Panguhum 4:1-24
4 Alai dung mate si Ehud, dibahen halak Israel ma muse sogo roha ni Jahowa.+
2 Alani i, dipasombu Jahowa ma nasida ditaluhon* si Jabin raja ni halak Kanaan+ na mamaretta di Hazor. Si Sisera do panglima tentarana na maringanan di Haroset-hagoyim.+
3 Dung i dipangido halak Israel ma asa diurupi Jahowa nasida.+ Ai adong do 900 kareta porang* ni si Jabin* na mamakke sasabi na ganjang.+ Jala susa do halak Israel dibahen ibana+ saleleng 20 taon.
4 Di tikki i, si Debora do na paboahon panguhuman ni Debata tu halak Israel. Istri ni si Lappido do ibana jala sahalak panurirang* borua.+
5 Somal do ibana hundul di toru ni hau palemna na di holang-kolang ni Rama+ dohot Betel,+ na di inganan na mardolok-dolok di Epraim. Jala tu ibana do halak Israel manukkun taringot tu panguhuman ni Debata.
6 Disuru si Debora ma halak mandapotton si Barak+ anak ni si Abinoam na sian Kedes-naptali.+ Didok ma tu si Barak, “On do paretta ni Jahowa Debata ni halak Israel, ‘Lao ma ho marporang tu Dolok Tabor. Boan ma 10.000 halak Naptali dohot halak Zebulon rap dohot ho.
7 Bahenokku ma ro Panglima Sisera, i ma panglima tentara ni si Jabin mandapotton ho di Sunge* Kison.+ Boanonna ma akka kareta porangna dohot akka tentarana tusi. Jala pasahatonku ma ibana tu tanganmu.’”+
8 Didok si Barak ma tu si Debora, “Molo lao do ho, lao do au. Alai molo dang dohot ho lao, dang lao au.”
9 Didok si Debora ma, “Dohot do au. Alai dang ho na mandapot hasangapon di parporangan on. Ai tu sahalak borua do dipasahat Jahowa Panglima Sisera.”+ Dung i lao ma si Debora dohot si Barak tu Kedes.+
10 Dijou si Barak ma halak Zebulon dohot halak Naptali+ tu Kedes. Adong ma 10.000 halak nasida sude. Jala dohot do si Debora lao rap dohot ibana.
11 Tikki i, nungnga pulik si Heber halak Keni i,+ sian halak Keni na asing. Pinoppar ni si Hobab do ibana simatua ni si Musa.+ Jala dipajongjong ibana do kemahna jonok tu hau na balga di Zaannim na di Kedes.
12 Dung i adong ma na paboahon tu Panglima Sisera naung nakkok si Barak anak ni si Abinoam tu Dolok Tabor.+
13 Dipapungu Panglima Sisera ma sude tentarana dohot 900 kareta porangna.* Mamakke sasabi na ganjang do kareta porangna i. Borhat ma nasida sian Haroset-hagoyim tu Sunge* Kison.+
14 Di tikki i didok si Debora ma tu si Barak, “Maju ma hamu. Pasahaton ni Jahowa do Panglima Sisera tu tanganmuna sadari on. Jala Jahowa do na mamimpin hamu marporang.” Dung i turun ma si Barak sian Dolok Tabor rap dohot 10.000 halak na mandongani ibana.
15 Dibahen Jahowa ma sursar+ sude tentara ni Panglima Sisera dohot sude kareta porangna. Jala dipamate si Barak ma nasida mamakke podang. Ujungna turun ma Panglima Sisera sian kareta porangna jala lari ma ibana.
16 Dilele si Barak do sude tentara ni Panglima Sisera dohot akka kareta porangna sahat tu Haroset-hagoyim. Dipamate do sude tentara ni Panglima Sisera mamakke podang, jala dang adong nanggo sahalak pe na mangolu.+
17 Alai lari do Panglima Sisera tu kemah ni si Jael,+ istri ni si Heber+ halak Keni. Ai mardame do si Jabin+ raja ni Hazor i dohot keluarga ni si Heber halak Keni i.
18 Didapotton si Jael ma Panglima Sisera jala ninna ma, “Masuk ma tuan. Unang pola mabiar hamu.” Dung i masuk ma Panglima Sisera tu kemah ni si Jael jala diulosi ma ibana.
19 Didok Panglima Sisera ma tu si Jael, “Dia jo tesmi saotik. Mauas au.” Dibukka si Jael ma inganan ni susu na sian kulit jala dilehon ma ibana minum.+ Dukkon i, diulosi ibana ma muse Panglima Sisera.
20 Didok Panglima Sisera ma muse, “Jongjong ma ho jonok ni pintu ni kemah i. Molo adong halak na manukkun tu ho, ‘Adong jolma disi?’ dokkon ma, ‘Dang adong.’”
21 Alai dibuat si Jael istri ni si Heber ma tokkok dohot pattik-pattik ni kemah. Renges do Panglima Sisera modom alani lojana. Nanget ma si Jael mardalan mandapotton ibana, jala ditokkok ma pattik-pattik i tu uluna pola tombus sahat tu tano. Dung i mate ma Panglima Sisera i.+
22 Dung i ro ma si Barak na mangalele Panglima Sisera i. Kaluar ma si Jael mandapotton ibana jala didok ma, “Masuk ma hamu amang, asa hupatudu halak na niluluanmuna i.” Dung i masuk ma si Barak dohot si Jael. Diida ma nungnga mate Panglima Sisera i jala lokkot do pattik-pattik ni kemah i di uluna.
23 Di ari i, ditaluhon Debata do si Jabin raja ni halak Kanaan di jolo ni halak Israel.+
24 Jala torus do halak Israel marporang mangalo si Jabin raja ni halak Kanaan i,*+ sahat tu na dipamate nasida ibana.+
Surat na di toru
^ As. “digadis tu”.
^ As. “kareta bosi”.
^ As. “ibana”.
^ As. “kareta bosina”.
^ As. “Lam gogo do tangan ni halak Israel mangalo si Jabin”.
