Na disurat si Mateus 22:1-46
22 Dipaboa Jesus ma sada nai tudosan tu nasida, ninna ma,
2 “Tudos do Harajaon banua ginjang i tu sahalak raja na mambahen pesta parbogason+ ni anakna.
3 Disuru raja i ma akka hatobanna manjou akka halak naung digokkon asa ro tu pesta i. Alai dang olo nasida ro tu pesta i.+
4 Disuru ma muse akka hatoban na asing manjou nasida. Didok ibana ma, ‘Songon on ma dokkon tu halak naung digokkon i, “Nungnga diparade raja i be sipanganon. Nungnga diseat lombu dohot pinahan na mokmok. Jala nungnga rade be sude. Ro ma hamu tu pesta parbogason i.”’
5 Alai dang parduli nasida. Adong na lao tu ladang, adong na lao martiga-tiga,+
6 jala adong do na manakkup akka hatoban i, dung i dipukkuli jala dipamate.
7 “Muruk situtu ma raja i, disuru ma akka tentarana pamatehon akka pambunu i jala manutung kota ni nasida.+
8 Dung i, didok ma tu akka hatobanna, ‘Nungnga rade pesta parbogason i. Alai anggo halak naung digokkon i, dang pantas be ro tu pesta i.+
9 Alani i, lao ma hamu tu akka dalan na somal dilewati halak molo naeng tu luar kota. Manang ise na juppangmuna disi, gokkon ma asa ro tu pesta i.’+
10 Borhat ma akka hatobanna i, dipapungu ma sude halak na dijuppangi nasida di akka dalan, dohot ma i halak na burju dohot na jahat. Ujungna, gok ma halak na ro tu pesta i.
11 “Tikki masuk raja lao mamereng akka tamu na ro, diida ibana ma sahalak bawa na so mamakke baju pesta.
12 Disukkun raja i ma ibana, ‘Dongan, boasa dang mamakke baju pesta ho tuson?’ Alai sip do ibana.
13 Dung i, didok raja i ma tu akka hatobanna, ‘Tali ma tanganna dohot patna jala sappatton ma ibana tu luar, tu inganan na holom i. Disi ma ibana mangangguki jala makkarat ngigina alani murukna.’
14 “Ai godang do nian na dijou, alai otik do na tarpillit.”
15 Dung i, lao ma halak Parise. Direncanahon nasida ma manjorat Jesus. Direncanahon nasida ma cara lao mambahen asa sala Jesus makkatai.+
16 Disuru nasida ma sisean ni nasida rap dohot akka halak na sian partai ni si Herodes+ mandapotton Jesus. Didok ma tu Jesus, “Guru, huboto hami do na sittong ho. Jala huboto hami do na sittong sude na niajarhonmu taringot tu dalan ni Debata. Huboto hami do na so dilului ho hasangapon sian jolma jala dang hea dipaimbar-imbar ho jolma.
17 Alani i, paboa ma tu hami songon dia pandapotmu. Mangihutton Patik ni si Musa, boi do gararon pajak* tu Kesar manang na dang?”
18 Alai, diboto Jesus do na jahat pikkiran ni nasida. Gabe didok ibana ma, “Hamu halak na munafik, boasa ujionmuna au?
19 Patuduhon hamu ma tu au hepeng logam na dipakke lao manggarar pajak i.” Diboan nasida ma tu ibana sada hepeng dinar.*
20 Disukkun ibana ma nasida, “Gombar dohot goar ni ise do na di hepeng on?”
21 Dialusi nasida ma, “Kesar.” Dung i ninna Jesus ma tu nasida, “Lehon ma tu Kesar appuna ni Kesar jala tu Debata appuna ni Debata.”+
22 Dung dibege nasida i, longang ma roha ni nasida. Ditadikkon ma ibana jala lao ma nasida.
23 Laos di ari i, ro ma muse halak Saduse manjuppangi Jesus. Dang porsea nasida na boi mulak mangolu halak na mate.+ Didok nasida ma tu Jesus,+
24 “Guru, didok si Musa, ‘Molo adong bawa na mate hape dang sanga dope adong anakkonna, ikkon buaton ni anggina* do istri ni abangna i lao gabe istrina asa adong pinoppar ni abangna naung mate i.’+
25 Hea do adong pitu na marhaha maranggi dison. Mangoli ma siakkangan, alai dang sanga dope adong anakkonna mate ma ibana. Dung i dibuat anggina ma istri ni abangna i gabe istrina.
26 Songon i do na masa tu na paduahon dohot tu na patoluhon sahat tu na papituhon.
27 Jala ujungna, mate ma borua i.
28 Attong, di ari haheheon i, ise do sian na pitu i gabe suami ni borua i? Ai sude do nasida hea gabe suamina.”
29 Dialusi Jesus ma nasida, “Sala do hamu, ai dang diattusi hamu isi ni Surat na Badia i jala dang diattusi hamu songon dia balga ni huaso ni Debata.+
30 Di ari haheheon, dang masa be mangoli manang muli. Ai songon suru-suruan na di banua ginjang+ nama nasida.
31 Taringot tu haheheon ni halak naung mate, na so hea do dijaha hamu hata ni Debata? Didok do,
32 ‘Au do Debata ni si Abraham, Debata ni si Isak, dohot Debata ni si Jakkob’.+ Dang Debata ni halak na mate Ibana, alai Debata ni halak na mangolu do.”+
33 Gabe longang ma roha ni akka jolma mambege na niajarhonna i.+
34 Diboto halak Parise ma na so taralusi ni halak Saduse hata ni Jesus i. Gabe rap ro ma nasida sude mandapotton ibana.
35 Adong ma sahalak sian siboto patik manukkun tu Jesus lao manguji ibana, ninna ma,
36 “Guru, dia do paretta na umbalga sian akka Patik i?”+
37 Dialusi Jesus ma, “‘Ikkon haholonganmu do Jahowa* Debatam sian nasa roham, sian nasa ngolum* dohot sian nasa pikkiranmu.’+
38 I ma paretta na umbalga jala na parjolo.
39 Paretta na paduahon na dos tusi, i ma, ‘Ikkon haholonganmu do donganmu jolma doshon dirim.’+
40 Paretta na dua on do fondasi ni sude Patik dohot na Sinurat ni Akka Panurirang.”*+
41 Tikki marpungu dope halak Parise i, disukkun Jesus ma nasida,+
42 “Paboa hamu ma jo pandapotmuna taringot tu Kristus. Anak ni ise do ibana?” Dialusi nasida ma, “Anak ni si Daud.”+
43 Dung i, ninna Jesus ma tu nasida, “Attong, marhite panogu-noguon ni tondi parbadia+ boasa dijou si Daud ibana Tuan? Didok si Daud do,
44 ‘Didok Jahowa* do tu Tuanku, “Hundul ma ho di sabola kananku paima hubahen akka musum gabe sidege-degean ni patmu.”’+
45 Molo didok si Daud do ibana Tuan, songon dia ma ibana gabe anak ni si Daud?”+
46 Alai dang adong na boi mangalusi ibana. Jala dukkon i, dang adong be na barani manukkun ibana.
Surat na di toru
^ Manang “pajak kepala”, na nidokna i ma pajak ni ganup halak.
^ Ida Lampiran B14.
^ Dang takkas dipaboa di Bibel na mate i siakkangan manang sianggian.
^ Ida Lampiran A5.
^ Ida Lampiran A5.
