Na disurat si Mateus 3:1-17
3 Dung i, ro ma si Johannes+ Pandidi tu padang gurun na di Judea lao marbarita,+
2 ninna ma, “Pauba hamu ma rohamuna, ai nungnga jonok Harajaon banua ginjang i.”+
3 Sasittongna, si Johannes do halak na pinaboa ni Panurirang* Jesaya i.+ Hea do didok si Jesaya, “Adong ma soara na jou-jou di padang gurun, ‘Parade hamu ma dalan ni Jahowa!* Parade hamu ma akka dalan na tigor lao sidalananna.’”+
4 Sian ibbulu ni unta do pakkean ni si Johannes jala sian kulit ni binatang do ikat pinggangna.+ Sihapor* dohot madu na sian tombak do sipanganonna.+
5 Ro ma torop halak sian Jerusalem, sian sude huta di Judea, dohot sian sude huta na jonok tu Sunge Jordan mandapotton ibana.+
6 Dididi* si Johannes ma nasida di Sunge Jordan+ jala diakkui nasida ma sude dosa ni nasida.
7 Tikki diida si Johannes godang halak Parise dohot halak Saduse+ ro mandapotton ibana, ninna ma tu nasida, “Hamu pinoppar ni ulok na marbisa,+ ise do na paingotton hamu asa lari sian panguhuman ni Debata?+
8 Alani i, patudu ma sian parniulaonmuna naung muba hamu.
9 Unang ma didok rohamuna, ‘Pinoppar ni si Abraham do hami.’+ Hudok ma tu hamu, akka batu on pe boi do bahenon ni Debata gabe pinoppar ni si Abraham.
10 Nungnga dibahen kampak di bona ni hau. Ganup hau na so denggan parbuena, tabaon ma i jala disappatton tu api.+
11 Aek do hudidihon tu hamu ala naung muba hamu.+ Alai umbalga do huaso ni halak na ro dukkon au. Gari mambukka sipatuna dang tama au.+ Didionna do tu hamu tondi parbadia+ dohot api.+
12 Nungnga ditiop ibana garpu pamurpur* jala paiasonna ma pardegean i. Papunguonna ma gandum* tu poti jala tutungonna ma lapung ni eme* tu api+ na so ra mittop.”
13 Dung i, ro ma Jesus sian Galilea tu Sunge Jordan. Dipangido ibana ma si Johannes mandidi ibana.+
14 Alai dang pittor dioloi si Johannes pangidoanna i, didok ma, “Au do nian na ikkon didionmu, boasa gabe ro ho tu au?”
15 Dialusi Jesus ma ibana, “Songon i ma jolo saonari. Na mangulahon na sittong do hita disi.” Dung i, diulahon si Johannes ma songon i.
16 Dung tardidi, kaluar ma Jesus sian aek, bukka ma langit+ jala diida si Johannes ma tondi parbadia ni Debata na songon darapati ro tu ginjang ni Jesus.+
17 Dung i tarbege ma soara sian langit+ na mandok, “On do Anakku,+ haholongakki, las situtu do rohakku mangida ibana.”+
Surat na di toru
^ Ida Lampiran A5.
^ Manang “Belalang”.
^ Manang “Dibonompon”.
^ Garpu na dipakke lao papulikkon gandum sian durame.
^ Suan-suanan na songon eme na tubu di Israel jala na jotjot dipakke mambahen roti.
