Jeremia 49:1-39
49 Songon on ma hata ni Jahowa taringot tu halak Ammon,+
“Na so adong do anak ni si Israel?
Na so adong do na lao mampartahatton tanona?
Boasa dibuat Malkam+ tano parbagianan ni si Gad?+
Jala boasa tinggal akka na manomba Malkam di kota ni Israel?”
2 “‘Alani i, ida ma! Juppang ma tikkina,’ ninna Jahowa,‘Juppang ma tikkina bahenokku ma tarbege tanda ni na lao marporang* mangalo Rabba+ kota ni halak Ammon i.+
Gabe songon dolok na tarulang ma kota i,Jala ditutung ma akka kota na di sakalilingna.’
‘Buaton ni halak Israel ma luat ni akka halak na mambuat tanona,’+ ninna Jahowa.
3 ‘Ale Hesbon, tangis ma ho sagogo ni gogona, nungnga hancur be kota Ai!
Mangandungi ma hamu akka penduduk ni kota na di sakaliling ni Rabba.
Pakke ma abit goni.
Tangis ma sagogo ni gogona jala mardalani ma di tonga-tonga ni akka kandang* ni binatang,Ai diboan musu nama Malkam,Rap dohot akka malim dohot akka pamimpin na marhobas tu ibana.+
4 Ale kota na so setia, boasa dipangasahon ho akka rurami,Akka rura na godang i aekna?Diasakkon ho do artam,Didokkon ho do, “Ise ma na barani mangalo au?”’”
5 “‘Parookku ma tu ho na parohon biar,’ ninna Jahowa Tuan Natumimbul i, Pamimpin ni Akka Tentara.*‘Parookku ma i sian sude inganan na di sakalilingmu.
Marserak ma ho tu sude inganan,Jala dang adong na lao papunguhon akka halak na lari.’”
6 “‘Alai dukkon masa i, papunguokku do akka halak Ammon naung diboan musu,’ ninna Jahowa.”
7 Songon on ma hata ni Jahowa Pamimpin ni Akka Tentara taringot tu Edom,
“Na so adong be bisuk di Teman?+
Na so adong be halak na malo na boi mangalehon poda na denggan?
Na so marguna be bisuk ni nasida i?
8 Mundur ma hamu jala lari!
Ale penduduk ni Dedan,+ martabuni ma hamu tu akka rura na bagas!
Ai parookku nama jea tu si Esau,Molo dung juppang tikkina manghukum ibana.
9 Molo ro akka halak lao mamanen anggur,Tottu tinggalhononna do i deba di halak na asing.
Molo ro panakko di tikki borngin,Holan na porlu di nasida do buatonna.+
10 Alai bahenokku ma si Esau salang-salang.
Bukkaokku ma akka inganan partabunianna,Asa unang boi be ibana martabuni.
Pamateonku+ ma sude anakna, haha anggina, dohot tetanggana,Jala dang na lao adong be ibana.+
11 Tinggalhon ma akka anakkonmu na so marama i,Urusokku do nasida,Jala marpos ni roha tu Au nama akka inamuna na mabalu.”
12 Ai songon on do didok Jahowa, “Ida ma! Tung boi ma ho malua sian hukuman? Ai haru halak na so tama minum sian makkuk rimashi pe ikkon minum do sian makkuk i. Lam ma ho, pasti ikkon dihukum do ho. Jala ikkon minum do ho sian makkuk i.”+
13 “Marsumpa ma Au marhite dirikku sandiri,” ninna Jahowa, “na lao gabe inganan na massai ngeri+ nama huta Bosra. Dileai halak ma huta i, dihancurhon, jala diburai. Jala maruppak ma sude kotana saleleng ni lelengna.”+
14 Nungnga hubege barita sian Jahowa,Nungnga disuru sasahalak tu tonga-tonga ni akka bangso lao mandok,
“Marpungu ma hamu jala maju ma mangalo ibana,Parade hamu ma dirimuna lao marporang.”+
15 “Ida ma! Nungnga hubahen be leas roha ni akka bangso mangida ho,Jala dang adong be na pasangappon ho.+
16 Alai ho na tinggal di inganan na aman na adong di dolok batu,Dohot di dolok na untimbo,Nungnga hona tipu be ho dibahen biar ni roha na binahenmu,Dohot ginjang ni rohami.
Ai nang pe songon timbo ni asar ni lali ingananmu dibahen ho,Alai paturunokku do ho sian i,” ninna Jahowa.
17 “Gabe inganan na massai ngeri+ ma luat ni Edom. Ganup halak na lewat sian i tarsonggot jala mabiar. Direhei nasida ma luat i alani sude jea na masa tu luat i.
18 Dos songon huta Sodom dohot Gumora dohot akka kota na di sakalilingna naung hancur,+ songon i ma na masa,” ninna Jahowa, “dang adong nanggo sahalak pe na tinggal disi, manang na maringanan disi.+
19 “Ida ma! Songon singa+ na kaluar sian tombak na di labbung ni Sunge Jordan na ro menyerang inganan panjappalan na aman di Edom, songon i ma sasahalak ro lao mangalo Edom. Alai lari do ibana bahenokku sian luat i. Bahenokku ma halak na tarpillit i mangarajai luat i. Ai ise ma huroa na songon Au? Ise ma na boi mangalo Au? Ise ma parmahan na boi mangabbati lomo ni rohakku?+
20 Alani i ale jolma, tangihon ma aha naung ditottuhon Jahowa taringot tu Edom, jala aha na dipikkirhon Ibana taringot tu penduduk ni Teman:+
Pasti disarat do akka anak ni biru-biru,
Jala tarulang do bahenonna inganan ni nasida alani pangalaho ni nasida.+
21 Humutur do tano on alani soara ni nasida tikki na madabu i.
Adong do soara ni na mangandungi!
