Josua 24:1-33
-
Diulangi si Josua sejarah ni Israel (1-13)
-
Dijujui lao manomba Jahowa (14-24)
-
“Anggo au dohot donganku sajabu, Jahowa do sombaonnami” (15)
-
-
Parjanjian ni si Josua dohot Israel (25-28)
-
Si Josua mate jala dikuburhon (29-31)
-
Holi-holi ni si Josep dikuburhon di Sikem (32)
-
Si Eleasar mate jala dikuburhon (33)
24 Dung i, dipapungu si Josua ma sude marga ni Israel di Sikem. Dijou ibana ma akka pangituai,* akka pamimpin,+ dohot akka panguhum ni bangso i jala jongjong ma nasida di jolo ni Debata na sittong.
2 Didok si Josua ma tu bangso i, “Songon on do hata ni Jahowa Debata ni Israel, ‘Di bariba ni Sunge Euprat i do najolo+ tinggal akka ompumuna,+ dohot ma i si Tera, bapak ni si Abraham dohot si Nahor. Jala akka debata na asing do disomba nasida.+
3 “‘Dung i, husuru ma ompumuna si Abraham+ maninggalhon bariba ni Sunge Euprat jala husuru ma ibana mandalani sude huta Kanaan. Hubahen ma godang pinopparna.+ Hulehon ma tu ibana si Isak.+
4 Tu si Isak hulehon ma si Jakkob dohot si Esau.+ Hulehon do Dolok Seir gabe parbagianan ni si Esau.+ Alai lao do si Jakkob dohot akka anakna tu Mesir.+
5 Dung i husuru ma si Musa dohot si Aron mangurupi hamu.+ Huparo do hasusaan tu Mesir,+ jala huboan do hamu kaluar sian i.
6 Tikki huboan akka ompumuna kaluar sian Mesir,+ ro ma halak Mesir mangalele nasida sahat tu Laut Merah. Ro do nasida mamboan kareta porang dohot akka tentara na marhoda. Dung sahat akka ompumuna di laut i,+
7 mangangguki ma nasida tu Jahowa.+ Hubahen ma haholomon di holang-kolang ni nasida dohot halak Mesir. Dung i lonong ma halak Mesir hubahen di laut i.+ Takkas do diida hamu sude na hubahen di Mesir.+ Jala tinggal do hamu di gurun* saleleng martaon-taon.+
8 “‘Dung i huboan ma hamu tu tano ni halak Amori na di sabola timur ni Sunge Jordan. Marporang do nasida mangalo hamu.+ Alai hupasahat do nasida tu hamu asa boi buatonmuna tano ni nasida i. Jala hupamate do nasida di jolomuna.+
9 Dung i, ro ma si Balas, anak ni si Zippor raja ni Moab mangalo halak Israel. Dijou ibana ma si Bileam anak ni si Beor lao mamburai hamu.+
10 Alai dang olo Au manangihon si Bileam.+ Alani i, gabe mulak-ulak ma ibana mamasu-masu hamu+ jala hupalua ma hamu sian ibana.*+
11 “‘Dung i menyeberang ma hamu sian Sunge Jordan+ jala sahat di Jeriko.+ Alai ro ma akka pamimpin* ni Jeriko, halak Amori, halak Perisi, halak Kanaan, halak Het, halak Girgasi, halak Hevi, dohot halak Jebus marporang mangalo hamu. Nang pe songon i hupasahat do nasida sude tu hamu.+
12 Hubahen do nasida mabiar andorang so ro dope hamu. Gabe lari ma nasida sian jolomuna+ songon na masa tu dua raja ni halak Amori. Masa pe i dang alani podang dohot panahmuna.+
13 Songon i ma Au mangalehon tano i tu hamu. Dang loja hamu mandapot i. Hulehon do akka kota na so dipajongjong hamu+ jala disi ma hamu maringanan. Diallang hamu do parbue ni anggur jala dibuat hamu do miak jetun na so sinuanmuna.’+
14 “Alani i, habiari hamu ma Jahowa, somba hamu ma Ibana sian ias ni roha jala setia ma hamu tu Ibana.+ Bolokkon hamu ma akka debata ni ompumuna, i ma akka patung na disomba nasida tikki di bariba ni Sunge Euprat dohot na di Mesir.+ Dung i somba hamu ma Jahowa.
