Jesaya 7:1-25
7 Di tikki ni si Ahas,+ anak ni si Jotam, pahoppu ni si Usia, raja ni Juda i, ro ma si Resin raja ni Siria rap dohot si Peka+ anak ni si Remalia raja ni Israel. Ro ma nasida marporang mangalo Jerusalem. Alai dang boi ditaluhon ibana* i.+
2 Sahat ma barita tu istana harajaon* ni si Daud. Didok ma, “Nungnga marsada Siria dohot Epraim.”
Gabe mabiar jala makkahitir ma roha ni si Ahas dohot roha ni bangso i, songon hau na di tombak na humutur alani alogo.
3 Dung i didok Jahowa ma tu si Jesaya, “Lao ma ho rap dohot anakmu si Sear-jasub.*+ Juppangi hamu ma si Ahas di ujung ni saluran ni aek na sian kolam parginjang,+ na di dalan lao tu inganan ni akka panussi.
4 Ikkon dohononmu do songon on tu ibana, ‘Tenang ma ho. Unang pola ganggu roham. Ai nang pe muruk si Resin raja ni Siria dohot anak ni si Remalia,+ songon dua batang ni hau na lao habis tartutung do nasida.
5 Ai nungnga marsada raja ni Siria dohot Epraim, dohot anak ni si Remalia lao mambahen na jahat tu ho. Didok nasida do,
6 “Beta! Lao ma hita mangalo Juda. Tahancurhon* ma kota i jala tataluhon.* Tapillit ma anak ni si Tabel gabe rajana.”+
7 “‘Songon on ma didok Jahowa Tuan Natumimbul i,
“Dang na lao marhasil nasida,Dang na lao saut i.
8 Ai Damaskus do ibukota ni Siria,Jala si Resin do raja ni Damaskus.
Di bagasan 65 taon,Dihancurhon ma Epraim jala dang tarpapungu be nasida gabe sada bangso.+
9 Samaria+ do ibukota ni Epraim,Jala anak ni si Remalia do raja ni Samaria.+
Alai molo dang togu haporseaonmuna,Dang na lao selamat hamu.”’”
10 Didok Jahowa ma muse tu si Ahas,
11 “Pangido ma tanda sian Jahowa Debatam.+ Tanda i boi do songon bagas ni Kuburan* manang songon timbo ni langit.”
12 Alai didok si Ahas ma, “Dang olo au mangido tanda. Jala dang olo au manguji Jahowa.”
13 Didok si Jesaya ma, “Ale pinoppar ni si Daud, tangihon hamu ma. Dang cukkup dope di hamu holan manguji hasabaron ni jolma? Ikkon dohot do ujionmuna hasabaron ni Debata?+
14 Alani i, lehonon ni Jahowa ma tu hamu sada tanda: Ida ma! Hamil ma sahalak anak boru.* Ditubuhon ibana ma sada anak,+ jala dibahen ma goarna si Immanuel.*+
15 Allangon ni dakdanak i ma mentega dohot madu, molo dung diboto ibana pasidikkon na jahat dohot mamillit na denggan.
16 Andorang so diboto dakdanak i cara pasidikkon na jahat dohot mamillit na denggan, tarulang do sude luat ni dua raja na mambahen hamu mabiar i.+
17 Pasombuon ni Jahowa ma susa hamu, bangsomuna, dohot keluarga ni bapakmuna. Ditaon hamu ma akka hasusaan na so hea dope masa mulai sian na sirang halak Epraim sian halak Juda.+ Suruonna ma raja ni Asiria+ mangalo hamu.
18 “Di ari i marsiul ma Jahowa manjou akka lanok sian na dao, i ma sian akka saluran ni aek Sunge Nil na di Mesir. Jala dijou do akka loba* sian luat na di Asiria.
19 Ro ma sudena i jala tinggal di akka rura* na rahis, di akka liang na di dolok batu, di sude ramba na marsuga, dohot di sude inganan panginuman ni binatang.
20 “Di ari i, pakkeon ni Jahowa ma raja ni Asiria,+ na dipatudos songon piso cukkur na disewa sian luat na di Sunge Euprat mancukkur obukmu dohot ibbulu ni patmu. Jala dicukkur do muse janggutmu sappe habis.
21 “Di ari i, pasombuon ni halak ma mangolu sada anak ni lombu dohot dua biru-biru.
22 Ala massai godang susu, gabe mangallang mentega ma akka jolma. Sude halak na adong dope tinggal di luat i, allangonna ma mentega dohot madu.
23 “Di ari i, di ladang na biasana tubu 1.000 batang anggur na argana 1.000 keping perak, holan ramba dohot hau na marsuga nama na tubu.
24 Mamboan panah dohot anak panah ma halak na ro tusi. Ai nungnga gok ramba dohot hau na marsuga di sude luat i.
25 Dang barani be hamu jonok tu akka dolok naung somal diula hamu. Ai nungnga godang ramba dohot hau na marsuga disi. Sude luat i gabe inganan ni lombu mangallang rumput, jala gabe tano na didege-dege akka biru-biru.”
Surat na di toru
^ Manang boi do “nasida”.
^ As. “tu pinoppar”.
^ Lapatanna, “Holan Halak na Tinggal do na Mulak”.
^ Manang boi do “Tapabiar-biar”.
^ Manang “taruppakkon ma tembokna”.
^ Manang “namarbaju”.
^ Lapatanna, “Didongani Debata do Hita”.
^ Manang “harinuan”.