Tarbege do soara i sahat tu Laut Merah.+
22 Ida ma! Dos songon lali na habang timbo jala turun lao manakkup mangsana,+Songon i ma ibana pahembangkon habongna tikki ro mangalo Bosra.+
Di ari i mabiar ma akka tentara ni Edom,Dos songon pakkilalaan ni sahalak borua na naeng partus.”
23 Songon on ma hatana taringot tu Damaskus,+
“Nungnga dipaila be penduduk ni kota Hamat+ dohot penduduk ni kota Arpad.Ai dibege nasida do barita na roa.
Gabe mabiar ma roha ni nasida,
Dos songon aek na di laut ma akka jolma na so hea tenang alani biarna.
24 Nungnga mago be habaranion ni Damaskus.
Naeng lari do ibana, alai dang tolap alani biarna.
Busisaon do ibana jala nungnga haccitan,Songon borua na naeng partus.
25 Boasa dang ditinggalhon halak dope akka kota na sai dipuji i,Kota na sai marlas ni roha i?
26 Marragean ma akka doli-dolina di akka lapangan ni kota i,Jala mate ma sude akka tentarana di ari i,” ninna Jahowa Pamimpin ni Akka Tentara.
27 “Tutungokku ma tembok ni Damaskus,Jala rarat ma apina i manutung akka menara na marbenteng na di Ben-hadad.”+
28 Songon on ma hata ni Jahowa tu Kedar+ dohot tu akka harajaon ni Hazor, na ditaluhon ni si Nebukadnesar* raja ni Babel i,
“Lao ma hamu, nakkok tu Kedar,Hancurhon hamu ma akka halak na tinggal di Timur.
29 Dirampas ma kemah ni nasida, hambing ni nasida, dohot biru-biru ni nasida,Kain kemah ni nasida dohot sude arta ni nasida.
Diboan ma akka unta ni nasida,Jala marsurak ma akka halak na disi tu nasida, huhut mandok, ‘Holan biar ni roha do manang didia pe!’”
30 “Lari ma hamu jala lao ma hamu dao, ale penduduk ni Hazor!
Martabuni ma hamu di akka rura na bagas,” ninna Jahowa.
“Ai nungnga dibahen si Nebukadnesar* raja ni Babel i songon dia cara lao mangalo hamu,Jala nungnga dipikkirhon ibana rencana songon dia lao mangalo hamu.”
31 “Maju ma hamu jala lao ma hamu mangalo bangso na sonang ngoluna, bangso na tinggal di inganan na aman!” ninna Jahowa.“Dang adong pintuna manang palangna.
Jala pulik do nasida tinggal di inganan na asing.
32 Dirampas ma unta ni nasida,Dibuat ma sude akka binatang na dipiaro nasida na massai godang i.
Akka halak na mancukkur jabbang ni nasida sappe habis,+Bahenokku marserak tu sude inganan.*Parookku ma jea sian sude inganan tu atas ni nasida,” ninna Jahowa.
33 “Gabe inganan ni anjing hutan ma kota Hazor,Jala tarulang ma inganan i saleleng ni lelengna.
Dang adong nanggo sahalak pe na tinggal disi,Manang na maringanan disi.”
34 Di mula ni pamarettaon ni si Sedekia+ raja ni Juda i, songon on ma didok Jahowa tu Panurirang* Jeremia taringot tu Elamit,+
35 “Songon on ma hata ni Jahowa Pamimpin ni Akka Tentara, ‘Ponggolhonokku ma panah ni Elamit,+ i ma sinjata na mambahen nasida jago.
36 Parookku ma alogo sian sude inganan* tu atas ni Elamit, jala bahenokku ma nasida marserak tu sude inganan i. Marserak ma akka halak Elamit tu sude bangso.’”
37 “Hancurhonokku ma halak Elamit di jolo ni musu ni nasida dohot di jolo ni akka halak na naeng pamatehon nasida. Parookku ma jea tu nasida, i ma rimashu na marsigorgor i,” ninna Jahowa. “Parookku ma podang lao mangalele nasida sappe mate nasida sude.”
38 “Bahenokku ma tahtakku di Elamit,+ jala pamateonku ma raja dohot pamimpin ni Elamit,” ninna Jahowa.
39 “Alai di ujung ni akka na masa i, papunguokku do muse akka halak Elamit naung diboan musu,” ninna Jahowa.
Surat na di toru
^ Manang boi do “tarbege soara ni na marsurak lao marporang”.
^ Kandang na dibahen sian batu.
^ Manang “Sebaot”, lapatanna pamimpin ni akka suru-suruan na di banua ginjang.
^ As. “Nebukadresar”, ejaan na asing tu goar on.
^ As. “Nebukadresar”, ejaan na asing tu goar on.
^ As. “tu arah ni alogo mangullus”.
^ As. “opat alogo na sian opat suhi ni langit”.