15 Alai molo dang lomo rohamuna manomba Jahowa, pillit ma saonari ise na lao sombaonmuna:+ akka debata na disomba akka ompumuna tikki di bariba ni Sunge Euprat+ do manang debata ni halak Amori nappuna tano ingananmuna nuaeng.+ Alai anggo au dohot donganku sajabu, Jahowa do sombaonnami.”
16 Dialusi bangso i ma, “Dang hea ro tu pikkirannami lao manadikkon Jahowa jala manomba akka debata na asing.
17 Ai Jahowa Debatanta do na mamboan hita dohot akka omputta kaluar sian tano ni halak Mesir,+ disi do hita dibahen gabe hatoban.*+ Taida do tanda halongangan* na binahenna+ jala dijaga Ibana do hita saleleng di pardalanan. Dijaga Ibana do muse hita sian sude bangso tikki mamolus hita sian akka huta ni nasida.+
18 Dipalao Jahowa do sude bangso i sian jolotta, dohot ma i halak Amori nappuna tano inganatta on. Alani i, hami pe sombaonnami do Jahowa, ai Ibana do Debatanta.”
19 Dung i didok si Josua ma tu bangso i, “Tutu do hamu boi toktong manomba Jahowa? Ai Debata na badia do Ibana+ jala dipangido Ibana do asa holan Ibana sombaonmuna.*+ Molo dang diulahon hamu i, dang sesaonna hasalaanmuna dohot dosamuna.+
20 Molo ditadikkon hamu Jahowa jala disomba hamu akka debata na asing, aloonna ma hamu jala pamateonna ma hamu, nang pe nungnga diulahon Ibana akka na denggan tu hamu.”+
21 Alai didok bangso i ma tu si Josua, “Holan Jahowa do sombaonnami!”+
22 Didok si Josua ma tu bangso i, “Hamu sandiri ma saksi tu dirimuna paboa naung dipillit hamu lao manomba Jahowa.”+ Dialusi nasida ma, “Olo. Hami pe gabe saksina.”
23 “Bolokkon hamu ma akka patung* i sian tonga-tongamuna. Jala somba ma Jahowa Debata ni Israel sian nasa rohamuna.”
24 Didok bangso i ma tu si Josua, “Jahowa Debatanta do sombaonnami, jala oloannami do hatana!”
25 Laos di ari i, dibahen si Josua ma parjanjian dohot bangso i. Jala dibahen ibana ma aturan dohot hukum tu nasida di Sikem.
26 Dung i, disurat si Josua ma i di bukku Patik ni Debata.+ Dibuat ibana ma sada batu na balga,+ jala dibahen ibana ma i di toru ni hau na balga na jonok tu inganan na badia ni Jahowa.
27 Didok si Josua ma tu bangso i, “Batu on ma na gabe saksi di hita.+ Ai dibege ibana do sude na nidok ni Jahowa tu hita. Jala batu i ma na gabe saksi di hamu, asa unang disoadahon hamu Debatamuna.”
28 Dung i disuru si Josua ma nasida mulak tu tano parbagianan ni nasida be.+
29 Dukkon i mate ma si Josua anak ni si Nun, naposo ni Jahowa i. Marumur 110 taon ma ibana mate.+
30 Dikubur nasida ma ibana di tano parbagiananna di Timnat-sera,+ i ma akka huta na di inganan na mardolok-dolok di Epraim di sabola utara ni Dolok Gaas.
31 Toktong do disomba halak Israel Jahowa saleleng mangolu si Josua nang dung mate ibana. Jala toktong do disomba nasida Debata saleleng mangolu akka pamimpin na mangida na binahen ni Jahowa tu halak Israel.+
32 Dikubur halak Israel ma holi-holi ni si Josep+ na diboan sian Mesir di Sikem. Dituhor si Jakkob do ladang i sian anak ni si Hemor,+ bapak ni si Sikem. Dituhor do i 100 hepeng logam perak.+ Jala gabe tano parbagianan ni pinoppar ni si Josep ma tano i.+
33 Dung i mate ma si Eleasar anak ni si Aron.+ Dikubur nasida ma ibana di Dolok Pinehas, i ma huta na di Dolok Epraim. Tano i ma na gabe tano parbagianan ni si Pinehas.+
Surat na di toru
^ As. “sian tanganna”.
^ Manang boi do “akka nappuna tano”.
^ As. “disi do jabu ni akka hatoban”.
^ Manang “mukjizat”.
^ Manang “jala massai sogo do rohana molo adong debata na asing na dipatudos songon Ibana”.
^ As. “akka debata na asing”.
