Josua 7:1-26
7 Nungnga diparettahon Debata tu halak Israel asa unang dibuat nasida akka barang na lao ditutung.+ Alai adong do sian nasida na so mangoloi, i ma si Agan+ anak ni si Karmi, pahoppu ni si Sabdi, nini ni si Jara sian marga Juda. Alani i, gabe muruk ma Jahowa tu bangso Israel.+
2 Disuru si Josua ma piga-piga bawa sian Jeriko lao tu kota Ai+ na jonok tu Bet-apen di sabola timur ni Betel.+ Didok ma tu nasida, “Lao ma hamu jala pareso hamu ma kota i.” Lao ma akka bawa i mamareso kota Ai.
3 Dung mulak nasida, didok ma tu si Josua, “Dang pola sude akka tentara i lao tu kota Ai. Holan dua ribu manang tolu ribu halak pe nungnga boi manaluhon kota Ai. Asa unang pola loja sude tentara i, alana holan saotik do pangisi ni kota i.”
4 Lao ma hira-hira 3.000 tentara tu kota Ai. Alai gabe marlarian do nasida dibahen halak Ai.+
5 Dilele do nasida mulai sian luar ni gerbang ni kota i sahat tu Sebarim.* Adong ma 36 tentara na mate. Alani i, gabe mabiar ma bangso i jala dang barani be nasida.*
6 Diribak si Josua dohot akka pamimpin ni bangso i ma abit ni nasida alani na masa i. Marsomba ma nasida di jolo ni poti parpadanan ni Jahowa sahat tu botari. Jala sai dibahen nasida ma orbuk tu ulu ni nasida.
7 Didok si Josua ma, “Ale Jahowa, Tuan Natumimbul, boasa ma diboan Ho bangso on manaripari Sunge Jordan? Hape talu do nasida dibahen halak Amori. Tumagon hian ma dang ditaripari hami Sunge Jordan on!*
8 Aha nama dohonokku ale Jahowa? Ai nungnga mundur be halak Israel dibahen musu.
9 Molo dibege halak Kanaan dohot sude halak na di tano on na masa i, leleon ni nasida ma hami jala pamateonna.* Pasombuonmu do marlea goarmu na sangap i?”+
10 Didok Jahowa ma tu si Josua, “Jongjong ma ho! Boasa pola marsomba ho?
11 Nungnga mardosa halak Israel. Dilanggar nasida do parjanjian+ naung hubahen tu nasida. Dibuat nasida do deba barang na ikkon ditutung i.+ Ditakko+ nasida do i jala ditabunihon di inganan ni arta ni nasida.+
12 Alani i, dang tolap be bangso Israel mangalo musuna. Mundur jala lari nama nasida sian musuna, ai ikkon pamateon do nasida. Molo dang dibolokkon hamu akka barang na ikkon ditutung i sian tonga-tongamuna, dang donganakku be hamu.+
13 Jongjong ma ho jala pabadia ma bangso i!+ Dok ma tu nasida, ‘Pabadia ma dirimuna lao tu marsogot. Ai didok Jahowa Debata ni Israel do, “Hamu ale halak Israel, adong do di tonga-tongamuna akka barang na ikkon ditutung i. Molo dang dibolokkon hamu i sian tonga-tongamuna, dang tolap be hamu mangalo musumuna.
14 Marpungu ma sude marga di jolokku manogot. Marga ni ise na dipillit Jahowa,+ maju jala jongjong ma nasida sasaompu. Sian na saompu na dipillit Jahowa, maju jala jongjong ma ganup keluarga. Keluarga ni ise na dipillit Jahowa, maju jala jongjong ma sude bawa sian keluarga i.
15 Manang ise na tardapot mambuat barang na ikkon ditutung i, ikkon ditutung do ibana,+ artana, dohot keluargana. Ai nungnga dilanggar ibana parjanjian+ na binahen ni Jahowa jala gabe marlea do bangso Israel alani ibana.”’”
16 Marsogotna i, hatop ma dungo si Josua. Dijou ibana ma bangso Israel jala jongjong ma ganup marga. Dung i tarpillit ma marga Juda.
17 Dijou ibana ma akka na sasaompu sian marga Juda. Jala tarpillit ma keluarga ni si Jara.+ Maju ma akka bawa na sian keluarga ni si Jara, jala tarpillit ma si Sabdi.
18 Maju ma akka bawa na sian keluarga ni si Sabdi. Dung i tarpillit ma si Agan, anak ni si Karmi, pahoppu ni si Sabdi, nini ni si Jara sian marga Juda.+
19 Dung i didok si Josua ma tu si Agan, “Ale anakku, pasangap ma Jahowa Debata ni Israel jala mangakku ma ho tu Ibana. Paboa ma tu au aha naung diulahon ho. Unang ma tabunihon.”
20 Didok si Agan ma, “Nungnga mardosa au tu Jahowa Debata ni Israel. On do na huulahon,
21 tikki i huida ma abit na bagak na sian Sinear,+ perak na boratna lobi sian dua kilogram,* dohot sabatang mas na boratna 570 gram.* Hubuat ma i, jala hutanom di kemahku. Perak dohot mas i ma hubahen di partoru hian.”
22 Disuru si Josua ma piga-piga halak tu kemah ni si Agan. Pittor marlojong ma nasida tusi. Diida nasida ma abit na ditabunihon i, jala perak dohot mas i ma di partoru hian ditabunihon.
23 Dibuat nasida ma akka barang i. Diboan nasida ma i tu si Josua dohot tu sude bangso Israel. Dung i, diboan nasida ma i tu jolo ni Jahowa.
24 Diboan si Josua dohot bangso Israel ma si Agan,+ anak ni si Jara tu Rura Akor.+ Diboan do perak, abit na bagak i, dohot mas i.+ Diboan do muse akka anakna, akka boruna, lombuna, halodena, biru-biruna, kemahna, dohot sude artana.
25 Didok si Josua ma, “Boasa gabe marjea* hami dibahen ho?+ Sadari on, bahenon ni Jahowa ma jea tu ho.” Sude ma halak Israel mandangguri ibana dohot keluargana.+ Dung i, ditutung ma nasida.+
26 Jala dipapungu nasida ma akka batu na balga di ginjang ni bakke ni si Agan, asa gabe parningotan sahat tu sadari on. Dukkon i, dang muruk be Jahowa.+ Alani i ma dibahen goar ni inganan i Rura Akor* sahat tu sadari on.
Surat na di toru
^ Lapatanna, “Pertambangan”.
^ As. “gabe malala jala gabe songon aek ma ate-ate ni bangso i”.
^ Manang “Tumagon hian ma toktong di timur ni Sunge Jordan hami”.
^ As. “haliangan ni nasida ma hami jala sesaon ni nasida ma goarnami sian tano on”.
^ As. “200 sekel”. Ida Lampiran B14.
^ As. “50 sekel”. Ida Lampiran B14.
^ Manang “susa”.
^ Lapatanna, “Jea”.
