Na disurat si Mateus 25:1-46
25 “Tudos do Harajaon banua ginjang i tu sappulu namarbaju na mamboan lampu+ lao manomu-nomu pangoli.+
2 Adong lima na oto jala na lima nai marbisuk.+
3 Diboan na oto i do lampu ni nasida alai dang diboan nasida miakna.
4 Anggo na marbisuk i, diboan nasida do lampuna rap dohot miak di botol.
5 Ala leleng ro pangoli i, gabe mondok-ondok ma nasida sude jala tarpodom.
6 Di tonga borngin, adong ma na mandok, ‘Nungnga ro be pangoli i! Kaluar ma hamu manjuppangi ibana!’
7 Dungo ma sude namarbaju i jala dibuat be ma lampu ni nasida.+
8 Didok akka na oto i ma tu na marbisuk i, ‘Lehon ma di hami deba miakmuna i, ai nungnga naeng mittop lampunami.’
9 Dialusi na marbisuk i ma, ‘Dang cukkup be ra on dibagi tu hamu. Tumagon ma hamu lao tu panggadis miak jala tuhor ma di hamu.’
10 Tikki lao nasida manuhor miak, sahat ma pangoli i. Masuk ma akka namarbaju naung paimahon i rap dohot pangoli i tu pesta parbogason,+ jala ditutup ma pintu.
11 Dung i, ro ma namarbaju na lima nai, ninna nasida ma, ‘Tuan, Tuan, bukka jo pintu on,+ asa masuk hami!’
12 Dialusi ibana ma, ‘Dang hutanda hamu.’
13 “Alani i, jaga ma hamu,+ ai dang diboto hamu ari manang jamna.+
14 “Tudos do muse Harajaon banua ginjang i tu sahalak bawa na naeng mardalani tu na dao. Dijou ma akka hatobanna jala disuru ma nasida mangurus akka artana.+
15 Dilehon ma tu nasida hombar tu na tolap uruson ni nasida. Dilehon ma tu na sada lima talenta,* tu na asing dua talenta, tu na sada nai sada talenta. Dung i, borhat ma tuanna i tu na dao.
16 Pittor lao ma na manjalo lima talenta i jala dipakke ma i martiga-tiga, gabe maruttung ma ibana lima talenta nai.
17 Songon i ma muse na manjalo dua talenta, maruttung ma ibana dua talenta nai.
18 Alai na manjalo sada talenta i, digali ma tano jala ditabunihon ma tusi hepeng* ni tuanna i.
19 “Dung leleng tuan ni akka hatoban i mardalani, mulak ma ibana. Jala maretong ma ibana dohot nasida.+
20 Ro ma hatoban na manjalo lima talenta i jala diboan ma lima talenta nai uttungna, ninna ma, ‘Tuan, nungnga dipasahat ho lima talenta tu au. Ida ma, maruttung do au lima talenta nai.’+
21 Dung i, ninna tuanna i ma tu ibana, ‘Denggan ma na binahenmi. Tutu ma ho hatoban na burju jala haposan! Haposan do ho di na otik. Alani i, pasahatonku ma muse tu ho gumodang siurusonmu.+ Marlas ni roha ma ho rap dohot tuanmu.’+
22 Dung i, ro ma hatoban na manjalo dua talenta i jala ninna ma, ‘Tuan, nungnga dipasahat ho dua talenta tu au. Ida ma, maruttung do au dua talenta nai.’+
23 Didok tuanna i ma tu ibana, ‘Denggan ma na binahenmi. Tutu ma ho hatoban na burju jala haposan! Haposan do ho di na otik. Alani i, pasahatonku ma muse tu ho gumodang siurusonmu. Marlas ni roha ma ho rap dohot tuanmu.’
24 “Ujungna ro ma hatoban na manjalo sada talenta, ninna ma, ‘Tuan, huboto do halak na tegas do ho. Marpanen do ho hape so adong disabur ho boni jala dipapungu ho do hasil panen hape so karejo ho.+
25 Alani i massai mabiar ma au, gabe hutabunihon ma talenta na nilehon ni tuan i tu bagasan tano. On ma, hupaulak ma i tu ho.’
26 Dialusi tuanna i ma ibana, ‘Hatoban na jahat do ho jala na malas. Nungnga diboto ho marpanen do au nang pe dang manabur boni, jala hupapungu do hasil panen nang pe dang karejo au.
