Pangungkapon tu si Johannes 16:1-21
16 Hubege ma soara na gogo sian bagas joro*+ na mandok tu pitu suru-suruan i, “Lao ma hamu jala usehon hamu ma pitu makkuk rimas ni Debata tu tano on.”+
2 Lao ma suru-suruan na parjolo jala diusehon ma makkukna tu tano on.+ Gabe hona bisul na posi jala na so boi malum+ ma akka halak na manjalo tanda ni binatang buas i+ dohot akka na manomba patungna.+
3 Diusehon suru-suruan na paduahon ma makkukna tu laut.+ Gabe songon mudar+ ni halak na hona bunu ma laut i jala mate ma sude na mangolu di laut i.+
4 Diusehon suru-suruan na patoluhon ma makkukna tu akka sunge dohot tu akka mata mual.+ Gabe mudar ma sude aek i.+
5 Hubege ma suru-suruan na marhuaso tu aek i mandok, “Debata na setia do Ho,+ na adong nuaeng+ jala naung adong hian. Adil do Ho ala diparo Ho panguhuman on.+
6 Diusehon nasida do mudar ni akka na badia dohot akka panurirang.*+ Alani i, dibahen Ho ma nasida manginum mudar,+ ai patut do nasida manginum i.”+
7 Jala hubege ma soara sian langgatan i mandok, “Ale Jahowa,* Debata Pargogo na So Hatudosan,+ sittong jala adil do akka panguhumanmi.”*+
8 Diusehon suru-suruan na paopatton ma makkukna tu mataniari,+ jala diloas ma mataniari i manutung akka jolma.
9 Gabe matutung ma jolma alani mohopna. Alai dang muba nasida jala dang dipasangap nasida Debata. Gariada dileai nasida do goar ni Debata, na marhuaso na parohon akka jea i.
10 Diusehon suru-suruan na palimahon ma makkukna tu tahta ni binatang buas i, gabe holom ma harajaonna.+ Diharat akka jolma ma dila ni nasida alani haccit ni pakkilalaan ni nasida.
11 Diburai nasida ma Debata na di banua ginjang alani haccit ni pakkilalaan ni nasida dohot alani bisul ni nasida i. Alai dang muba nasida sian akka ulaonna.
12 Diusehon suru-suruan na paonomhon ma makkukna tu Sunge Euprat na balga.+ Gabe mahiang ma aekna.+ Alani i, gabe boi ma mardalan akka raja+ na sian timur sian i.
13 Dung i, huida ma kaluar tolu hata na ramun na songon katak. Kaluar ma i sian baba ni naga i,+ sian baba ni binatang buas i, dohot sian pamangan ni panurirang na so sittong i.
14 Sian akka suru-suruan na jahat do ro hata i jala sude ma akka raja na di tano on mambege i. Dibahen ma akka tanda halongangan*+ lao papunguhon akka raja i tu porang+ di ari na balga, i ma ari ni Debata Pargogo na So Hatudosan i.+
15 “Ida ma! Na ro ma au songon panakko.+ Marlas ni roha ma halak na toktong jaga+ jala na mamakke abitna, asa unang salang-salang ibana mardalan jala maila diida halak.”+
16 Dipapungu ma akka raja i tu inganan na margoar Armagedon*+ di bahasa Heber.
17 Diusehon suru-suruan na papituhon ma makkukna tu langit.* Tarbege ma soara sian bagas joro,*+ sian tahta i na mandok, “Nungnga sae be!”
18 Dung i tarbege ma akka soara, ro ma akka sillam, dohot ronggur. Masa ma gempa na gogo jala na balga na so hea dope masa mulai sian na adong jolma di tano on.+
19 Mabola ma kota na balga i+ gabe tolu bagian jala maruppak ma kota ni akka bangso. Diingot Debata ma Babel na Balga i,+ dilehon ma tu ibana makkuk ni anggur na marisi rimasna.+
20 Gabe mago ma akka pulo jala dang adong be akka dolok.+
21 Dung i ro ma udan es na balga sian banua ginjang manipa akka jolma.+ Borat ni sada es hira-hira 20 kilogram.* Gabe dileai nasida ma Debata alani udan es i,+ ai balga situtu do jea i.
Surat na di toru
^ Na didok dison, i ma Inganan na Massai Badia na adong di bagas joro.
^ Ida Lampiran A5.
^ Manang “adil do keputusanmu tikki manguhumi”.
^ Manang “mukjizat”.
^ Di bahasa Junani: Har Magedon, na dibuat sian bahasa Heber i ma “Dolok Megido”.
^ Manang “udara”.
^ Na didok dison, i ma Inganan na Massai Badia na adong di bagas joro.
^ As. “sada talenta”. Ida Lampiran B14.
