Obaja 1:1-21
1 Parnidaan ni si Obaja.*
Songon on ma hata ni si Obaja taringot Edom+ na dipaboa Jahowa Tuan Natumimbul i,
“Nungnga hubege barita sian Jahowa,Nungnga disuru sasahalak tu tonga-tonga ni akka bangso lao mandok,
‘Beta, mangarade ma hita, asa marporang hita mangalo Edom.’”+
2 “Ida ma! Nungnga hubahen be leas roha ni akka bangso mangida ho,Jala gabe massai lea ma ho di adopan ni nasida.+
3 Dioto-otoi ginjang ni roham do ho,+Ho na maringanan di dolok batuNa maringanan di inganan na timbo, jala na mandok di bagasan rohana,‘Ise ma na boi mandabuhon au?’
4 Nang pe maringanan ho di inganan na timbo* dos songon lali,Manang marasar ho di tonga-tonga ni akka bintang,Dabuhonokku do ho sian i,” ninna Jahowa.
5 “Molo ro panakko manang pangarampok tikki borngin, holan na porlu di nasida do buatonna.Manang tikki ro akka halak lao mamanen anggur,
Tottu tinggalhononna do i deba di halak na asing.+
Alai molo ho, hancurhonon ni musum ma sude na adong di ho.*
6 Nungnga dirampas be sude na adong di si Esau!
Dang adong be na tading manang aha pe di ibana!
7 Akka halak na mambahen parjanjian dohot ho pe, nungnga dioto-otoi nasida be ho.
Diusir nasida do ho sian luat ni nasida.
Akka halak na mardame dohot ho pe, nungnga manaluhon ho.
Halak na rap mangan roti dohot ho, bahenonna ma jorat tu ho,Alai, dang disadari ho i.”
8 Didok Jahowa ma, “Di ari i, hancurhonokku ma akka halak na marbisuk na sian Edom+Dohot halak na malo na adong di Dolok Esau.
9 Jala mabiar ma akka tentaram,+ ale Teman,+Alana lao dipamate+ do sude halak na adong di Dolok Esau.
10 Lao dipaila nama ho,+Jala dihancurhon saleleng ni lelengna+Alana jahat do ho tu anggim si Jakkob.+
11 Di tikki i, ro do halak sian bangso na asing manakkup akka tentarana,+Masuk do bangso na asing tu gerbangna jala dibahen nasida do undi+ lao mambagi arta na sian Jerusalem,Alai holan na jongjong do ho jala dang diulahon ho manang aha.Kejam do ho songon nasida.
12 Unang ma nian mekkel ho tikki susa anggim,+Unang ma nian marlas ni roha ho tikki dihancurhon halak Juda,+Jala unang ma nian direhei ho nasida di tikki susa.
13 Unang ma nian masuk ho tu gerbang ni bangsokku tikki susa nasida,+Unang ma nian mekkel ho tikki marsitaonon nasida,Jala unang ma nian dibuat ho arta ni nasida tikki susa nasida.+
14 Unang ma nian jongjong ho di pinggir ni dalan lao mambunu halak na lao paluahon dirina,+Jala unang ma nian dipasahat ho nasida tu musu tikki susa nasida.+
15 Nungnga jonok tikkina lao hukumon ni Jahowa ma akka bangso.+
Aha na dibahen ho tu na asing, songon i ma bahenonna tu ho.+
Aha na diulahon ho tu na asing, songon i ma ulahonon ni nasida tu ho.*
16 Dos songon ho na manginum anggur di dolokku na badia,Songon i ma sude bangso torus manginum anggur na manggombarhon rimashu,+
Inumon ni nasida ma i sappe habisJala mago ma nasida, hira na so hea nasida adong.
17 Alai adong do na malua+ di Dolok Sion, alani i gabe badia+ ma dolok i.Jala buaton ni pinoppar ni si Jakkob ma muse arta ni nasida.+
18 Gabe dos songon api ma pinoppar ni si Jakkob.Gabe dos songon api na marsigorgor ma pinoppar ni si Josep.Jala gabe dos songon durame ma pinoppar ni si Esau.+Ditutung nasida ma pinoppar ni si Esau sappe habis,Jala dang adong na malua.Ai Jahowa sandiri do naung mandok i.
19 Buaton ni nasida ma luat Negeb dohot luat na adong di dolok Esau,+Buaton ni nasida ma luat Syefela dohot luat ni halak Palistim.+
Buaton ni nasida ma luat Epraim dohot luat Samaria,+Jala buaton ni halak Benjamin ma luat Gilead.
20 Taringot tu luat Kanaan sahat tu luat Sarpat,+Buaton ni halak na ditawan i ma i gabe appuna ni nasida. Nasida ma halak Israel na adong di benteng i+
Jala taringot kota Negeb, buaton ni halak Jerusalem na tinggal di Sarpat ma i gabe appuna ni nasida.+
21 Jala akka halak na lao paluahon nasida, nakkok ma tu Dolok SionLao mangadili luat na adong di dolok Esau,+Jala Jahowa ma na gabe raja.”+
Surat na di toru
^ Lapatanna, “Naposo ni Jahowa”.
^ Manang boi do “Nang pe timbo ho habang”.
^ Manang boi do “Sadia godang do na lao dihancurhon?”
^ As. “Pambahenanmi gabe mulak ma muse tu ulum”.
