Surat tu Huria na di Kolosse 4:1-18
4 Songon i nang hamu akka tuan, bahen hamu ma na sittong jala na denggan tu hatobanmuna. Ai diboto hamu do adong do Tuanmuna di banua ginjang.+
2 Sai martangiang ma hamu,+ toktong ma hamu dungo, jala sai mandok mauliate ma hamu.+
3 Laos tangiakkon hamu ma hami,+ asa dibukka Debata dalan lao paboahon rahasia na badia taringot tu Kristus i, ai alani rahasia na badia i do au dipenjarahon.+
4 Jala tangiakkon hamu ma muse asa boi takkas hupaboa taringot i.
5 Sai marbisuk ma hamu tu akka halak na so porsea, jala denggan ma pakke tikkimuna.*+
6 Sai lambok ma begeon akka hatamuna songon na disirai,+ asa diboto hamu mangalehon alus na denggan tu ganup halak.+
7 Si Tikikus,+ dongan na huhaholongi jala na toktong marhobas tu Tuan i, ibana ma na paboahon tu hamu taringot au.
8 Hupangido do ibana ro tu hamu lao paboahon taringot tu hami jala asa boi diapuli ibana rohamuna.
9 Rap do ibana ro dohot si Onesimus,+ donganku na setia jala na huhaholongi. Sahalak sian tonga-tongamuna do ibana. Paboaon ni nasida ma tu hamu sude na masa dison.
10 Sahat ma tabe ni si Aristarkus+ tu hamu, i ma donganku na rap tarhurung. Suang songon i sian si Markus+ keluarga ni si Barnabas. Nungnga hupaboa tu hamu asa denggan manjalo ibana+ tikki ro mandapotton hamu.
11 Jala sahat ma tu hamu tabe sian si Jesus na digoari si Justus. Halak Jahudi* do nasida na tolu. Holan nasida na tolu do donganku saulaon tu Harajaon ni Debata, jala nasida ma na patoguhon rohakku.
12 Sahat ma tabe ni si Epapras+ tu hamu. Sahalak sian naposo ni Kristus Jesus do ibana jala sian tonga-tongamuna do ibana. Sai marsitutu do ibana manangiakkon hamu, asa hot hamu jongjong jala marpos ni roha tu lomo ni roha ni Debata sahat tu ujungna.
13 Ai huboto do, nungnga dibahen ibana sian nasa gogona lao mangurupi hamu dohot lao mangurupi akka dongan di Laodikea nang di Hierapolis.
14 Sahat ma muse tu hamu tabe sian si Lukas+ pangubati na tahaholongi i, suang songon i tabe sian si Demas.+
15 Pasahat ma tabekku tu akka dongan di Laodikea, tu si Nimpa, dohot tu huria na marpungu di jabuna.+
16 Molo dung sae dijaha hamu surat on di tonga-tongamuna, usahahon hamu ma asa laos dijahahon surat on+ di huria na di Laodikea, jala surat na tu huria Laodikea pe asa dijahahon di tonga-tongamuna.
17 Dokkon ma muse tu si Arkippus+ asa marsitutu ibana mangulahon tanggung jawab na dijalo ibana sian* Tuan i.
18 Sahat ma tabekku tu hamu. Au si Paulus, au sandiri do na manuratton surat on.+ Toktong ma ingot hamu au na di bagasan penjara on.+ Sai dapotmuna ma asi ni roha ni Debata na massai balga i.
Surat na di toru
^ As. “jala tuhor ma tikki”.
^ As. “Halak na marsunat”.
^ As. “asa marsitutu ibana marhobas tu”.
