Jesaya 58:1-14
58 “Marsurak ma ho sagogo ni gogom, unang pola tahan!
Pagogo ma soaram songon soara ni tarompet na sian tanduk.
Paboa ma tu bangsokki naung mangalo nasida,+Jala paboa ma tu pinoppar ni si Jakkob akka dosa ni nasida.
2 Ganup ari do nasida mangalului Au,Jala dipatudu nasida do na lomo roha ni nasida mamboto akka dalanku,Asa songon bangso na mangulahon na sittong nasida,Na so manadikkon paretta ni Debata ni nasida.+
Dipangido nasida do asa tigor Au tikki mangadili,Jala didok do na las roha ni nasida jonok tu Debata.+
3 Saonari didok nasida ma, ‘Boasa dang diida Ho hami tikki marpuasa?+
Boasa dang parduli Ho tu hami tikki dipatudu hami na manolsoli hami alani dosanami?’*+
Ai tikki marpuasa hamu, mangalului uttung do hamu tu dirimuna sandiri,*Jala dipaksa hamu do parkarejomuna mangulahon karejo na borat.+
4 Dung sae hamu marpuasa, marbadai, jala marsipukkulan do hamu,Sagogo ni gogona do hamu manumbuki.
Sasittongna, dang boi hamu marpuasa songon na binahenmuna sadari on,
Unang dirippu hamu hubege soaramuna sian surgo.
5 Ai songon on do huroa puasa na hupangido:Holan lao patuduhon na manolsoli do sasahalak sian dosana di ari i,Lao paundukkon uluna songon ramba na timbo,Lao mambahen kain goni dohot orbuk gabe podomanna?
Songon i do na didok hamu mangulahon puasa na mambahen las roha ni Jahowa?
6 Dang songon i puasa na hupangido, songon on do:
Lao mambolokkon ratte ni hajahaton do puasa i,Lao mambukka pangikkat ni auga,*+Lao paluahon akka halak na hona tindas,+Jala lao mamonggolhon sude auga,
7 Lao mambagi rotim tu akka na male,+Lao mamboan tu jabum halak na pogos dohot na so adong jabuna,Lao mangalehon baju tu halak na so marpakkean,*+Jala unang manjua ho lao mangurupi keluargam.
8 Marsinondang ma hatiuronmu dos songon parbissar ni mataniari,+Jala satokkin nai pamalumonna ma ho.
Akka na sittong mardalan di jolom,Jala hamuliaon ni Jahowa manjaga ho sian pudim.+
9 Tikki jou-jou ho, Au Jahowa mangalusi ho,Tikki dipangido ho asa huurupi, alusakku ma, ‘Dison do Au!’
Molo dibolokkon ho auga na manusai akka halak,Dang sai tudu-tudu jari-jarim tu akka halak, jala dang jahat be ho makkatai,+
10 Molo dilehon ho akka na dihalomohon roham tu halak na male,+Jala dibahen ho sonang roha ni halak na susa,Marsinondang ma hatiuronmi nang pe di inganan na holom,Jala gabe tiur ma haholomonmi dos songon tikki arian.+
11 Sai ditogu-togu Jahowa ma ho,Jala toktong do dilehon Ibana na porlu di ho, nang pe di inganan na harsang,+Bahenonna do lam gogo holi-holim,Dos ma ho songon porlak na toktong maraek,+Songon mata mual na so hea koring.
12 Alani ho, bangunon ni halak ma akka inganan naung leleng hancur,+Padengganonmu ma fondasi naung adong sian tikki naung salpu.+
Dohonon ni halak ma ho halak na padenggatton tembok na hancur,*+Halak na padenggatton dalan di inganan na lao diingani.
13 Molo alani ari Sabat i do gabe dang dilului ho uttung tu dirim sandiri, i ma di arikku na badia i,+Jala didok ho ari na massai sonang do ari Sabat i, ari na badia ni Jahowa, ari na pasangappon Debata,+Jala uppetting do i di ho sian apala mangalului uttung tu dirim sandiri, dohot makkatahon akka na so marguna,
14 Marlas ni roha situtu ma ho alani Jahowa.Bahenokku ma ho mangarajai akka inganan na timbo* na di tano on.+
Bahenokku ma allangonmu hasil na sian* parbagianan ni si Jakkob ompumi,+Ai pamangan ni Jahowa sandiri do na mandok i.”
Surat na di toru
^ Na nidokna dison, i ma marpuasa manang mangulahon ulaon na asing lao patuduhon lungun ni rohana.
^ Manang “hasonanganmuna sandiri do na dilului hamu”.
^ Manang “na salang-salang”.
^ As. “padenggatton lubang-lubang”.
^ Manang “Bahenokku ma sonang ngolum di”.
