Jesaya 33:1-24
33 Marjea ma ho, halak na mambahen hancur na so dihancurhon dope,+Penghianat na so dihianati dope!
Dung sae dibahen ho hancur na asing, dihancurhon ma ho.
Dung sae dihianati ho na asing, dihianati ma ho.+
2 Ale Jahowa, patudu ma asi ni roham tu hami.+
Marhaposan tu Ho do hami.
Urupi* ma hami ganup manogot marhite tanganmi,+Palua ma hami tikki susa hami.+
3 Tikki tarbege soaram na gogo i, lari ma akka bangso.
Molo hehe Ho, marserak ma akka bangso.+
4 Rampason ni halak ma artamuna songon sihapor* na mokkus na pahabisson manang aha pe,Hatop do i buaton ni nasida, dos songon pangallang ni sapunguan sihapor.
5 Dipasangap ma Jahowa,Ai maringanan di inganan na timbo do Ibana.
Bahenonna do hasittongan dohot hatigoran manggohi Sion.
6 Di tikki i, bahenonna ma dame ngolum.Paluaonna ma ho marhite cara na palongang roha, bisuk,+ parbinotoan, dohot biar mida Jahowa,+I ma na gabe artana.
7 Ida ma! Marsurak ma di dalan akka tentara ni nasida* na barani,Jala mangangguki ma sappe mokkik-hokkik akka halak na disuru lao mangalului pardamean.
8 Tarulang ma akka dalan,Jala dang adong na mardalan sian i.
Dilanggar musu i do parjanjian,Nungnga dileai ibana akka kota,Dang parduli ibana manang na tu ise pe.+
9 Marsak situtu* ma luat i jala gabe harsang.
Maila ma Libanon, jala nungnga busuk be i.+
Nungnga songon gurun be Saron,Jala marurus ma akka bulung-bulung di Basan dohot di Karmel.+
10 “Saonari, hehe nama Au,” ninna Jahowa,“Bahenokku nama mulia Au,+Jala bahenokku nama sangap dirikku.
11 Akka halak na jahat do hamu, dang marguna sude na di rohamuna i dohot na diulahon hamu.
Dos songon ramba na koring dohot durame do sudena i.
Suda ma hamu bahenon ni pangalahomuna na roa i, dos songon na disudahon api.+
12 Gabe songon sisa ni panutungan ni batu kapur ma akka halak.
Dos songon ramba na marsuga-suga na dirambas, na lao ditutung tu api.+
13 Sude hamu na dao, bege hamu ma aha na lao huulahon!
Jala hamu na jonok, akkui hamu ma na massai gogo Au!
14 Mabiar+ ma akka halak na mardosa di Sion.Hitir-hitir ma akka halak na manimbil:
‘Ise ma sian hita na boi tahan tinggal di inganan ni api na marsigorgor?+
Ise ma sian hita na boi tinggal di labbung ni api na torus galak?’
15 Halak na toktong mardalan di dalan na sittong,+Halak na makkatahon na tikkos,+Na so olo manjalo uttung marhite manipu,Na so olo mangido manang mambuat sogok,+Na manutup pinggolna asa unang mambege rencana ni pambunu,Jala na manutup matana asa unang mangida akka na roa,
16 Ibana ma na lao tinggal di inganan na timbo,Di dolok batu na togu do inganan parlinggomanna na aman,Sai diparade do rotina,Jala dang hea habis aek siinumonna.”+
17 Idaonmuna ma sahalak raja na sangap,Idaon ni nasida ma luat na dao.
18 Tikki diingot* hamu akka hasusaan na hea masa i, didok hamu ma di bagasan rohamuna:
“Didia do sekretaris i?
Didia do halak na mangido asa tagarar pajak tu ibana?+
Didia do halak na mangetong akka menara i?”
19 Dang idaonmuna be bangso na mangaleai hamu,Bangso na maol taattusi bahasana,Na asing pakkulingna, jala na so boi attusanmuna bahasana.+
20 Ida hamu ma doppak kota Sion, inganatta mambahen perayaan!+
Idaonmuna ma Jerusalem sada kota na aman lao diingani,Tung na so hea be kemah i dipapinda.+
Dang na lao dicabut be akka patok ni kemah i,Jala dang na lao digotap akka talina.
21 Disi do Jahowa Debata na Gogo i,Linggomanna ma hita dos songon sunge manang bondar na bidang na mangalinggomi sada luat,Dang na lao masuk kapal tusi,Jala dang na lao mamolus kapal na balga sian i.
22 Ai Jahowa do Hakim+ di hita,Jahowa do Silehon Patik+ tu hita,Jahowa do Rajatta,+Jala Ibana do na lao paluahon hita.+
23 Digattukkon ma akka tali ni kapal ni musu,Dang boi tigor jongjong tiangna jala dang boi herbang layarna.
Di tikki i, alani godangna, dibagi-bagi ma akka barang na dibuat sian musuHaru halak na pakpang pe godang do dapotna.+
24 Dang adong nanggo sahalak pe na maringanan* disi na mandok, “Marsahit do au.”+
Ai disesa nama hasalaan+ ni akka halak na tinggal di luat i.
Surat na di toru
^ Manang “Pargogoi”.
^ Manang “belalang”.
^ Ra na nidokna dison, i ma Juda.
^ Manang boi do “Koring situtu”.
^ Manang “dirimangi”.
^ Manang “Dang adong penduduk”.
