Jesaya 13:1-22
13 On ma barita panguhuman tu Babel+ na niida ni si Jesaya+ anak ni si Amos marhite parnidaan:
2 “Angkat ma sada tanda*+ di dolok batu naung gundul.
Jou ma nasida jala bahen ma tanganmu songon tanda lao mangarahon nasida,Asa masuk nasida tu pintu ni akka na sangap.
3 Nungnga hulehon paretta tu akka halak na hupillit.*+
Nungnga hujou akka tentarakku lao patuduhon murukku,Akka halak na marlas ni roha jala na hubanggahon.
4 Tangihon ma! Adong soara ni halak na rame di dolok,Soarana songon soara ni halak na marpungu!
Tangihon ma! Nungnga gaor akka harajaon,Nungnga marpungu akka bangso!+
Jahowa Pamimpin ni Akka Tentara* mangatur tentarana lao marporang.+
5 Jahowa dohot akka halak* na dipakke Ibana lao patuduhon murukna,Ro sian luat na dao,+Sian inganan na undao di toru ni langit on,*Lao mambahen hancur portibi on.+
6 Gogo ma hamu mangangguki, ai nungnga jonok ari ni Jahowa!
Di ari i, hancur ma bahenon ni Pargogo na So Hatudosan i sude na adong di luatmuna.+
7 Alani i ma gabe gale-gale sude tangan ni jolma,Jala gabe mabiar roha ni ganup halak.+
8 Tarsonggot ma akka halak jala busisaon.+
Kejang-kejang ma nasida jala haccit ma dihilala,Dos songon borua na naeng partus.
Marsiberengan ma nasida jala mabiar,Marmera do bohi ni nasida alani haccit ni sitaonon i.
9 Ida ma! Nungnga ro ari ni Jahowa,Muruk do Ibana jala marsigorgor do rimasna,Di ari i, dang asi rohana manang tu ise pe.Bahenonna ma luat i gabe inganan na seram,+
Jala pamateonna ma sude halak na mardosa sian luat i.
10 Ai dang marsinondang be akka bintang na di langit,+Dohot sude punguan ni bintangna,*Holom nama mataniari di tikki bissar,Jala dang marsinondang be bulan.
11 Hukumokku ma pangisi ni tano on alani hajahaton ni nasida,+Dohot akka parjahat alani dosa ni nasida.
Bahenokku ma marujung ginjang ni roha ni halak na lancang,Jala patutoruokku ma ginjang ni roha ni halak na kejam.+
12 Bahenokku ma ummura dapot mas murni sian apala jolma,+Ummaol ma jolma dapot sian mas Opir.+
13 Alani i ma hubahen humutur langit,Humutur tano on jala meret sian ingananna+Ai muruk situtu do Jahowa Pamimpin ni Akka Tentara di ari rimasna na marsigorgor i.
14 Songon kijang na dilele, jala songon biru-biru na so marparmahan,Songon i ma ganup halak mulak tu bangsona,Jala ganup halak lari tu luatna be.+
15 Manang ise na dapot ditusuk do,Jala manang ise na tartakkup dipamate do pakke podang.+
16 Dibunu ma akka anak ni nasida di jolo ni mata ni nasida,+Dipambuati ma arta sian jabu ni nasida,Jala diperkosa ma akka istri ni nasida.
17 Hujujui ma halak Media ro mangalo nasida,Dang arga perak di halak Media,+Jala dang lomo roha ni nasida tu mas.
18 Hancur ma akka doli-doli bahenon ni panah ni nasida,+Dang parduli nasida tu poso-posoJala dang asi roha ni nasida tu dakdanak.
19 Jala Babel, harajaon na ussangap* sian sude harajaon,+Luat na uli jala na dibanggahon halak Kasdim,+Gabe songon Sodom dohot Gumora ma tikki dihancurhon Debata nasida.+
20 Dang adong be halak na olo maringanan disi,Jala dang diingani be i sahat tu saleleng ni lelengna.+
Dang pajongjongon ni halak Arab kemahna disi,Jala dang pasombuon ni parmahan maradi binatang ni nasida disi.
21 Binatang na di padang pasir ma na modom disi,Gok ma burung hantu di jabu ni nasida.
Maringanan ma disi burung unta,+Jala mangakkati ma disi akka hambing liar.*
22 Marauang ma akka binatang di menarana,Jala marauang ma anjing hutan di istanana na uli.
Nungnga jonok be tikki ni Babel lao dihancurhon, jala dang palelengonna be i.”+
Surat na di toru
^ Manang “sada tiang na gabe tanda”.
^ As. “hupabadia”.
^ Manang “Sebaot”, lapatanna pamimpin ni akka suru-suruan na di banua ginjang.
^ As. “Sian ujung ni akka langit”.
^ Manang “akka sinjata”.
^ As. “akka Kesilna”. On goar ni punguan ni akka bintang. Molo diida sian tano on, boi do i gabe songon bentuk ni binatang manang na asing.
^ Manang “ummuli”.
^ Manang boi do “debata na so sittong na songon hambing”.
