Jesaya 3:1-26
3 Ida ma! Jahowa Pamimpin ni Akka Tentara* jala Tuan na sittongPadaohon sude akka pangurupion sian Jerusalem dohot Juda,Padaoonna do sude sipanganon dohot siinumon sian nasida,+
2 Bawa na gogo dohot tentara,Hakim dohot panurirang,*+ peramal, dohot pamimpin,
3 Pamimpin ni 50 halak,+ pejabat, dohot penasehat,Na malo mamakke ilmu sihir, dohot na malo mamakke ilmu gaib.+
4 Bahenonna* ma dakdanak gabe pamimpin ni nasida,Dohot halak na so hot pendirianna mamaretta nasida.
5 Bahenon ni nasida ma donganna susa,Ganup halak manusai donganna be,+
Mangalo ma dakdanak tu na matua,Jala dang diargai halak na so marguna halak na sangap.+
6 Tiopon ni ganup halak ma tangan ni keluargana na di jabu ni bapakna. Dokkononna ma,
“Adong do jubahmu, ho ma na gabe pamimpinnami.
Urus ma inganan naung hancur on.”
7 Alai dohononna ma na so olo ibana di ari i. Didok ma,
“Dang olo au pamaluppon lukkamuna,Haru baju dohot sipanganon dang adong di jabukku.
Unang ma au bahen hamu gabe pamimpin ni bangso on.”
8 Nungnga dabu Jerusalem,Jala nungnga maruppak Juda,Ai dialo nasida do Jahowa marhite hata dohot pangalaho ni nasida,Jala di jolo ni Debata na marmulia i, mangalo do nasida.+
9 Sian bohi ni nasida tarida do akka na binahen ni nasida,Dipaboa-boa nasida do dosa ni nasida songon halak Sodom,+Dang ditabunihon nasida i.
Marjea ma nasida, ai na parohon jea tu dirina sandiri do nasida disi!
10 Paboa ma tu halak na tigor roha, sai na denggan do ngolu ni nasida,Dapotan upa do nasida sian parniulaon ni nasida.*+
11 Marjea ma akka na jahat!
Ai ro nama hasusaan tu ibana,Songon dia dibahen ibana tu halak na asing, songon i ma dibahen tu ibana!
12 Alai taringot tu bangsokku, jahat do akka mandor ni nasida.Borua do na mamaretta nasida.
Ale bangsokku, lilu do hamu dibahen pamimpinmuna,Jala dang diboto hamu dalan na ikkon sidalananmuna.+
13 Nungnga rade be Jahowa lao gabe hakim,Jongjong do Ibana lao paboahon hukuman tu akka bangso.
14 Diadili Jahowa ma akka pamimpin dohot akka pejabat ni bangsona, ninna ma,
“Nungnga ditutung hamu be sude ladang anggur sappe habis,Jala disippan hamu do di jabumuna sude na ditakko hamu sian na pogos.”+
15 Didok Jahowa Tuan Natumimbul jala Pamimpin ni Akka Tentara i ma muse,“Boasa barani hamu manusai bangsokki?
Jala boasa disiksa hamu halak na pogos?”+
16 Didok Jahowa ma, “Ai ginjang do roha ni boru Sion,Diangkat do uluna doppak ginjang* tikki mardalan,Main mata do nasida jala asing do dibahen pangeol ni patna tikki mardalan,Asa tarbege soara ni golang ni patna i,
17 Bahenon ni Jahowa ma korengon ulu ni boru Sion,Jala bahenon ni Jahowa ma dang tubu obuk di ulu ni nasida.*+
18 Di ari i, buaton ni Jahowa ma akka perhiasan ni nasida, i ma golang ni patna,Ikkat ni uluna, perhiasan na songon bulan sabit,+
19 Anting-anting,* golang, dohot tudung ni uluna,
20 Hiasan na di uluna, golang ni patna, ikat pinggangna,Inganan ni miak na angur, dohot jimat,*
21 Cincin dohot anting na di igung,
22 Jubah tu pesta, rompi, jubah, dohot tas na gelleng,
23 Kaca+ na gelleng, dohot baju linen,*Sorban, dohot tutup ni ulu na ganjang.
24 Nang pe saonari songon miak balsam*+ na angur nasida, bahenonna ma nasida gabe uap na busuk,Nang pe saonari marikkat pinggang nasida, haduan tali nama pakkeonna,Nang pe saonari bagak obuk ni nasida, haduan botak+ do nasida,Nang pe saonari marbaju na arga nasida, haduan abit goni+ nama pakkeonna,Nang pe saonari uli nasida, haduan adong do bekas lukka* di daging ni nasida.
25 Marmatean ma akka bawa di kotam dibahen podang,Jala mate ma akka tentaram di parporangan.+
26 Mangandungi ma akka gerbang ni Sion jala marlungun ni roha,+Jala hundul ma ibana di tano.”+
Surat na di toru
^ Manang “Sebaot”, lapatanna pamimpin ni akka suru-suruan na di banua ginjang.
^ As. “Bahenokku”.
^ As. “Allangon ni nasida do parbue ni na niula nasida”.
^ As. “Dipaganjang do rukkungna”.
^ Manang “di ulu ni nasida bagian jolo”.
^ Manang “Mainan ni kalung”.
^ Manang “jimat na sian kerang”.
^ Manang “baju dalam”.
^ Miak na angur na sian suan-suanan dohot hau.
^ Na nidokna dison, i ma tanda dibahen pakke bosi na ditutung na didaisson tu daging ni hatoban manang halak na dihurung.
