*+ dohot di luat Patros,+
2 “Songon on ma hata ni Jahowa Pamimpin ni Akka Tentara,* Debata ni Israel, ‘Nungnga diida hamu sude jea na huparo tu Jerusalem+ dohot tu sude kota na di Juda. Saonari, nungnga hancur be akka kota i jala dang adong be na mangingani.+
3 Hubahen pe songon i ala dibahen hamu do haccit rohakku. Lao do hamu mangalehon pelean+ tu akka debata na asing. Disomba hamu do akka debata na so ditanda hamu, jala na so ditanda akka ompumuna.+
4 Sai torus do husuru* akka panurirang* naposokki tu hamu. Torus do nasida husuru. Didok nasida do, “Tolong ma, unang ulahon hamu akka ulaon na dihagigihon Debata.”+
5 Alai dang ditangihon hamu jala dang diparrohahon hamuna i. Dang olo hamu muba sian pangalahomuna na jahat i. Jala sai torus do dilehon hamu pelean tu akka debata na asing.+
6 Alani i, usehonokku ma murukku dohot rimashu na marsigorgor i tu akka kota na di Juda dohot tu akka dalan ni Jerusalem. Hancur ma sudena i jala gabe inganan na harsang songon na masa saonari.’+
7 “Saonari songon on ma hata ni Jahowa, Debata Pamimpin ni Akka Tentara, Debata ni Israel, ‘Ai boasa diparo hamu jea na massai balga on tu dirimuna sandiri? Na lomo do rohamuna mate sude bawa, borua, dakdanak, dohot akka poso-poso sian Juda, asa unang adong be na tinggal nanggo sahalak?
8 Dung lao hamu tu Mesir jala tinggal disi, boasa dibahen hamu haccit rohakku marhite ulaon ni tanganmuna, marhite mangalehon pelean tu akka debata na asing? Na lao mate nama hamu sude, jala sude bangso na di tano on+ mangaleai jala mamburai hamu.
9 Naung lupa do hamu tu hajahaton ni akka ompumuna, tu hajahaton ni akka raja ni Juda+ dohot tu hajahaton ni akka istri ni nasida?+ Naung lupa do hamuna tu hajahatonmuna sandiri dohot tu hajahaton ni istrimuna+ na diulahon nasida di akka luat ni Juda dohot di akka dalan na di Jerusalem?
10 Sahat tu sadari on dang manolsoli dope rohamuna,* dang mabiar hamu.+ Dang diihutton hamu patik dohot aturan na hulehon tu hamu dohot tu akka ompumuna.’+
11 “Alani i songon on ma hata ni Jahowa, Debata Pamimpin ni Akka Tentara, Debata ni Israel, ‘Nungnga huputusson di rohakku na ikkon parookku jea tu hamu asa hancur sude Juda.
12 Takkupokku ma sude halak Juda na mangolu i dope, i ma akka halak na marjugul lao tu Mesir asa tinggal disi. Na lao mate ma nasida sude di Mesir.+ Na lao mate ma nasida dibahen podang jala mate dibahen haraparon. Mulai sian na mora sahat tu na pogos, mulai sian na poso sahat tu na matua, mate ma dibahen podang dohot haraparon. Diburai ma nasida, direhei, dileai, jala mabiar do sude halak mangida na masa tu nasida.+
13 Hukumokku ma akka halak na tinggal di Mesir dos songon di tikki Au manghukum halak Jerusalem. Hukumokku ma nasida mamakke podang, haraparon, dohot sahit na masa di godang inganan.+
14 Nang pe lao halak Juda na mangolu i dope tu Mesir jala tinggal disi, dang na lao malua manang selamat nasida sian jea. Masihol situtu do roha ni nasida naeng mulak tu Juda jala tinggal disi. Alai dang adong na boi mulak sian nasida tu Juda. Dang adong be na lao mulak, asing ni piga-piga halak na malua i.’”
15 Dung i ro ma sude halak na tinggal di Mesir,+ di Patros,+ rap dohot punguan ni godang halak, i ma akka bawa na mamboto istri ni nasida mangalehon pelean tu debata na asing, dohot akka istri ni nasida na jongjong disi. Didapotton nasida ma si Jeremia jala didok ma,
16 “Dang olo hami manangihon sude hata na pinaboam tu hami marhite goar ni Jahowa.
17 Alai ikkon ulahononnami do sude hata naung kaluar sian pamangannami. Ikkon lehononnami do pelean, jala ikkon diusehon hami do pelean siinumon+ tu Ratu Surga.* Songon i do najolo diulahon hami dohot akka ompunami, dohot akka rajanami, dohot akka pamimpinnami di akka kota na di Juda dohot di akka dalan di Jerusalem. Ai di tikki i, butong do hami mangallang roti, cukkup do sude sipanganonnami, jala dang hona mara hami di tikki i.
18 Alai mulai sian na so dilehon hami akka pelean tu Ratu Surga* i, jala dang diusehon hami akka pelean siinumon tu ibana, gabe hurangan do hami di sasude. Mate do hami dibahen podang dohot haraparon.”
