Josua 14:1-15
14 On ma tano parbagianan ni halak Israel di tano Kanaan. Dijalo nasida do i sian Malim Eleasar, sian si Josua anak ni si Nun, dohot sian akka pamimpin ni ganup marga.+
2 Marhite undi do tano i dibagi+ tu sia satonga marga,+ songon na diparettahon Jahowa tu si Musa.
3 Nungnga dilehon si Musa tano parbagianan na di bariba* ni Sunge Jordan+ tu dua satonga marga. Jala dang adong dilehon ibana parbagianan ni halak Lepi.+
4 Gabe dua marga do pinoppar ni si Josep,+ i ma marga Manasse dohot marga Epraim.+ Dang adong dilehon tano parbagianan tu halak Lepi, asing ni akka kota+ inganan ni nasida tinggal dohot inganan parmahanan ni nasida.+
5 Dibagi halak Israel do tano i songon na diparettahon Jahowa tu si Musa.
6 Dung i ro ma akka bawa na sian marga Juda mandapotton si Josua di Gilgal.+ Didok si Kaleb+ anak ni si Jepune halak Kenaz i ma tu ibana, “Takkas do diboto ho na nidok ni Jahowa+ tu si Musa naposo ni Debata na sittong i+ di Kades-barnea+ taringot tu ho dohot tu au.
7 Tikki disuru si Musa naposo ni Jahowa i au tu Kades-barnea mamareso huta i,+ marumur 40 taon ma au. Jala barita na denggan do hupaboa tikki mulak au.+
8 Nang pe gabe mabiar* bangso i dibahen akka dongan na rap borhat dohot au, huoloi do Jahowa Debatakku sian nasa rohakku.+
9 Jala marsumpa do si Musa di ari i, didok ma, ‘Toktong ma gabe parbagiananmu dohot akka pinopparmu tano naung nidegemi. Ai nungnga dioloi ho Jahowa Debatakku sian nasa roham.’+
10 Nungnga salpu 45 taon mulai sian na marjanji Jahowa+ tu si Musa lao mangalehon i tu au. Tikki i, di gurun* dope halak Israel.+ Jala songon janji ni Jahowa, dijaga Ibana do au.+ Saonari nungnga 85 taon umurhu.
11 Gogo dope au saonari songon tikki na sinuru ni si Musa i. Boi dope au marporang dohot mangulahon na asing songon di tikki i.
12 Alani i lehon ma tu au inganan na mardolok-dolok na dijanjihon Jahowa di tikki i. Nang pe didok halak, di akka kota na balga i+ do tinggal halak Anakim,+ alai donganan ni Jahowa do au.+ Jala hupalao* nama nasida songon janji ni Jahowa.”+
13 Dung i dipasu-pasu si Josua ma si Kaleb anak ni si Jepune. Jala dilehon ma tano Hebron gabe parbagiananna.+
14 Gabe appuna ni si Kaleb anak ni si Jepune halak Kenaz i ma tano Hebron sahat tu sadari on. Ai dioloi ibana do Jahowa Debata ni Israel sian nasa rohana.+
15 Kiriat-arba+ do goar ni Hebron najolo. (Arba i ma akka halak Anakim na tarbarita.) Dung i dang marporang be nasida.+