27 Aturanna, sippanonmu hian do hepengki* di bank. Alani i, tikki ro au, jalookku ma i rap dohot bungana.
28 “‘Saonari, buat ma talenta i sian ibana jala lehon ma i tu hatoban na maniop sappulu talenta i.+
29 Ai molo nungnga adong appuna ni sasahalak, lehonon do unggodang tu ibana asa lam godang appuna ni ibana. Alai molo dang adong appuna ni sasahalak, gari na adong di ibana hian pe buaton do sian ibana.+
30 Sappatton ma hatoban na so marguna i tu luar, sappatton ma ibana tu na holom. Disi ma ibana mangangguki jala makkarat ngingina alani murukna.’
31 “Molo ro Anak ni jolma i+ di bagasan hasangaponna, hundul ma ibana di tahtana na sangap i. Ro ma ibana rap dohot sude suru-suruan.+
32 Papunguonna ma sude bangso tu jolona jala sirangonna ma akka jolma, dos songon parmahan na manirang biru-biru sian hambing.
33 Bahenonna ma biru-biru i+ di sabola kananna, alai hambing i di sabola kirina.+
34 “Dung i dohonon ni raja i ma tu akka na di sabola kananna i, ‘Ro ma hamu akka na mandapot pasu-pasu sian Damang. Jalo hamu ma Harajaon naung diparade tu hamu mulai sian na ditoppa portibi on.*
35 Ai tikki male au, dilehon hamu do au mangan. Tikki mauas au, dilehon hamu do au minum. Nang pe dang ditanda hamu au, dijalo* hamu do au.+
36 Tikki dang marpakkean* au, dilehon hamu do pakkeanku.+ Tikki marsahit au, diurus hamu do au. Tikki dipenjara au, ditikkir hamu do au.’+
37 Dung i, alusan ni akka halak na mangulahon na sittong i ma ibana, ‘Tuan, nandigan do diida hami ho male gabe hulehon hami ho mangan? Manang nandigan do diida hami ho mauas gabe hulehon hami ho minum?+
38 Nandigan do hujalo hami ho di jabunami nang pe dang hutanda hami ho? Manang nandigan do diida hami ho dang marpakkean gabe dilehon hami pakkeanmu?
39 Nandigan do huida hami ho marsahit manang dipenjarahon gabe hutikkir hami ho?’
40 Alusan ni raja i ma nasida, ‘Tutu do na hudok on tu hamu, manang aha pe na dibahen hamu lao mangurupi sahalak sian haha anggikku na metmet on, dos songon na mangurupi au do i.’+
41 “Dung i dohononna ma tu akka na di sabola kirina, ‘Hamu akka halak na hona bura, lao ma hamu sian jolokku.+ Masuk ma hamu tu api sisaleleng ni lelengna*+ naung diparade tu Sibolis dohot tu akka suru-suruanna.+
42 Ai di tikki male au, dang dilehon hamu au mangan. Tikki mauas au, dang dilehon hamu au minum.
43 Tikki ro au tu jabumuna, dang dijalo* hamu au, ala dang ditanda hamu au. Tikki dang marpakkean au, dang dilehon hamu pakkeanku. Tikki marsahit au jala dipenjarahon, dang ditikkir hamu au.’
44 Dung i, dialusi nasida ma, ‘Tuan, nandigan diida hami ho male, mauas, ro songon halak na so ditanda, dang marpakkean, marsahit manang dipenjarahon alai dang diurupi hami ho?’
45 Alusanna ma nasida, ‘Tutu do na hudok on tu hamu, molo dang dibahen hamu manang aha pe lao mangurupi sahalak sian haha anggikku na metmet on, dos songon na so mangurupi au do hamu disi.’+
46 Tu hamatean na saleleng ni lelengna ma*+ halak sisongon i, alai anggo akka halak na mangulahon na sittong dapotna ma hangoluan na saleleng ni lelengna.”+
Surat na di toru
^ 1 talenta Junani = 20,4 kilogram. Ida Lampiran B14.
^ As. “perak”.
^ As. “perakki”.
^ Manang “dijakkon”.
^ Manang “salang-salang”.
^ Manang “dijakkon”.
^ As. “Diponggol ma saleleng ni lelengna”, songon dakka ni hau na diponggol sian bonana.