19 Laos didok akka borua i do, “Dipaloas akka suaminami do hami mangalehon pelean tu Ratu Surga,* jala mangusehon pelean siinumon tu ibana. Diboto nasida do dibahen hami akka kue na marbentuk Ratu Surga lao gabe pelean tu ibana.”
20 Dung i makkatai ma si Jeremia tu sude jolma na pungu disi, tu akka ama-ama, dohot tu akka istri ni nasida, dohot tu sude halak na makkatai tu ibana. Didok ibana ma,
21 “Dang lupa Jahowa tu akka pelean na dilehon hamu, akka ompumuna, akka rajamuna, akka pamimpinmuna, dohot na dilehon sude halak na di luat on di akka kota na di Juda dohot di akka dalan na di Jerusalem.+ Diingot Ibana do sudena i!
22 Dang tarpaida-ida ni Jahowa be pangalahomuna na jahat i dohot pambahenanmuna na dihagigihon i. Alani i do dibahen Ibana tarulang luat on, gabe inganan na massai ngeri, gabe diburai halak, jala dang diingani be songon na masa saonari.+
23 Ai dilehon hamu do akka pelean i jala nungnga mardosa hamu tu Jahowa. Dang dioloi hamu hata ni Jahowa, dang diihutton hamu patikna, parettana, dohot sipasingot sian Ibana. Alani i do masa jea on tu hamu songon na masa saonari.”+
24 Dung i didok si Jeremia ma muse tu sude halak dohot tu sude borua i, “Ale hamu halak Juda na tinggal di Mesir, tangihon hamu ma hata ni Jahowa.
25 Songon on ma hata ni Jahowa, Pamimpin ni Akka Tentara, Debata ni Israel, ‘Nungnga diulahon hamu dohot akka istrimuna be janji na binahenmuna i. Digohi hamu do sudena i marhite tanganmuna. Didok hamu do, “Pasti ikkon ulahononnami do janji naung binahennami lao mangalehon pelean tu Ratu Surga* jala mangusehon pelean siinumon tu ibana.”+ Hamu akka bawa dohot akka istrimuna, pasti ulahononmuna jala pasautonmuna do janjimuna i.’
26 “Alani i tangihon ma hata ni Jahowa, hamu halak Juda na tinggal di Mesir, ‘“Marsumpa ma Au di bagasan goarhu na sangap i,” ninna Jahowa, “dang adong be nanggo sahalak pe sian halak Juda+ na tinggal di luat ni Mesir na mandok goarhu di bagasan sumpana. Dang dohonon ni nasida be, ‘Marsumpa ma au songon pastina mangolu* Jahowa Tuan Natumimbul i!’+
27 Saonari nungnga hutottuhon be di rohakku, dang na lao bahenokku na denggan tu hamu. Alai parookku ma jea tu hamu.+ Na lao mate nama sude halak Juda na tinggal di Mesir dibahen podang dohot haraparon, sahat tu na mate nasida sude.+
28 Holan piga-piga halak do na selamat sian podang jala na boi mulak sian Mesir tu Juda.+ Sian i, botoon ni sude halak Juda na lao tu Mesir i ma hata ni ise do na saut, hatakku do manang hata ni nasida!”’”
29 “‘On ma tanda na lao lehonokku tu hamu,’ ninna Jahowa, ‘tanda na patuduhon pasti hukumokku do hamu di inganan on. Sian i botoonmuna ma, pasti saut do hatakku taringot tu jea na lao parookku tu hamu.
30 Songon on ma hata ni Jahowa, “Pasahatonku ma si Firaun Hopara raja ni Mesir i tu tangan ni akka musuna dohot tu tangan ni akka halak na naeng pamatehon ibana. Pasahatonku ma ibana dos songon di tikki Au pasahatton si Sedekia raja ni Juda tu tangan ni si Nebukadnesar* raja ni Babel, i ma tu tangan ni musuna dohot tu tangan ni halak na naeng pamatehon ibana.”’”+
Surat na di toru
^ Manang “Mempis”.
^ Manang “Sebaot”, lapatanna pamimpin ni akka suru-suruan na di banua ginjang.
^ As. “Sai tibu do Au dungo manogot lao manuru”.
^ Manang “dang dipatutoru hamu dirimuna”.
^ Gelar tu dewi na disomba ni halak Israel naung manimbil. Dewi na didok nasida boi mambahen sahalak borua marianakkon.
^ Gelar tu dewi na disomba ni halak Israel naung manimbil. Dewi na didok nasida boi mambahen sahalak borua marianakkon.
^ Gelar tu dewi na disomba ni halak Israel naung manimbil. Dewi na didok nasida boi mambahen sahalak borua marianakkon.
^ Gelar tu dewi na disomba ni halak Israel naung manimbil. Dewi na didok nasida boi mambahen sahalak borua marianakkon.
^ Sumpa on patuduhon pasti do ikkon saut janji on, songon pastina Debata mangolu.
^ As. “Nebukadresar”, ejaan na asing tu goar on.
